ءاربىر بالا باقىتتى ءومىر سۇرۋگە لايىقتى. الاڭسىز ويىن ويناپ, ءتۇرلى ۇيىرمەلەرگە قاتىسىپ, قوعاممەن ارالاسىپ وسكەن بالا تەز شيرىعادى. وكىنىشكە قاراي, بارلىق اتا-انانىڭ بىردەي پەرزەنتىنە مۇنداي مۇمكىندىك سىيلاۋعا شاماسى جەتە بەرمەيتىنى تاعى راس. ءبىر قۋانتارلىعى, قايىرىمدى جانداردىڭ قامقورلىعىمەن ارا-تۇرا اشىلىپ جاتقان الەۋمەتتىك ورتالىقتار كوپتەگەن وتباسىعا جىلىلىق سىيلاپ وتىر.
الماتىدا «شىڭعا ورلەۋ» دەپ اتالعان الەۋمەتتىك كلۋب ءوز جۇمىسىن باستادى. قالانىڭ تۇركسىب اۋدانىندا ورنالاسقان شاعىن ورتالىقتا از قامتىلعان جانە كوپ بالالى وتباسىلاردىڭ بالالارى قوسىمشا ءبىلىم الىپ, ءتۇرلى شىعارماشىلىق ۇيىرمەلەرگە تەگىن قاتىسا الادى. باستاۋىش مەكتەپ جاسىنداعى 240 ورەنگە شاقتاپ اشىلعان شىعارماشىلىق ۇيىندە شاحمات, مۋزىكا, بي, بەينەلەۋ ونەرى ۇيىرمەلەرى جۇمىس ىستەيدى. ەڭ قىزىعى, مۇندا كەلگەن بالدىرعاندارعا 35-40 جىلدىق ەڭبەك ءوتىلى بار زەينەت جاسىنداعى بىلىكتى مۇعالىمدەر ءتالىم بەرەدى.
– ءبىز ەڭ الدىمەن بالالاردىڭ ارمان-تىلەگىن ورىنداپ, شىعارماشىلىق قالاۋلارىن جۇزەگە اسىرۋعا كومەكتەسەمىز. بالانىڭ ويلاۋى ويناۋ ارقىلى قالىپتاسادى. بىلىكتى ماماندار ءار بالامەن جەكە-دارا سويلەسىپ, وي بولىسەدى. ءبىز ادەيى ومىرلىك تاجىريبەسى باي قارت ۇستازداردى تاڭداپ الدىق. ولار بالالارمەن ءوز اتا-اجەسى سەكىلدى سىرلاسادى, بالا جانىن جاقسى تۇسىنەدى. الەۋمەتتىك جوبانىڭ ماقساتى – بالالارعا ۇلتتىق تانىمعا ساي تاربيە بەرۋ ءارى جاعدايى تومەن وتباسىلاردىڭ بالالارىن قولداۋ, – دەيدى «شىڭعا ورلەۋ» الەۋمەتتىك كلۋبىنىڭ ديرەكتورى شوقان بولاتبەكوۆ.
يگى باستامانىڭ قانات قاعۋىنا اۋدان اكىمدىگى مەن ءماسليحات دەپۋتاتتارى, سونداي-اق جانى جومارت ازاماتتار قولداۋ كورسەتكەن. مۇنداي ورتالىقتار بۇگىندە الماتى قالاسىنىڭ التى اۋدانىندا جۇمىس ىستەيدى. «بەرسەڭ, بالاعا بەر» دەگەن. الداعى ۋاقىتتا دا بالدىرعاندارعا قۋانىش سىيلايتىن يگى جوبالاردىڭ قاتارى كوبەيە بەرسە قۇبا-قۇپ.
الماتى