ىشكى ىستەر ءمينيسترى بويجەتكەندى بۇزاقىلاردان قۇتقارعان ۇلاندىقتى ماراپاتتادى

ۆەدومستۆو باسشىسى اتىنان ماراپاتتى اسكەري قىزمەتكەرگە ۇلتتىق ۇلاننىڭ «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امريەۆ تابىس ەتتى. ول ءوز سوزىندە سىن ساعاتتا قايسارلىق تانىتقان ارتەمعا العىسىن ءبىلدىرىپ, جاۋىنگەردىڭ جەدەل ءارى باتىل ارەكەتتەرىنىڭ ارقاسىندا جاس قىزدىڭ ءومىرى قۇتقارىلعانىن العا تارتتى.

«ارتەمنىڭ باتىل ارەكەتى ءار قازاقستاندىققا, اسىرەسە, ونىڭ ارىپتەستەرىنە ۇلگى بولارلىق ءىس. جاۋىنگەر ەڭبەك دەمالىسىندا جۇرگەنىنە قاراماستان, ءبىر ساتكە دە ازاماتتىق ءارى كاسىبي پارىزى تۋرالى ۇمىتقان جوق. وكىنىشكە قاراي, ۇلتتىق ۇلان جاۋىنگەرلەرى قىزمەت بارىسىندا مۇنداي وقيعالارمەن ءجيى قاقتىعىسادى. ءوز ومىرلەرىنە تونگەن قاۋىپتەرگە قاراماستان جاۋىنگەرلەر مۇدىرمەي, ازاماتتاردى ءتۇرلى جاعدايلاردان قۇتقارىپ جاتادى. بۇل – ولاردىڭ قىزمەتتىك پارىزى, اسكەري انتتارىنا دەگەن ادالدىقتىڭ بەلگىسى», دەدى تالاپكەر قىدىر ۇلى.

شىمكەنت قالاسى پوليتسيا دەپارتامەنتىنىڭ باسشىلىعى دا ساربازدىڭ ەرلىگىن ەلەپ, ونى گراموتامەن ماراپاتتادى.

ەستەرىڭىزگە سالا كەتسەك, وقيعا اقپاننىڭ 13-ءى كۇنى ساعات 00.40 شاماسىندا شىمكەنت قالاسىندا ورىن الدى. ۇيىنە كەلە جاتقان ارتەم قاتتى ايقايلاپ كومەككە شاقىرعان ايەل ادامنىڭ داۋىسىن ەستىپ, ويلانباستان سول جاققا قاراي ۇمتىلادى. ەڭگەزەردەي ەكى ەر ادامنىڭ جاس قىزعا كۇش كورسەتىپ, زورلاۋعا ارەكەت جاساپ جاتقانىن بايقاعان جاۋىنگەر بىردەن ولارمەن ارپالىسا كەتەدى. بۇزاقىلاردىڭ بىرەۋىن شەتكە لاقتىرىپ تاستاپ, ەكىنشىسىمەن توبەلەسە جونەلەدى. جەكپە-جەك ۇرىس تاسىلدەرىن قولدانا وتىرىپ, بىرەۋىن جەرگە قۇلاتىپ, ۇستىنەن باسىپ وتىرادى, ال ەكىنشىسى سول مەزەتتە وقيعا ورنىنان قاشىپ ۇلگەرەدى.

ۇستالعان ازاماتتى وقيعا ورنىنان پوليتسيا قىزمەتكەرلەرى الىپ كەتىپ, شىمكەنت قالاسىنىڭ ەڭبەكشى اۋداندىق پوليتسيا باسقارماسىنا جەتكىزدى. كۇدىكتىلەرلى ۇستاۋ كەزىندە ۇلاندىق قولىن جاراقاتتاپ الادى. كەيىن بەلگىلى بولعانداي, ارتەم قولىن سىندىرىپ العان ەكەن. بىراق سوعان قاراماستان, جاۋىنگەر پوليتسيا قىزمەتكەرلەرى كەلگەنشە بۇزاقىنى جىبەرمەگەن.

قازىرگى تاڭدا بۇل ءىس بويىنشا قىلمىستىق ءىس قوزعالدى. ەكىنشى كۇدىكتى اقپاننىڭ 21-ءى كۇنى جەدەل-ىزدەستىرۋ شارالارى كەزىندە ۇستالىپ, ءوز كىناسىن مويىندادى.

قاتارداعى ارتەم كالاشنيكوۆ ۇلتتىق ۇلاننىڭ اسكەري بولىمدەرى قامقورلىق جاسايتىن «جاس بۇركىت» اسكەري-پاتريوتتىق كلۋبىنىڭ تاربيەلەنۋشىسى بولىپ تابىلادى. قازاقستان ينجەنەرلىك-پەداگوگيكالىق ۋنيۆەرسيتەتىن تامامداعان. 2017 جىلى وتان الدىنداعى اسكەري بورىشىن وتەپ, كەيىن ۇلتتىق ۇلان قاتارىنا كەلىسىمشارت بويىنشا قىزمەتكە ورنالاسقان. بۇگىنگى تاڭدا شىمكەنتتەگى 6506 اسكەري بولىمىندە اسكەري جاساق باستىعى لاۋازىمىندا قىزمەت ەتىپ, قالا كوشەلەرىندە قوعامدىق ءتارتىپ پەن قاۋىپسىزدىكتى قامتاماسىز ەتىپ كەلەدى.

جاۋىنگەر ءوزىنىڭ بويجەتكەنگە جاساعان كومەگىن ەرلىك دەپ ساناماي, بۇل ونىڭ قازىرگى قىزمەتتەگى تىكەلەي مىندەتى ەكەنىن العا تارتىپ وتىر.