سوڭعى ون كۇننىڭ ىشىندەگى كوروناۆيرۋس ينفەكتسياسىنىڭ تارالۋىنا جۇرگىزىلگەن مونيتورينگ ناتيجەسى وڭىردە ەپيدەميالىق جاعدايدىڭ ءبىرشاما تۇراقتالعانىن كورسەتىپ وتىر. وسىعان وراي, اقپان ايىنىڭ 27-سىنەن باستاپ كەيبىر شەكتەۋ شارالارى الىنىپ تاستالدى.
ماسەلەن, 23 اقپانعا دەيىنگى جاعداي بويىنشا ءبىر تاۋلىكتە كوروناۆيرۋس ينفەكتسياسىنىڭ لابوراتوريالىق راستالعان 63 دەرەگى تىركەلگەن. ال سوڭعى اپتادا, ياعني 17-23 اقپاندا ىندەت جۇقتىرعان 517 جاعداي انىقتالىپتى. ونىڭ الدىنداعى اپتادا بۇل كورسەتكىش 525-ءتى قۇراعان ەدى. جالپى, پاندەميا باستالعالى وبلىستا 13 305 ادامعا جامان تۇماۋ جۇققانى بەلگىلى بولعان.
«سارى ايماققا» وتپەي تۇرىپ, وبلىستا 90-نان استام ءبىلىم وشاعى قاشىقتان ءبىلىم بەرىپ كەلسە, قازىرگى تاڭدا وقۋشىلارعا ونلاين رەجىمىندە ءبىلىم بەرىپ جاتقان مەكتەپتەر سانى – 34 قانا. وقۋشىلاردى قاشىقتان وقىتۋ رەجىمىنە كوشىرۋدىڭ ناتيجەسىندە جامان تۇماۋدىڭ تارالۋى ءبىرشاما ازايىپتى.
– سوڭعى تاۋلىكتە 7 وقۋشىدان COVID-19 ۆيرۋسى انىقتالدى. ولار كوكشەتاۋ قالاسى مەن بۋراباي, جاقسى, تسەلينوگراد اۋداندارىندا تۇراتىن, بىرەۋى شتاتتىق رەجىمدە, 6-ۋى ونلاين رەجىمدە وقىعان وقۋشىلار. پاندەميا باستالعالى 761 وقۋشىدا ۆيرۋس لابوراتوريالىق تۇرعىدان راستالدى, – دەگەن باس سانيتارلىق دارىگەر ايناگۇل مۋسينا قازىر كوروناۆيرۋسقا قارسى ەكپەنىڭ ەكىنشى كومپونەنتى ەگىلىپ جاتقانىن تىلگە تيەك ەتتى. ءسوز اراسىندا بۇگىنگە دەيىن وبلىستا 1 298 ادام ەكپە العانىن ايتا كەتەلىك. ونىڭ التاۋى مۇعالىم, جەتەۋى مەملەكەتتىك قىزمەتشى جانە 1 285-ءى مەديتسينا قىزمەتكەرى.
ەلىمىزدە ءبىرىنشى كەزەكتە مەديتسينا قىزمەتكەرلەرى ەكپە العانى بەلگىلى. ناۋرىز ايىندا اق حالاتتىلارمەن بىرگە, ۇستازدار, قۇقىق قورعاۋ ورگاندارىنىڭ قىزمەتكەرلەرى, ال ساۋىردە ستۋدەنتتەر, مامىردا ەكپەنىڭ جەتكىلىكتى مولشەردە بولۋىنا بايلانىستى قالعان كونتينگەنت ەكپە الادى دەپ جوسپارلانىپ وتىر. 23 اقپانعا دەيىنگى جاعداي بويىنشا 250 ادامعا ەكپەنىڭ ەكىنشى كومپونەنتى سالىنعان. ەكپە العاندار ارنايى مەديتسينالىق باقىلاۋدا. ايناگۇل مۋسينانىڭ ايتۋىنشا, ەكپەنىڭ ءبىرىنشى جانە ەكىنشى كومپونەنتىن العاننان كەيىن اسقىنۋلار تىركەلمەگەن.
بۇعان دەيىن توي-تومالاق وتكىزگەنى ءۇشىن مەيرامحانا جانە توي يەلەرىنە عانا اكىمشىلىك ايىپپۇل سالىنىپ كەلسە, ەندى ويىن-توي ورىندارىنا بارعانى ءۇشىن جەكە تۇلعالار دا جاۋاپكەرشىلىككە تارتىلاتىن بولادى. جۋىردا اتباسار اۋدانىندا وسىلاي توپتاسىپ جيىن وتكىزگەن جەلىلىك ماركەتينگ مۇشەلەرى مەن قاتىسۋشىلارى جازالانعان. جىل باسىنان بەرى مونيتورينگتىك توپتار ءتۇرلى مەنشىك يەلەرىنە جاتاتىن 6 951 نىساندا كارانتين تالاپتارىنىڭ ساقتالۋىنا تەكسەرىس جۇرگىزىپ, ونىڭ 199-ىندا زاڭ بۇزۋشىلىقتاردى انىقتاعان.
وبلىسىمىزدىڭ باس سانيتارلىق دارىگەرىنىڭ 27 اقپاننان باستاپ كۇشىنە ەنەتىن جاڭا قاۋلىسىنا سايكەس, بىرقاتار مەكەمەلەردىڭ قىزمەتى جاندانادى. قوعامدىق تاماقتانۋ نىساندارى ەندى اپتا بويى جۇمىس ىستەيدى. ال فۋدكورتتارعا تەك تاپسىرىس قابىلداۋ ارقىلى عانا جۇمىس ىستەۋگە رۇقسات ەتىلەدى. عيمارات ىشىندەگى جانە سىرتىنداعى ازىق-ت ۇلىكتىك جانە ازىق-ت ۇلىكتىك ەمەس بازارلار سەنبى كۇندەرى دە جۇمىسىن جالعاستىرادى. ساۋدا نىساندارى, ياعني سۋپەرماركەتتەر مەن گيپەرماركەتتەر بۇرىنعى رەجىم بويىنشا جۇمىس ىستەي بەرەدى. ساۋدا ۇيلەرى, ساۋدا-ويىن ورتالىقتارى دا بۇرىنعى رەجىم بويىنشا جۇمىس ىستەپ, جەكسەنبى كۇندەرى دەمالادى. بالالار ويىن الاڭدارىنا, اتتراكتسيوندارعا قىزمەت كورسەتۋگە رۇقسات جوق. سونىمەن قاتار جاڭا قاۋلىعا سايكەس, ءسان سالوندارى, شاشتارازدار, فيتنەس, سپورت ورتالىقتارى كليەنتتەردى الدىن الا جازىلۋ بويىنشا قابىلداي الادى. مادەنيەت نىساندارىنا دا سىيىمدىلىعىن 20 پايىزدان جانە دايىندىق كەزىندە ادام سانىن 30-دان اسىرماي قىزمەت ەتۋگە رۇقسات بەرىلدى.
اقمولا وبلىسى