باتىس قازاقستان وبلىسىندا 9 مىڭعا جۋىق تۇرعىن ءۇي جارىقسىز قالدى. بۇل تۋرالى «استانا» تەلەارناسى حابارلادى.
مامانداردىڭ ايتۋى بويىنشا, ەلەكتر جەلىلەرى قاتقان مۇزداقتىڭ سالماعىن كوتەرە الماي, بىرنەشە جەردەن ۇزىلگەن. وسىنىڭ سالدارىنان اتالعان وڭىردەگى كازتالوۆ, زەلەنوۆ, جاڭاقالا, بوكەي ورداسى, تاسقالا, سىرىم مەن جانىبەك اۋداندارىنىڭ ەلدى مەكەندەرى قاراڭعىلىق قۇشاعىندا قالدى. قازىر ەنەرگەتيكتەر مەن توتەنشە جاعداي قىزمەتىنىڭ ماماندارىنان جاساقتالعان ارنايى بريگادا ۇزىلگەن ەلەكتر جەلىلەرىن قالپىنا كەلتىرۋدە
«ارنايى بريگادا تۇرعىنداردى جارىقپەن قامتۋعا كىرىسىپ كەتتى. ازىرگە جانىبەك پەن كازتالوۆ اۋداندارىنىڭ ەلدى مەكەندەرىنە جارىق بەرىلدى. بىراق, اۋا رايىنىڭ بىرقالىپتى بولماۋى جۇمىستى مەرزىمىندە بىتىرۋگە كەدەرگى كەلتىرىپ تۇر. ايتسە دە, ءبىز بار مۇمكىندىكتى جاسايمىز», - دەيدى «باتىس قازاقستان ەجتك» اق ديرەكتورىنىڭ ءبىرىنشى ورىنباسارى مارات جۇماعاليەۆ.
مۇنداي جاعداي جەرگىلىكتى وڭىردە بىلتىر دا تىركەلگەن ەكەن. كەلەڭسىزدىكتىڭ تاعى قايتالانعانى كوپشىلىكتىڭ اشۋ-ىزاسىن تۋعىزدى. جاۋاپتى تۇلعالار جاقىن ارادا ماسەلەنىڭ بىرجاقتى شەشىلەتىنىنە ۋادە بەردى.
باقىتبەك كەنەش ۇلى.
دەرەككوز: «استانا» تەلەارناسى
فوتو: Elektroas.ru