شىمكەنت قالاسىنىڭ اكىمى مۇرات ايتەنوۆ ليتۆا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى گينتاۋتاس ۆاسيۋليس, ليتۆا رەسپۋبليكاسىنىڭ قازاقستانداعى ەلشىلىگىنىڭ ترانسپورت سالاسى بويىنشا اتتاشەسى گيتاۋتاس يۋندزيلامەن كەزدەستى.
كەزدەسۋدە تاراپتار ىسكەرلىك بايلانىستار جانە ىنتىماقتاستىقتى دامىتۋ ماسەلەلەرى جونىندە اڭگىمەلەستى. ليتۆانىڭ قازاقستانمەن ساۋدا-ەكونوميكالىق جانە مادەني-گۋمانيتارلىق بايلانىستارى ارتىپ كەلەدى. 1992 جىلدان باستاپ ەكى ەل اراسىندا ديپلوماتيالىق قاتىناستار ورنادى. ليتۆا – قازاقستاننىڭ ءىرى ساۋدا سەرىكتەستەرىنىڭ ءبىرى.
قالا اكىمى قۇرمەتتى قوناقتاردى الدىمەن ليتۆا حالقىنىڭ وتكەن ماڭىزدى مەرەكەسى – ليتۆا مەملەكەتتىلىگىنىڭ قالپىنا كەلۋ كۇنىمەن (16 اقپان) قۇتتىقتادى. مۇرات دۇيسەنبەك ۇلى شىمكەنت رەسپۋبليكالىق ماڭىزى بار قالا مارتەبەسىنە ساي دامىپ كەلە جاتقانىن, ينۆەستيتسياعا قولايلى ورتا قالىپتاسقانىن اتاپ ءوتتى. قالا اكىمى جاڭا يندۋستريالىق جانە اگروونەركاسىپتىك ايماقتاردىڭ اشىلىپ جاتقانىن ايتا كەلە, ليتۆالىق كومپانيالاردى بىرلەسكەن جوبالاردى جۇزەگە اسىرۋعا شاقىردى.
– شىمكەنتتە سوڭعى جىلدارى بيزنەس جۇرگىزۋ شىعىندارىن ازايتۋ, اكىمشىلىك پروتسەدۋرالاردى جەڭىلدەتۋ, سالىق جانە تاريفتىك جوسپارلاردى جاقسارتۋ بويىنشا كەشەندى شارالار جۇزەگە اسىرىلۋدا. شاھاردا قولايلى ينۆەستيتسيا جانە جوبالاردى جۇزەگە اسىرۋ ءۇشىن بارلىق جاعدايلار جاسالعان. ءبىزدىڭ باستى ماقساتىمىز – قالانى ادامداردىڭ ومىرىنە جانە بيزنەس جۇرگىزۋگە ىڭعايلى باعىتتا دامىتۋ. بۇل باعىتتا ءبىز ينۆەستيتسيالىق قوعامداستىقتارمەن ىنتىماقتاستىقتى دامىتۋعا دايىنبىز. ليتۆالىق كومپانيالاردى ءتۇرلى سالالاردا – تۋريزم, ونەركاسىپ جانە اۋىلشارۋاشىلىق سەكتورى, كولىك جانە لوگيستيكا, ءوندىرىس, اقپاراتتىق تەحنولوگيالار, ماشينا جاساۋ باعىتتاردا ينۆەستيتسيا سالۋعا شاقىرامىن, - دەدى قالا اكىمى.
شاھار باسشىسى قالانى دامىتۋداعى ىنتىماقتاستىقتىڭ وزەكتى ماسەلەلەرى بويىنشا اشىق جانە سىندارلى ديالوگقا دايىن ەكەنىن مالىمدەدى. سونداي-اق كاسىپكەرلەر پالاتاسىندا ليتۆالىق قوناقتاردىڭ شىمكەنتتىك كاسىپكەرلەرمەن كەزدەسۋى جوسپارلانعان.