بۇگىندە جامبىلدىق تۇرعىنداردى قانداي ماسەلە تولعاندىرادى؟ بۇقارا مەن بيلىكتىڭ اراسىندا بايلانىس قانشالىقتى؟ بەرىلگەن ۋادە ورىندالىپ جاتىر ما؟ جامبىل وبلىسىنىڭ اكىمى بەردىبەك ساپارباەۆ وتكەن جىلدى قورىتىندىلاپ, حالىق الدىندا ەسەپ بەردى. ونلاين-رەجيمدە وتكەن جيىنعا تاراز قالاسىنان جانە وڭىردەگى اۋدان, اۋىلدارداعى تۇرعىندار تاراپىنان كوپتەگەن سۇراق ءتۇستى.
جيىندا نەگىزىنەن جەرگىلىكتى جۇرتشىلىقتى جەر, پاتەر الۋ, كاسىپكەرلىكپەن اينالىسۋ ءۇشىن مەملەكەتتەن نەسيە الۋ سياقتى ماسەلەلەر تولعاندىرادى ەكەن. سونىمەن قاتار, جەرگىلىكتى جۇرتشىلىق اكىمگە ءتۇرلى ماسەلەلەر بويىنشا دا سۇراقتارىن قويدى. ماسەلەن, تاراز قالاسىنىڭ تۇرعىنى نۇرقاسىم جۇماەۆ وبلىس ورتالىعىنا قارايتىن ء«شولدالا» شاعىناۋدانىنىڭ جارىق, سۋ, جول ماسەلەلەرىن كوتەردى. بەردىبەك ساپارباەۆ بۇل ۇلكەن ماسەلە ەكەنىن, ول ماسەلەنىڭ ءبارىن شەشۋ ءۇشىن 2 ميلليارد تەڭگەدەن استام قارجى كەرەك ەكەندىگىن, الايدا ماسەلە شەشىمىن تاباتىنىن جەتكىزدى. سونداي-اق, تاراز قالاسىنىڭ تۇرعىنى قۇرالاي سابيەۆانىڭ «قالاداعى «بارىسحان» القابىنان مەكتەپ سالۋعا كومەك بەرسەڭىز», دەگەن وتىنىشىنە بەردىبەك ساپارباەۆ بيىلعى جىلى تاراز قالاسىنىڭ وزىندە ءبىراز ءبىلىم وشاعىنىڭ سالىناتىنىن, الايدا «بارىسحان» القابىنداعى سالىنۋى ءتيىس مەكتەپتىڭ قۇجاتى تىم قىمباتقا تۇسكەنىن, ونى قايتارىپ بەرگەنىن ايتتى.
اۋدان تۇرعىندارى دا بەينەبايلانىس ارقىلى وبلىس اكىمىنە ءوز ساۋالدارىن جولدادى. تالاس اۋدانى, قاراتاۋ قالاسىنان اياگوز جاڭاتاي اتالعان قالاداعى كوپ عيماراتتاردىڭ جوندەۋ كورمەي قاڭىراپ تۇرعانىن, الايدا باسپاناعا مۇقتاج ادامدار وتە كوپ ەكەنىن جەتكىزدى. بۇل ورايدا, بەردىبەك ساپارباەۆ بۇل ماسەلەنى شەشۋ ءۇشىن ءتيىستى جۇمىستار جۇرگىزىلىپ جاتقانىن, اۋدان اكىمىنە تاپسىرما بەرىلگەنىن مالىمدەدى. ال, مويىنقۇم اۋدانى, قىلىشباي اۋىلىنىڭ تۇرعىنى ەركىن سابىرالى ۇلى اۋىلداعى اۋىزسۋ, گاز ماسەلەسىن كوتەردى. «وبلىستاعى جالعىز عانا مويىنقۇم اۋدانىندا گاز جوق. سول سەبەپتى, شۋ اۋدانىنان مويىنقۇم اۋدانىنا گاز تارتۋ كەرەك», دەدى بەردىبەك ساپارباەۆ. سونداي-اق, اۋىزسۋ ماسەلەسىنە وراي, ءتيىستى باسشىلارعا تاپسىرما بەرىلەتىنىن ايتتى. سونىمەن قاتار, شۋ اۋدانى, تولە بي اۋىلىنىڭ تۇرعىنى الىمقۇل بەردانوۆ اتالعان اۋىلدا گاز كىرگىزۋ قۇنىنىڭ تىم قىمبات ەكەنىن, ءتىپتى 500 مىڭ تەڭگەنىڭ ۇستىنە شىعىپ كەتكەنىن ايتىپ شاعىمداندى. بۇل ورايدا, بەردىبەك ساپارباەۆ اۋدان ورتالىعى تولە بي اۋىلىنداعى جاعدايدىڭ زەردەلەنگەنىن, شىنىمەن دە باعانىڭ شارىقتاپ كەتكەنىن ايتىپ, ماسەلەنىڭ وڭ شەشىمىن تاباتىنىنا سەندىردى. جيىندا وزگە دە تۇرعىندار اكىمگە كوكەيدە جۇرگەن سۇراقتارىن قويىپ, جاۋاپ الدى.
جامبىل وبلىسى