ىشكى ىستەر ءمينيسترى ەرلان تۇرعىمباەۆ وڭىرلەردەگى پوليتسيا دەپارتامەنتتەرىنىڭ بىرقاتار نىساندى ارالادى, دەپ حابارلايدى Egemen.kz
«وتكەن اپتادا ىشكى ىستەر ءمينيسترى ەرلان تۇرعىمباەۆ اقتوبە جانە باتىس قازاقستان وبلىستارىندا جۇمىس ساپارىمەن بولدى. ول وڭىرلەردەگى پوليتسيا دەپارتامەنتتەرىنىڭ بىرقاتار نىساندارىن ارالادى. سونداي-اق, ادام كوپ جينالاتىن جانە قىلمىس كوپ جاسالاتىن ايماقتاردا ورناتىلعان جاڭا مودۋلدىك ستاتسيونارلىق پوليتسيا بەكەتتەرىن قاراپ شىقتى», دەيدى قر ءىىم رەسمي وكىلى ءنۇردىلدا وراز.
ونىڭ ايتۋىنشا, مينيستر پوليتسيا ناريادتارىندا تاۋلىك بويى قىزمەت اتقارۋ جانە ازاماتتاردى قابىلداۋ ءۇشىن قاجەتتىنىڭ ءبارى بار ەكەنىنە كوز جەتكىزدى. سونىمەن قاتار, پوليتسيانىڭ جاڭا ۋچاسكەلىك بەكەتتەرىندە بولدى.
«ەرلان تۇرعىمباەۆ «اكىمدىكتەرمەن بىرلەسىپ ۋچاسكەلىك ينسپەكتورلارعا ءتيىستى جاعداي جاساپ, ۋچاسكەلىك پۋنكتتەر جەلىسىن كەڭەيتە وتىرىپ, ءبىز ازاماتتارىمىزدىڭ قاۋىپسىزدىك دەڭگەيىن ارتتىرامىز. مۇنداي جۇمىستى ءبىز بارلىق وڭىرلەردە جۇرگىزەتىن بولامىز» دەپ اتاپ ءوتتى», دەيدى ول.