ستۋدەنت-جاستاردىڭ اراسىنداعى سپورتتىق ويىنداردا بولاتىن ۇلكەن جارىستاردى «ۋنيۆەرسيادا» دەگەن سياقتى مەكتەپ وقۋشىلارى اراسىندا بولاتىن سونداي سايىستى «گيمنازيادا» دەپ اتايتىنى بەلگىلى. حالىقارالىق مەكتەپتەر فەدەراتسياسىنىڭ ۇيىمداستىرۋىمەن بولاتىن بۇل جارىستار العاش رەت 1974 جىلى گەرمانيانىڭ ۆيسبادەن قالاسىندا بولعان. الايدا كسرو وقۋشىلارى وعان قاتىسپاي, وزدەرىندە وسىعان ۇقسايتىن سپارتاكيادا دەگەن سپورتتىق جارىستار ۇيىمداستىراتىن.
ال تاۋەلسىز قازاقستان حالىقارالىق تاجىريبەنى مويىنداپ, گيمنازيادا بىزدە بيىل 10-شى رەت بولىپ وتىر. پرەزيدەنت ق.توقاەۆ قازاقستان حالقىنا ارناعان سوڭعى جولداۋىندا وسكەلەڭ ۇرپاقتىڭ كۇش-قۋاتىن دۇرىس ارناعا باعىتتاپ, بۇقارالىق سپورتقا باۋلۋ تۋرالى تاپسىرما بەرگەن ەدى. مەكتەپ وقۋشىلارى اراسىندا 8 سپورت ءتۇرىن قامتىعان وسى گيمنازيادا جولداۋدىڭ تاپسىرماسىن ورىنداۋعا باعىتتالعان.
بيىل قازاقستاندىق وقۋشىلار العاش رەت قىتايدىڭ تسينتسزيان قالاسىندا وتەتىن بۇكىلالەمدىك جازعى گيمنازيادادا ونەر كورسەتەدى دەپ جوسپارلانۋدا. ءبىلىم جانە عىلىم مينيسترلىگىنە قاراستى ۇلتتىق عىلىمي-پراكتيكالىق دەنە تاربيەسى ورتالىعى ەل تاۋەلسىزدىگىنىڭ 30 جىلدىق مەرەيتويىنا ارنالعان ح قىسقى قازاقستان وقۋشىلار گيمنازياداسىن ەلىمىزدىڭ باس قالاسى مەن قىزىلجار وڭىرىندە وتكىزىلىپ جاتىر. كەشە گيمنازيادانىڭ قىزىلجارداعى بولىگىنىڭ سالتاناتتى اشىلۋ ءراسىمى بولىپ, وندا پرەمەر-ءمينيستردىڭ ورىنباسارى ەرالى توعجانوۆ پەن ءبىلىم جانە عىلىم ءمينيسترى اسحات ايماعامبەتوۆتىڭ ارنايى قۇتتىقتاۋلارى وقىلدى. ال «ۇلتتىق عىلىمي-پراكتيكالىق دەنە تاربيەسى ورتالىعىنىڭ» باس ديرەكتورى تاستانبەك ەسەنتاەۆ, سولتۇستىك قازاقستان وبلىسى اكىمىنىڭ ورىنباسارى عاني نىعمەتوۆ, سپورت ارداگەرى, كسرو قۇرمەتتى سپورت شەبەرى, قر سپورت قايراتكەرى جامبىل تاسەمەنوۆ, سپورتتىق باعدارلاۋ بويىنشا ازيا ويىندارىنىڭ چەمپيونى اسلان توقباەۆ جاس سپورتشىلارعا ىزگى تىلەكتەرىن ايتتى.
بۇگىنگى تاڭدا ەلوردادا كونكيمەن سىرعاناۋ سپورتى مەن مانەرلەپ سىرعاناۋ جارىستارى ءوز مارەسىنە جەتىپ, وزا شاۋىپ بايگە العان ۇزدىكتەردىڭ ەسىمى انىقتالدى. جالپى گيمنازيادا بياتلون, شايبالى حوككەي, قىسقى پرەزيدەنتتىك كوپسايىس, قىسقى سپورتتىق باعدارلاۋ, شاڭعى جارىسى, شورت-ترەك, كونكيمەن جارىس جانە مانەرلەپ سىرعاناۋ سياقتى 8 سپورت تۇرىنەن وتۋدە.
كونكيمەن سىرعاناۋ سپورتىنان 8 ايماقتىڭ ىشىنەن كوماندالىق ەسەپتە ۇلدار اراسىندا الماتى قالاسى, قىزدار اراسىندا سولتۇستىك قازاقستان وبلىسىنىڭ وقۋشىلارى كوش باستادى. سپورتقا دارىندى بالالاردى وليمپيادا چەمپيوندارى باقتيار ارتاەۆ پەن سارىك ساپيەۆتىڭ قولداپ كەلگەنى وقۋشىلار ءۇشىن توسىنسىي بولدى.
اياقتالعان مانەرلەپ سىرعاناۋ جارىسىنىڭ جەڭىمپازدارىن بعم «مەكتەپكە دەيىنگى جانە ورتا ءبىلىم بەرۋ كوميتەتىنىڭ» ءبولىم باسشىسى گۇلميرا كۇلساريەۆا, وليمپيادا ويىندارىنىڭ قولا جۇلدەگەرى ارمان شىلمانوۆ, كونكيمەن جۇگىرۋ سپورتى ۇلتتىق فەدەراتسياسىنىڭ باس حاتشىسى انجەلينا ماكيشەۆا, الەم چەمپيوناتىنىڭ كۇمىس جۇلدەگەرى ەليزابەت تۇرسىنباەۆانىڭ جاتتىقتىرۋشىسى بايتاق تۇرسىنباەۆ, نۇر-سۇلتان قالاسى ينۆەستيتسيالار جانە كاسىپكەرلەردى دامىتۋ باسقارماسى باسشىسىنىڭ ورىنباسارى قانات يسابەكوۆتەر ماراپاتتادى.
مانەرلەپ سىرعاناۋدان كوماندالىق ەسەپتە 237,6 ۇپايمەن التىن مەدالدى الماتى قالاسى يەلەنسە, 2-ورىندى 233,2 ۇپايمەن نۇر-سۇلتان قالاسى, 3-ورىندى 162,6 ۇپايمەن قاراعاندى وبلىسى الدى. بۇل سپورت تۇرىنەن جارىسقا ەلىمىزدىڭ التى وڭىرىنەن 65 سپورتشى جەتكىنشەكتەر قاتىسقان ەدى. ايتا كەتۋ كەرەك, دەمەۋشىلەردىڭ قولداۋىنىڭ ارقاسىندا — Astana Garden School, №54 مەكتەپ-ليتسەي جانە ت.ب. مەكتەپ ۇجىمدارىنىڭ اتا-انالارى مەن ۇستازدارى جارىستى جانە ماراپاتتاۋ ءراسىمىن ورتالىقتىڭ يۋتۋب كانالىنان تىكەلەي ەفيردە تاماشالادى.
مانەرلەپ سىرعاناۋدان كەيىن شايبالى حوككەي مەن بياتلون, قىسقى پرەزيدەنتتى كوپسايىس باسەكەسى باستالدى. ولاردىڭ اشىلۋى پەتروپاۆل قالاسىنداعى ا.ۆينوكۋروۆ اتىنداعى سپورت سارايىندا بولدى.
جارىستىڭ العاشقى كۇنى اقمولا وبلىسىنىڭ بالالارى شىعىسقازاقستاندىقتاردى 8:2, الماتى وبلىسى دا قوستانايلىقتاردى وسىنداي ەسەپپەن جەڭدى. بۇل سپورت تۇرىنە 9 وڭىردەن 180 وقۋشى قاتىسۋدا. جارىستار 5 ناۋرىزعا دەيىن جالعاسادى.
قىسقى پرەزيدەنتتىك كوپسايىسقا الماتى قالاسى جانە اقمولا, الماتى, شىعىس قازاقستان, قاراعاندى, قوستاناي, پاۆلودار, باتىس جانە سولتۇستىك قازاقستان وبلىستارىنان 100-دەن اسا وقۋشى قاتىسۋدا.