شىمكەنتتەگى قالالىق پەرزەنتحانادا جىل باسىنان بەرى 1837 ءسابي دۇنيەگە ەسىگىن اشقان. ونىڭ ىشىندە 941 ۇل بولسا, 896 قىز بالاسى. انا مەن بالانىڭ ءومىرى ءۇشىن كۇرەستە ءوزىن ۇمىتىپ, وزگەلەرگە قۋانىش سىيلاۋشى اكۋشەر-گينەكولوگ ماماننىڭ ەڭبەگى ولشەۋسىز. سول نارەستەلەردىڭ ومىرگە امان-ەسەن كەلۋىنە ۇلەس قوسقان اق حالاتتى ابزال جانداردىڭ ءبىرى – جارقىنبەك دانياروۆ.
انالاردىڭ العىسىنا بولەنىپ جۇرگەن ابزال جان – قالادا كوروناۆيرۋس ينفەكتسياسى ورشىگىن كەزدە ينفەكتسيالىق اۋرۋحانادا ەڭ العاشقىلاردىڭ ءبىرى بولىپ جۇكتى ايەلگە وتا جاساعان اكۋشەر-گينەكولوگ. قاۋىپتى ينفەكتسياعا شالدىققان ايەلدىڭ ءومىرىن امان الىپ قالۋ ءۇشىن بىلىكتى ماماندى جۇقپالى اۋرۋلار اۋرۋحاناسىنا ارنايى شاقىرتقان.
اكۋشەر-گينەكولوگ اۋىر جاعدايداعى 21 جاستاعى جۇكتى كەلىنشەككە كەسىر تىلىگى ارقىلى وتا جاساپ, انا مەن بالانىڭ ءومىرىن امان الىپ قالعان. كوۆيدكە شالدىققان ايەل دەنى ساۋ قىز بالاسىن دۇنيەگە اكەلگەن بولاتىن. دارىگەر ىندەت كەزىندە قالالىق پەرزەنتحانا جانىنان اشىلعان پروۆيزورلىق ورتالىقتا ناۋقاستارعا مەديتسينالىق كومەك كورسەتكەن.
انا مەن بالانىڭ دەنساۋلىعى باستى نازاردا ەكەنىن ايتقان دارىگەر پەرزەنتحانا قىزمەتكەرلەرى ءۇشىن تاۋلىكتىڭ ءار مينۋتى مەن ساعاتى قاربالاس ساتپەن جالعاساتىنىن اتاپ ءوتتى.
«ادامنان ادام شىعۋ ارقاشان دا وڭاي ەمەس, بۇل وتە ماڭىزدى ءارى قاۋىپتى ءسات. ءوز جۇمىسىمدى سۇيىسپەنشىلىكپەن اتقارامىن. سوندىقتان ينفەكتسيا ورشىگەن تۇستا جۇمىستان الشاقتاماي, كەرىسىنشە تاۋلىكتەپ, وتاباسىمنان شىراقتا ءجۇرىپ جۇمىس ىستەدىم. مۇنى ماقتان ەتپەيمىن. بۇل مەنىڭ حالىق الدىنداعى مىندەتىم دەپ بىلەمىن», دەيدى ج.دانياروۆ.
جاركىنبەك جاقىپبەك ۇلى ەڭبەك جولىندا 3 مىڭعا جۋىق ايەلدى بوساندىرىپ, بالانىڭ دۇنيە ەسگىن اشۋعا كومەكتەسكەن. ونىڭ ىشىندە 1 مىڭنان استام انانى كەسىر تىلىگى ارقىلى بوساندىرعان.