جۋىردا ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ «ارسەلورميتتال» كومپانياسىنىڭ ۆيتسە-پرەزيدەنتى ۆيجاي گويال مىرزامەن كەزدەستى. كەزدەسۋ بارىسىندا تاراپتار كومپانيا وتكىزەتىن تابيعاتتى قورعاۋ ءىس-شارالارىن, سونداي-اق ەميسسيالاردىڭ اسىپ كەتۋى بويىنشا جاقىندا ورىن العان وقيعانى تالقىلادى.
اڭگىمە بارىسىندا مينيستر تەمىرتاۋ اتموسفەراسىنىڭ لاستانۋ دەڭگەيى بۇگىندە ەلىمىزدەگى باستى ەكولوگيالىق پروبلەمالاردىڭ ءبىرى ەكەنىن اتاپ ءوتتى. م.مىرزاعاليەۆتىڭ ايتۋىنشا, جىل سايىن «ارسەلور ميتتال تەمىرتاۋ» اق مەتاللۋرگيالىق كەشەنىنەن اتموسفەرالىق اۋاعا 230 مىڭ توننادان استام لاستاۋشى زات شىعارىلادى. بۇل قالانىڭ ءاربىر تۇرعىنىنا (بالالار مەن ايەلدەردى قوسا العاندا) شامامەن 11 توننا لاستاۋشى زاتتان كەلەدى.
ۆەدومستۆو باسشىسى كومپانيا جۇزەگە اسىرىپ جاتقان تابيعاتتى قورعاۋ ءىس-شارالارىنىڭ ءتيىمسىز ەكەنىن جەتكىزدى.
«كاسىپورىندا تەك قاعاز جۇزىندە جانە كوزبوياۋشىلىق ءۇشىن جۇمىس ىستەيتىن تيىمدىلىگى از تابيعات قورعاۋ شارالارى ەنگىزىلدى», دەدى مينيستر.
سوڭعى 5 جىلدا كاسىپورىن تابيعاتتى قورعاۋ ءىس-شارالارىنا 28 ملرد تەڭگە (67 ملن دوللار) جۇمسادى, ال ەكولوگيالىق تيىمدىلىك شىعارىندىلاردىڭ 190 توننا نەمەسە «ارسەلور ميتتال تەمىرتاۋ» ناقتى شىعارىندىلارىنىڭ 0,08%-ىنا تومەندەۋىن عانا قۇرادى. 2019 جىلى كومپانيا 2019-2024 جىلدار ىشىندە شىعارىندىلار كولەمىن 60 مىڭ تونناعا ازايتۋ مىندەتىن الدى.
«الايدا كاسىپورىن ءالى كۇنگە دەيىن وزىنە العان مىندەتتەمەلەردى ورىنداۋ بويىنشا شارالار قابىلدامادى», دەدى م.مىرزاعاليەۆ.
تەمىرتاۋدىڭ ەكولوگيالىق احۋالىن ەسكەرە وتىرىپ, ۆەدومستۆو باسشىسى كومپانيا باسشىلىعىنىڭ الدىنا وزىق قولجەتىمدى تەحنولوگيالارعا كوشە وتىرىپ, شىعارىندىلار كولەمىن تاياۋداعى 4 جىلدا كەمىندە 30%-عا تومەندەتىپ, ءوندىرىستى تولىق رەكونسترۋكتسيالاۋ جانە جاڭعىرتۋ تۋرالى ماسەلە قويدى. سونداي-اق مينيستر ناقتى ۋاقىت رەجىمىندە دەرەكتەردى بەرە وتىرىپ, ەميسسيالار مونيتورينگىنىڭ اۆتوماتتاندىرىلعان جۇيەسىن ەنگىزۋ قاجەتتىگىن اتاپ ءوتتى. قالا ەكولوگياسىنىڭ جاي-كۇيىن جاقسارتۋ شارالارىنىڭ قاتارىندا م.مىرزاعاليەۆ كومپانيانىڭ تەمىرتاۋ مەن وعان ىرگەلەس اۋماقتا (500 مىڭ اعاش وتىرعىزۋ) «جاسىل بەلدەۋ» قۇرۋ جونىندەگى مىندەتتەمەسىن ەسكە سالدى.