بىرلىك – كەمەل كەلەشەگىمىزدىڭ كەپىلى

ەلىمىزدەگى ءارتۇرلى قوعامدىق-ساياسي ۇيىمدار مەن مەملەكەت­تىك مەكەمە, كاسىپورىنداردىڭ بار­لىعى دا وسىناۋ جاۋاپتى مىن­دەتتىڭ بيىك دەڭگەيىنەن كورىن­سە ەكەن دەيمىز. بۇل ورايدا قازاق­ستان حالقى اسسامبلەياسىنا دا جۇكتەلەر مىندەت پەن ارتىلار سەنىمنىڭ جۇگى اسا اۋقىمدى ەكەنى بارشامىزعا ايان.

قازاقستان رەسپۋبلي­كا­سى­نىڭ پرەزيدەنتى قاسىم-جومارت توقاەۆ «Egemen Qazaqstan» گا­زەتى­نىڭ بيىلعى جىل باسىنداعى سانىندا جاريالاعان «تاۋەلسىزدىك بارى­نەن قىمبات» باعدارلامالىق ماقالاسىندا: ء«بىزدى قاي زاماندا دا قيىندىقتاردان امان الىپ كەلە جاتقان باستى قۇدىرەت – ەل بىرلىگى. ىنتىماعى جاراسقان جۇرت­تىڭ قاشاندا ۇپايى تۇگەل. ءتۇرلى جاعدايلارعا بايلانىستى قازاق جەرىنە ءار كەزەڭدە ءارتۇر­لى ۇلت وكىلدەرى كوپتەپ قونىس­تاندى. قازاق حالقى ەشكىمدى جات كورمەي, باۋىرىنا باس­تى. بۇگىندە ولاردىڭ تۋعان جەرى دە, وتانى دا – قازاقستان. ءبىز كوپ ەتنوستىق سيپاتىمىزدى ارتىقشىلىققا اينالدىرا العانىمىز انىق. كوپتە­گەن شەتەلدىك ساراپشىنىڭ ەلىمىزگە قاتىستى «ەۋرازياداعى شىرپى تيسە لاپ ەتكەلى تۇرعان قۋراي», «failed state» سياقتى بولجامدارىن جوققا شىعاردىق. بۇل جولدا تىنىشتىق پەن تۇراق­تى­لىقتىڭ باستاۋى بولعان قازاق­ستان حالقى اسسامبلەياسى ءتيىمدى جۇمىس اتقاردى. ەشكىمدى ۇلتىنا قاراپ بولە-جارعان جوقپىز. ءبارى­نىڭ ءوسىپ-ونۋىنە تولىق جاعداي جاسا­دىق, بىردەي مۇمكىندىك بەر­دىك. ءبىزدىڭ ۇلتارالىق كەلىسىم سايا­ساتى­مىز الەمدى مويىنداتتى. حال­قى­مىزدىڭ وسىنداي ىرىس-ىن­تى­ماققا نەگىزدەلگەن جاراسىمىن باعالاي ءبىلۋىمىز كەرەك. بۇل – كەمەل كەلەشەككە باستايتىن بىر­دەن-ءبىر دۇرىس جول», دەپ جازدى.

ءيا, تاۋەلسىزدىگىمىزدىڭ تۇعى­رىن نىقتاپ, ەتنوسارالىق ىنتى­ماعىمىزدى نىعايتقان دا وسى بىرلىگىمىز ەكەنىن بۇگىندە ءبارىمىز جاقسى بىلەمىز. تاۋەلسىزدىگىمىزدىڭ وتىز جىلى ىشىندە بىرلىگى جاراس­قان ەل, دوستىق پەن ىنتى­ماققا ارقا سۇيەگەن مەملەكەت رەتىندە الەم كارتاسىنان ويىپ تۇرىپ ورىن العانىمىز تورتكۇل دۇنيە مويىنداعان شىندىق.

زەر سالىپ باعامدار بول­ساق, بىرلىكتىڭ دە, ىنتىماق پەن تاتۋ­لىقتىڭ دا نەگىزىندە ادام مەن ادامنىڭ ءبىر-بىرىنە دەگەن سۇيىسپەنشىلىگى مەن سىيلاس­تىعى جاتقان جوق پا! سوڭعى جىل­دارى ەلىمىزدە اتاپ وتىلە باس­تا­عان العىس ايتۋ كۇنى دە وسىناۋ باعا جەتپەس اسىل قازى­نامىز تاتۋلىعىمىزدى نىعاي­تۋعا, بىرلىگىمىزدى بەكەمدەۋگە ايتارلىقتاي سەپتىگىن تيگىزە باس­تاعانى اقيقات.

قازاقستان رەسپۋبليكاسى­نىڭ تۇڭعىش پرەزيدەنتى – ەلباسى نۇرسۇلتان نازارباەۆ تاۋەلسىزدىگىمىزدىڭ العاشقى بەس جىلدىعىنا بەرگەن باعاسىندا: «...مۇنداي تاعدىر جەر بەتىندەگى حالىقتاردىڭ ءبارىنىڭ ماڭدايىنا جازىلا بەرمەيدى, قىسقا عانا ۋاقىت ارالىعىندا وسىنشاما كۇردەلى مىندەتتەردى شەشۋ دە كەز كەلگەن حالىقتىڭ قولىنان كەلمەيدى. ءوزىمىزدىڭ قۋاتتى مەملەكەتتىگىمىزدى قۇرا وتىرىپ, ۇلتارالىق كەلىسىم مەن ساياسي تۇراقتىلىقتى ساقتاپ قالۋ ءححى عاسىردىڭ تابالدىرىعىنداعى ءبىزدىڭ مىندەتىمىزدى وسىلاي تۇ­جىرىپ ايتۋعا بولار ەدى», دەگەن بولاتىن. بۇگىندە سان الۋان كۇردەلى مىندەتتەردى حالقى­مىزدىڭ اۋىزبىرشىلىگى مەن تاتۋ­لىعىنىڭ ارقاسىندا شەشىپ, مەم­لەكەتتىك سارابدال شە­شىم­دەر نەگىزىندە ساياسي تۇ­راق­تىلى­عىمىزدى ساقتاپ وتىر­عانىمىز بارشاعا ايان.

جوعارىدا ءسوز بولعان ايگىلى ماقالاسىندا مەملەكەت باسشىسى  حالقىمىزدى بىرىكتىرەتىن ورتاق قۇندىلىقتاردى بارىنشا دارىپتەپ, وي-ساناعا بەرىك ورنىقتىرۋىمىز كەرەكتىگىن ايتا كەلىپ, «مىسالى, ناۋرىز مەيرامىن اتاپ ءوتۋ تۇجىرىمداماسىن جاساپ, كوكتەم مەرەكەسىنىڭ مازمۇنىن بايىتا تۇسكەن ءجون. بۇكىل قوعامدى ۇيىستىراتىن قۇندىلىقتار نەعۇرلىم كوپ بولسا, بىرلىگىمىز دە سوعۇرلىم بەكەم بولادى» دەپ تۇجىرعان ەدى. بۇگىن بۇكىل ەلىمىز بولىپ اتاپ ءوتىپ جاتقان العىس ايتۋ كۇنى دە وسىنداي قۇندىلىقتارىمىزدىڭ اجىراماس بولشەگى ەكەنى راس.

حالقىن ورتاق جەڭىستەر مەن بەرەكەلى  يگىلىكتەرگە باستاي­ت­ىن كەز كەلگەن ازاماتتىق قوعام­­نىڭ باستى ماقساتى – ەل ىرگەسى­نىڭ شايقالماۋى, ەل-جۇرت سەنى­مىنىڭ سەتىنەمەۋى. وسى جولدا وت­ك­ەنىمىزدى دۇرىس باعالاپ, تاريحى­مىزدان ساباق الىپ, نۇرلى بولاشاققا قارىشتى قادام جاساۋ ءار قازاقستاندىقتىڭ ازا­مات­تىق پارىزى. مۇنداي قادام بۇگىنگىدەي بەيبىت كۇنگە جەتكىزگەن تاعدىرىمىزعا العىس ايتۋدان باستالعانى ءجون دەپ بىلەمىز.

زاكيرجان كۋزيەۆ,

قازاقستان حالقى اسسامبلەياسى توراعاسىنىڭ ورىنباسارى