جامبىل وبلىسىنداعى ەلدىمەكەندەر مەن شارۋاشىلىق نىساندارىن سۋ باسۋ قاۋپى شۋ, تالاس جانە اسا وزەندەرىندەگى سۋ دەڭگەيىنىڭ كوتەرىلۋى سالدارىنان بولۋى مۇمكىن. سونداي-اق, تاۋ بوكتەرىندەگى ەرىگەن قار جانە جاڭبىر سۋلارى دا حالىق شوعىرلانعان اۋىلدارعا قاۋىپتى. جامبىل وبلىستىق توتەنشە جاعدايلار دەپارتامەنتى باستىعىنىڭ ورىنباسارى ەرالى اقىلبەكوۆتىڭ ايتۋىنشا, وڭىردە كوكتەمگى مەزگىلدە سۋ باسۋى مۇمكىن 38 ەلدىمەكەن بار ەكەن. ولار سۋ قويمالارىنداعى سۋ دەڭگەيىنىڭ كوتەرىلۋىنەن جانە تاۋ بوكتەرىندە ەرىگەن قار سۋى نەمەسە نوسەرلى جاڭبىر سەبەبىنەن بولماق.
«وبلىس كولەمىندە 156 گيدروتەحنيكالىق قۇرىلىس نىساندارى ورنالاسقان. ونىڭ ىشىندە رەسپۋبليكالىق مەنشىكتە 41, جەكە مەنشىكتە 9 نىسان بار. «2017-2020 جىلدارعا ارنالعان سۋ تاسقىنىنىڭ الدىن الۋ جانە جويۋ جونىندەگى ءىس-شارالار كەشەنى» جول كارتاسىنا سايكەس جۇرگىزىلگەن جۇمىستار ناتيجەسىندە 6 ەلدىمەكەندە سۋ باسۋ قاۋپى تومەندەدى. ولاردىڭ قاتارىندا جامبىل اۋدانىنىڭ جاسوركەن, قىزىلقاينار, بايزاق اۋدانىنىڭ سارىكەمەر, «دەنساۋلىق» ساياجايى, تالاس اۋدانىنىڭ اقكول جانە ءۇشارال اۋىلدارى بار», دەدى ەرالى اقىلبەكوۆ. سونىمەن قاتار, تاراز قالاسىنداعى, جامبىل جانە بايزاق اۋداندارىنداعى ەلدىمەكەندەرىندە سۋ باسۋ قاۋپىنىڭ الدىن الۋ ءۇشىن تالاس وزەنىندە جاعالاۋدى نىعايتۋ جۇمىستارىن جۇرگىزۋگە رەسپۋبليكالىق بيۋدجەتتەن قاراجات بولىنبەۋىنە بايلانىستى ورىندالماعان. ونىڭ جالپى ۇزىندىعى 25,4 شاقىرىمدى قۇرايدى. سونداي-اق, جاعالاۋدى جوندەۋ جۇمىستارى «2021-2023 جىلدارعا ارنالعان سۋ تاسقىنىنىڭ الدىن الۋ جانە جويۋ جونىندەگى شارالار كەشەنى» جول كارتاسىنا ەنگىزىلگەن.