مەملەكەتتىك قىزمەتشىلەردىڭ جانە مەملەكەتتىك اكىمشىلىك قىزمەتتىڭ كادر رەزەرۆىنە الىنعان ادامداردىڭ تاعىلىمداماسىن ۇيىمداستىرۋ مەن ودان ءوتۋ قاعيدالارىن بەكىتۋ تۋرالى
مەملەكەتتىك قىزمەتشىلەردىڭ جانە مەملەكەتتىك اكىمشىلىك قىزمەتتىڭ كادر رەزەرۆىنە الىنعان ادامداردىڭ تاعىلىمداماسىن ۇيىمداستىرۋ مەن ودان ءوتۋ قاعيدالارىن بەكىتۋ تۋرالى
«مەملەكەتتىك قىزمەت تۋرالى» 1999 جىلعى 23 شىلدەدەگى قازاقستان رەسپۋبليكاسى زاڭىنىڭ 19- بابىنىڭ 2-تارماعىنا سايكەس قاۋلى ەتەمىن:
1. قوسا بەرىلىپ وتىرعان مەملەكەتتىك قىزمەتشىلەردىڭ جانە مەملەكەتتىك اكىمشىلىك قىزمەتتىڭ كادر رەزەرۆىنە الىنعان ادامداردىڭ تاعىلىمداماسىن ۇيىمداستىرۋ مەن ودان ءوتۋ قاعيدالارى بەكىتىلسىن.
2. وسى جارلىق العاشقى رەسمي جاريالانعان كۇنىنەن باستاپ كۇنتىزبەلىك ون كۇن وتكەن سوڭ قولدانىسقا ەنگىزىلەدى.
قازاقستان رەسپۋبليكاسىنىڭ پرەزيدەنتى ن.نازارباەۆ.
استانا, اقوردا, 2013 جىلعى 27 جەلتوقسان. № 718
قازاقستان رەسپۋبليكاسى پرەزيدەنتىنىڭ 2013 جىلعى 27 جەلتوقسانداعى № 718 جارلىعىمەن بەكىتىلگەن
مەملەكەتتىك قىزمەتشىلەردىڭ جانە مەملەكەتتىك اكىمشىلىك قىزمەتتىڭ كادر رەزەرۆىنە الىنعان ادامداردىڭ تاعىلىمداماسىن ۇيىمداستىرۋ مەن ودان ءوتۋ
قاعيدالارى
1. جالپى ەرەجەلەر
1. مەملەكەتتىك قىزمەتشىلەردىڭ جانە مەملەكەتتىك اكىمشىلىك قىزمەتتىڭ كادر رەزەرۆىنە الىنعان ادامداردىڭ (بۇدان ءارى – رەزەرۆشىلەر) تاعىلىمداماسىن ۇيىمداستىرۋ مەن ودان ءوتۋىنىڭ وسى قاعيدالارى «مەملەكەتتىك قىزمەت تۋرالى» 1999 جىلعى 23 شىلدەدەگى قازاقستان رەسپۋبليكاسى زاڭىنىڭ 19-بابىنىڭ 2-تارماعىنا سايكەس ازىرلەنگەن جانە مەملەكەتتىك قىزمەتشىلەر مەن رەزەرۆشىلەردىڭ تاعىلىمداماسىن ۇيىمداستىرۋ مەن ودان ءوتۋى ءتارتىبىن ايقىندايدى.
2. تاعىلىمداما مەملەكەتتىك قىزمەتشىلەر مەن رەزەرۆشىلەردىڭ مەملەكەتتىك ورگانداردىڭ جولداماسى بويىنشا تۇراقتى جۇمىس ورنىنان تىس جەردە كاسىبي ءبىلىم مەن تاجىريبە الۋى ءۇشىن جۇرگىزىلەدى.
3. مەملەكەتتىك قىزمەتشىلەر مەن رەزەرۆشىلەر قازاقستان رەسپۋبليكاسىنىڭ مەملەكەتتىك ورگاندارىندا, اكتسيونەرى مەملەكەت بولىپ تابىلاتىن ۇلتتىق باسقارۋشى حولدينگتەردە, ۇلتتىق حولدينگتەردە, ۇلتتىق كومپانيالاردا, ۇلتتىق دامۋ ينستيتۋتتارىندا, ولاردىڭ داۋىس بەرەتىن اكتسيالارىنىڭ (قاتىسۋ ۇلەستەرىنىڭ) ەلۋ پايىزىنان استامى وزدەرىنە تيەسىلى ەنشىلەس ۇيىمدارىندا (بۇدان ءارى – كومپانيالار) تاعىلىمدامادان وتەدى.
4. مەملەكەتتىك قىزمەتشىلەر مەن رەزەرۆشىلەر تاعىلىمدامادان اقىسىز نەگىزدە وتەدى.
مەملەكەتتىك قىزمەتشىلەردىڭ, سونداي-اق مەملەكەتتىك قىزمەتشىلەر بولىپ تابىلاتىن رەزەرۆشىلەردىڭ تاعىلىمدامادان ءوتۋىنىڭ بارلىق ۋاقىتى ىشىندە جۇمىس ورنى (لاۋازىمى) مەن جالاقىسى ساقتالادى.
2. تاعىلىمدامانى ۇيىمداستىرۋ ءتارتىبى
5. مەملەكەتتىك قىزمەتشىلەر مەن رەزەرۆشىلەردىڭ تاعىلىمدامادان ءوتۋىنىڭ ماقساتى, مىندەتتەرى, مەرزىمى مەن ورنى تاعىلىمدامادان ءوتۋ كەستەسىنە سايكەس ۇيىمداستىرىلادى.
6. تاعىلىمدامادان ءوتۋ كەستەلەرىنىڭ جوبالارى تاعىلىمدامادان ءوتۋ كوزدەلگەن مەملەكەتتىك ورگاندارمەن جانە كومپانيالارمەن كەلىسىلەدى. كەستەلەر جوبالارىن ازىرلەۋ كەزىندە مەملەكەتتىك قىزمەتشىلەردەن جانە رەزەرۆشىلەردەن ۇسىنىستار سۇراتىلادى.
7. مەملەكەتتىك قىزمەتشىلەردىڭ تاعىلىمدامادان ءوتۋ كەستەسىن مەملەكەتتىك قىزمەتشىلەر جۇمىس ىستەيتىن مەملەكەتتىك ورگاندار ازىرلەپ, بەكىتەدى.
رەزەرۆشىلەردىڭ, ونىڭ ىشىندە مەملەكەتتىك قىزمەتشىلەر بولىپ تابىلاتىن رەزەرۆشىلەردىڭ تاعىلىمدامادان ءوتۋ كەستەسىن مەملەكەتتىك قىزمەت ىستەرى جونىندەگى ۋاكىلەتتى ورگان نەمەسە ونىڭ اۋماقتىق بولىمشەلەرى ازىرلەپ, بەكىتەدى.
تاعىلىمدامادان ءوتۋ كەستەلەرى جارتى جىلدا ءبىر رەت بەكىتىلەدى.
مەملەكەتتىك قىزمەتشىلەردىڭ باسقا لاۋازىمدارعا تاعايىندالعان, ولاردىڭ بوساتىلۋى, ۋاقىتشا ەڭبەككە قابىلەتسىزدىگىنە, دەمالىستا, ءىسساپاردا بولۋىمەن بايلانىستى جۇمىستا بولماعان, سونداي-اق رەزەرۆشىلەر كادر رەزەرۆىنەن شىعارىلعان جاعدايدا تاعىلىمدامادان ءوتۋ كەستەسىنە وزگەرىستەر ەنگىزۋگە جول بەرىلەدى.
8. مەملەكەتتىك ورگانداردىڭ تاعىلىمدامادان ءوتۋ كەستەلەرىن قالىپتاستىرۋ جونىندەگى قىزمەتىن ۇيلەستىرۋدى, مەملەكەتتىك ورگاندار مەن كومپانيالاردىڭ تاعىلىمدامانى ۇيىمداستىرۋ جونىندەگى قىزمەتىن تالداۋدى مەملەكەتتىك قىزمەت ىستەرى جونىندەگى ۋاكىلەتتى ورگان مەن ونىڭ اۋماقتىق بولىمشەلەرى جۇزەگە اسىرادى.
3. تاعىلىمدامادان ءوتۋ ءتارتىبى
9. تاعىلىمداما ءۇش ايدان اسپايتىن مەرزىمگە بەلگىلەنەدى.
10. مەملەكەتتىك قىزمەتشىلەردى, سونداي-اق مەملەكەتتىك قىزمەتشىلەر بولىپ تابىلاتىن رەزەرۆشىلەردى تاعىلىمداماعا جىبەرۋ ءتيىستى مەملەكەتتىك ورگاننىڭ اكتىسىمەن رەسىمدەلەدى.
مەملەكەتتىك قىزمەتشىلەر بولىپ تابىلمايتىن رەزەرۆشىلەردى تاعىلىمداماعا جىبەرۋ مەملەكەتتىك قىزمەت ىستەرى جونىندەگى ۋاكىلەتتى ورگاننىڭ نەمەسە ونىڭ اۋماقتىق بولىمشەسىنىڭ حاتىمەن رەسىمدەلەدى.
11. مەملەكەتتىك قىزمەتشىلەر مەن رەزەرۆشىلەردى تاعىلىمداماعا قابىلدايتىن مەملەكەتتىك ورگاندار مەن كومپانيالار وزدەرىنىڭ پەرسونالدى باسقارۋ قىزمەتىنىڭ (كادر قىزمەتىنىڭ) ۇسىنىستارى بويىنشا:
1) تاعىلىمدامانى ۇيىمداستىرۋعا جاۋاپتى قۇرىلىمدىق بولىمشەلەر تىزبەسى مەن ادامداردى ايقىندايدى;
2) مەملەكەتتىك قىزمەتشىلەرى تاعىلىمداماعا جىبەرىلەتىن مەملەكەتتىك ورگاندار ازىرلەگەن تاعىلىمدامانىڭ جەكە جوسپارلارىن, سونداي-اق رەزەرۆشىلەر مەملەكەتتىك قىزمەت ىستەرى جونىندەگى ۋاكىلەتتى ورگانمەن نەمەسە ونىڭ اۋماقتىق بولىمشەلەرىمەن بىرلەسىپ ازىرلەگەن تاعىلىمدامانىڭ جەكە جوسپارلارىن كەلىسەدى;
3) تاعىلىمدامادان وتەتىن مەملەكەتتىك قىزمەتشىلەر مەن رەزەرۆشىلەردىڭ تاعىلىمدامانىڭ جەكە جوسپارىن ورىنداۋى ءۇشىن جاعدايلار جاسايدى;
4) تاعىلىمدامانىڭ ۇيىمداستىرىلۋىنا باقىلاۋدى جۇزەگە اسىرادى.
12. مەملەكەتتىك قىزمەتشىلەر مەن رەزەرۆشىلەردىڭ تاعىلىمدامادان ءوتۋىن ۇيىمداستىرۋعا جاۋاپتى ادام:
1) تاعىلىمداماعا باسشىلىقتى جۇزەگە اسىرادى;
2) تاعىلىمدامادان وتەتىن مەملەكەتتىك قىزمەتشىلەر مەن رەزەرۆشىلەردى تاعىلىمدامانىڭ جەكە جوسپارىمەن قولىن قويدىرا وتىرىپ تانىستىرادى;
3) تاعىلىمدامادان وتەتىن مەملەكەتتىك قىزمەتشىلەر مەن رەزەرۆشىلەرگە تاعىلىمدامادان ءوتۋ كەزەڭىنە رۇقساتتاما رەسىمدەۋ جونىندەگى جۇمىستى ۇيىمداستىرادى;
4) تاعىلىمدامادان وتەتىن مەملەكەتتىك قىزمەتشىلەر مەن رەزەرۆشىلەرگە تاعىلىمدامانىڭ جەكە جوسپارلارىنا ەنگىزىلگەن ماسەلەلەر بويىنشا, ونىڭ ىشىندە مەملەكەتتىك ورگاننىڭ نەمەسە كومپانيانىڭ وزگە دە قىزمەتكەرلەرىنىڭ قاتىسۋىمەن كونسۋلتاتسيا بەرەدى;
5) تاعىلىمدامادان وتەتىن مەملەكەتتىك قىزمەتشىلەر مەن رەزەرۆشىلەردىڭ تاعىلىمدامانىڭ جەكە جوسپارىن ورىنداۋىنا باقىلاۋدى جۇزەگە اسىرادى.
13. تاعىلىمدامادان وتەتىن مەملەكەتتىك قىزمەتشىلەر مەن رەزەرۆشىلەر ءۇشىن ەڭبەك كۇنىنىڭ ۇزاقتىعى ولاردى تاعىلىمداماعا قابىلدايتىن مەملەكەتتىك ورگاندار مەن كومپانيالاردىڭ ەڭبەك تارتىبىنە سايكەس بەلگىلەنەدى.
4. تاعىلىمدامانى قورىتىندىلاۋ
14. تاعىلىمدامادان وتكەن مەملەكەتتىك قىزمەتشىلەر مەن رەزەرۆشىلەر تاعىلىمداما اياقتالعان كۇننەن باستاپ بەس جۇمىس كۇنى ىشىندە تاعىلىمدامادان وتكەن مەملەكەتتىك ورگاننىڭ نەمەسە كومپانيانىڭ پەرسونالدى باسقارۋ قىزمەتىنە (كادر قىزمەتىنە) تاعىلىمداما بويىنشا تاپسىرمالاردىڭ ورىندالۋى تۋرالى جازباشا ەسەپ ۇسىنادى.
جازباشا ەسەپ:
1) تاعىلىمدامانىڭ جەكە جوسپارىنىڭ ورىندالۋى تۋرالى اقپاراتتى;
2) تاعىلىمداما بارىسىندا الىنعان شەبەرلىك, داعدى, تەوريالىق جانە پراكتيكالىق ءبىلىم تۋرالى اقپاراتتى;
3) مەملەكەتتىك ورگاننىڭ نەمەسە كومپانيانىڭ جۇمىسىن جاقسارتۋ جونىندەگى ۇسىنىستاردى قامتيدى.
15. تاعىلىمدامانى ۇيىمداستىرۋعا جاۋاپتى ادام تاعىلىمداما اياقتالعان كۇننەن باستاپ بەس جۇمىس كۇنى ىشىندە مەملەكەتتىك قىزمەتشى نەمەسە رەزەرۆشى تاعىلىمدامادان وتكەن مەملەكەتتىك ورگاننىڭ نەمەسە كومپانيانىڭ پەرسونالدى باسقارۋ قىزمەتىنە (كادر قىزمەتىنە) ول تۋرالى پىكىر ۇسىنادى.
پىكىردە مىناداي مالىمەتتەر كورسەتىلەدى:
1) تاعىلىمدامادان وتكەن مەملەكەتتىك قىزمەتشىنىڭ نەمەسە رەزەرۆشىنىڭ تاعىلىمدامانىڭ جەكە جوسپارىن ورىنداۋىن باعالاۋ;
2) تاعىلىمدامادان وتكەن مەملەكەتتىك قىزمەتشىنىڭ نەمەسە رەزەرۆشىنىڭ كاسىبي دايارلىعىن باعالاۋ;
3) تاعىلىمدامادان وتكەن مەملەكەتتىك قىزمەتشىنىڭ نەمەسە رەزەرۆشىنىڭ الداعى قىزمەتى جونىندەگى ۇسىنىمدار.
16. مەملەكەتتىك قىزمەتشى نەمەسە رەزەرۆشى تاعىلىمدامادان وتكەن مەملەكەتتىك ورگاننىڭ نەمەسە كومپانيانىڭ پەرسونالدى باسقارۋ قىزمەتى (كادر قىزمەتى) تاعىلىمداما اياقتالعان كۇننەن باستاپ جەتى جۇمىس كۇنى ىشىندە مەملەكەتتىك قىزمەتشىنى نەمەسە رەزەرۆشىنى تاعىلىمدامادان وتۋگە جىبەرگەن مەملەكەتتىك ورگانعا جازباشا ەسەپ پەن پىكىردىڭ كوشىرمەسىن جولدايدى.
17. مەملەكەتتىك قىزمەتشىلەردى تاعىلىمداماعا جىبەرگەن مەملەكەتتىك ورگاندار تاعىلىمدامادان وتۋگە مونيتورينگ جانە تالداۋ جۇرگىزەدى. جۇرگىزىلگەن مونيتورينگ پەن تالداۋدىڭ ناتيجەلەرى بويىنشا مەملەكەتتىك قىزمەتشىلەر مەن رەزەرۆشىلەردىڭ قىزمەتىن جاقسارتۋدى تالاپ ەتەتىن باعىتتار, ولاردى وقىتۋ مەن مەملەكەتتىك قىزمەتتى وتكەرۋى بويىنشا ۇسىنىستار تۇجىرىمدالادى.
5. قورىتىندى ەرەجەلەر
18. مەملەكەتتىك ورگاندار مەملەكەتتىك قىزمەتشىلەردىڭ قىزمەت ەرەكشەلىكتەرىن ەسكەرە وتىرىپ, وسى قاعيدالارعا سايكەس ولاردىڭ تاعىلىمداماسىن ۇيىمداستىرۋ مەن ودان ءوتۋى ءتارتىبىن دەربەس ايقىنداي الادى.
19. مەملەكەتتىك قىزمەتشىلەر مەن رەزەرۆشىلەردىڭ تاعىلىمداماسىن ۇيىمداستىرۋ مەن ودان ءوتۋى جونىندەگى ادىستەمەلىك ۇسىنىمداردى مەملەكەتتىك قىزمەت ىستەرى جونىندەگى ۋاكىلەتتى ورگان بەكىتەدى.