قاراپايىم حالىققا ارنالعان ۇسىنىستار ايتىلدى

پرەزيدەنت اۋىلدارداعى تۇرعىن ءۇي قۇرىلىسىنىڭ كولەمىن ۇلعايتۋ ماسەلەسىن كوتەردى. بۇل ۇيلەر ەڭ الدىمەن اۋىل مۇعالىمدەرى, دارىگەرلەرى جانە اۋىلدىڭ الەۋمەتتىك سالاسىنىڭ باسقا دا قىزمەتكەرلەرىنە ارنالماق.

مەملەكەت باسشىسى ەكونوميكا تۋ­رالى ايتا كەلىپ, وڭىرلىك الەۋمەتتىك-كاسىپكەرلىك كورپوراتسيالار اي­ماق­تاردىڭ ءال-اۋقاتىن دامىتۋدىڭ تەتىك­تەرىنە اينالۋى ءتيىس ەكەنىن, سول ءۇشىن ولار كاسىپكەرلەرمەن باسەكەلەس بولماۋى كەرەكتىگىن دە ەسكەرتتى. القالى جيىندا «جاسىل ەكونوميكاعا» كوشۋدىڭ, بالامالى ەنەرگەتيكانى ەنگىزۋدىڭ ماڭىزدىلىعى دا كەڭىنەن ءسوز بولدى.

كادرلاردى دايارلاۋدى دامىتۋ ماسە­لەلەرىنە قاتىستى كوزقاراسىن بىلدىرگەندە قاسىم-جومارت كەمەل ۇلى الەمدى ابىگەرگە سال­عان پاندەميانىڭ ءبىلىم بەرۋ جانە دەن­ساۋلىق ساقتاۋ سالالارىندا كادر دايار­لاۋعا باسقاشا باعىت قاجەتتىگىن اتاپ ءوتتى.

سونداي-اق مەملەكەت باسشىسى وسى ماماندىقتار بويىنشا وقيتىن ستۋدەنتتەردىڭ ستيپەنديالارىن, مۇ­عا­لىمدەر مەن دارىگەرلەردىڭ جالاقىسىن كو­تەرۋدىڭ ماڭىزدىلىعىن اشىپ كورسەتتى.

مەملەكەت باسشىسىنىڭ قارا­پايىم حالىقتىڭ قامى ءۇشىن جاساعان تاعى ءبىر قادامى – ۇكىمەتكە جانە اكىم­دەرگە مۇمكىندىگى شەكتەۋلى جاندار­دىڭ جايلى ءومىر ءسۇرۋى ءۇشىن بارلىق قاجەتتى جاعدايدى جاساۋدى, ولار­عا عيماراتتار مەن كولىكتىڭ قولجەتىم­دىلىگىن قامتاماسىز ەتۋدى تاپسىرۋى بولدى. كەڭەستە پرەزيدەنت ايەلدەرگە قارسى تۇرمىستىق زورلىق-زومبىلىق پەن قۇمار ويىندارعا قارسى كۇرەستى كۇشەيتۋ ماسەلەسىنە دە ەرەكشە دەن قويىپ, ادام قۇقىن قورعاۋدا ەرەكشە رولگە يە ادۆوكاتۋرا سالاسىنىڭ كۇشەيۋىنە ەرەكشە توقتالدى.

ۇلتتىق كەڭەستىڭ وسى وتىرىسىندا ايتىلعان ۇسىنىستار ەلىمىزدەگى سايا­سي رەفورمالارعا دا تىڭ سەرپىلىس بولارى ءسوزسىز. سەبەبى القالى باسقوسۋدا جەرگىلىكتى ءوزىن-ءوزى باسقارۋدى دامىتۋ جونىندەگى جۇمىستاردىڭ جاڭا قارقىن الاتىنى ايتىلدى. اۋىل جانە اۋىلدىق وكرۋگ اكىمدەرىن سايلاۋدىڭ 2021 جىلدىڭ تامىز-جەلتوقسان, ال اۋدان اكىمدەرىن سايلاۋدىڭ 2024 جىلعا بەلگىلەنگەنى الدىمىزدا اۋقىمدى ءىس-شارالار اتقارىلاتىنىن اڭعارتادى.

پرەزيدەنت اۋىل شارۋاشىلىعى ماقساتىنداعى جەرلەردى شەتەلدىك ازاماتتار مەن شەتەلدىك قاتىسۋى بار زاڭدى تۇلعالارعا ساتۋ جانە جالعا بەرۋ ماسەلەلەرىنە تۇپكىلىكتى نۇكتە قويدى. جيىندا مەملەكەت باس­شىسى وسى جىلدىڭ 25 ناۋرىزىندا جۇمىسىن باستايتىن جەر كوميسسيا­سىن قۇرۋدى تاپسىردى. بۇل كوميس­سيا جەر ماسەلەلەرىن زاڭنامالىق رەتتەۋ بويىنشا بارلىق ۇسىنىستار­دى تىڭعىلىقتى زەردەلەپ, ازىر­لەيتىن ورگان بولماق. كەڭەستە ەل دا­مۋى­نىڭ الەۋمەتتىك-ەكونوميكالىق ماسە­لە­لەرىنىڭ وتكىر ءارى اشىق تالقىلانعانى كەڭەس مۇشەلەرى ءۇشىن دە, قاراپايىم حالىق مۇددەسى ءۇشىن دە وتە قاجەتتى.

تولەۋتاي راقىمبەكوۆ,

«ۇلتتىق اگرارلىق عىلىمي-ءبىلىم بەرۋ ورتالىعى» كەاق باسقارما توراعاسى, ۇلتتىق قوعامدىق سەنىم كەڭەسىنىڭ مۇشەسى