جاڭا كوپسالالى اۋرۋحانا وبلىس ورتالىعىنىڭ «دوستىق» مولتەك اۋدانىندا سالىنا باستايدى, دەپ حابارلايدى Egemen.kz Pavlodarnews.kz سايتىنا سىلتەمە جاساپ.
بۇل تۋرالى جاڭالىقتى وبلىس اكىمى ابىلقايىر سقاقوۆ تۇرعىندارمەن ەسەپتىك كەزدەسۋدە جاريا ەتتى. جاڭا اۋرۋحانا 500 ورىن ناۋقاستى قابىلداي الاتىنداي ەتىلىپ سالىنادى. مۇنداي ءىرى مەدمەكەمەلەر وبلىسىمىزدا كەڭەستىك كەزەڭنەن بەرى بوي كوتەرمەگەن.سونداي-اق باسقا دا مەديتسينا ورتالىقتارىن دامىتۋ جالعاسىن تاپپاق. ماسەلەن, 1-قالالىق اۋرۋحانا ءارى قاراي جەتىلدىرىلمەك. مۇندا گيبريدتىك وتا جاساۋ بولمەلەرى سەكىلدى زاماناۋي جابدىقتار ورناتىلماق. ەكىباستۇزدا قالالىق اۋرۋحانانىڭ ينفەكتسيالىق ءبولىمىن دامىتۋ كوزدەلۋدە. قولعا الىناتىن ءىس-شارالار ونىمەن شەكتەلمەيدى.
– كارديولوگيالىق ورتالىقتى تولىققاندى كارديوحيرۋرگيالىق ورتالىق دەڭگەيىنە جەتكىزبەكپىز. جەرلەستەرىمىز ايلاپ كەزەك كۇتىپ وتىرماۋلارى ءتيىس. ءبىزدىڭ مىندەت – كەزەك كۇتۋدىڭ ۋاقىتىن بارىنشا قىسقارتىپ, بارلىق كومەكتى ءبىر جەردەن كورسەتۋگە قول جەتكىزۋ, – دەيدى ابىلقايىر سقاقوۆ.
وسى اتالعان ءىس-شارالاردىڭ بارلىعى مەديتسينالىق كادرلار سالاسىن دامىتۋدى, بىلىكتى كادرلارمەن قامتۋ ماسەلەسىن كۇشەيتۋدى تالاپ ەتەدى. ابىلقايىر سقاقوۆ دەنساۋلىق ساقتاۋ باسقارماسىنا وسى باعىتتى قاتاڭ باقىلاۋعا الۋدى بۇيىردى.بىلتىر پاۆلودار وبلىسى جەدەل جاردەم قىزمەتى قازاقستاندا ۇزدىك دەپ تانىلىپ, ونىڭ اۆتوپاركى تۇگەلدەي جاڭارتىلدى. شالعايداعى اۋداندارعا بىرەگەي جىلجىمالى مەدكەشەندەر جونەلتىلىپ, وڭىرگە «س» ساناتىنداعى «Hyundai H350» رەانيموبيلدەرى كەلدى. 2020 جىلى پاۆلوداردا قىسقا مەرزىم ىشىندە جاڭا مودۋلدىك ينفەكتسيالىق ورتالىق اشىلدى. 1-قالالىق اۋرۋحانا كەڭەيتىلىپ, قابىلداۋ ءبولىمىنىڭ اۋدانى ۇلعايدى.