ۆلاديمير ۆولكوۆتىڭ توراعالىق ەتۋىمەن وتكەن كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ وتىرىسىندا ەلىمىزدىڭ قىلمىستىق-اتقارۋ جۇيەسىنىڭ قىزمەتىندەگى وزەكتى ماسەلەلەر تالقىلاندى.
سەنات كوميتەتىنىڭ توراعاسى ءوزىنىڭ كىرىسپە سوزىندە پەنيتەنتسيارلىق جۇيەدە سوڭعى جىلدارى بىرقاتار وڭ وزگەرىستەر بايقالىپ وتىرعانىن, سونىمەن قاتار ينفراقۇرىلىمدى دامىتۋعا, سوتتالعانداردى جۇمىسپەن قامتۋدى قامتاماسىز ەتۋگە جانە تۇرمەدەگى ءوندىرىستىڭ باسەكەگە قابىلەتتىلىگىنە, مەديتسينالىق قىزمەت كورسەتۋگە بايلانىستى بىرقاتار وزەكتى پروبلەمالار ءالى دە شەشىلمەي كەلە جاتقانىن اتاپ ءوتتى.
ەل پرەزيدەنتى "جاڭا جاعدايداعى قازاقستان: ءىس-قيمىل كەزەڭى" اتتى قازاقستان حالقىنا جولداۋىندا پەنيتەنتسيارلىق مەكەمەلەردە جاپپاي بەينەباقىلاۋ ورناتۋ قاجەتتىگىن اتاپ وتكەن بولاتىن. سەناتورلاردىڭ تالقىسىنا سالىنعان ماسەلەلەردىڭ ىشىندە وسى تاقىرىپ تا بولدى.
"ۇيىمداستىرۋشىلىق جانە زاڭنامالىق سيپاتتاعى قابىلدانىپ جاتقان جۇيەلى شارالار تۇرمەدەگىلەردىڭ سانىن ەداۋىر ازايتۋعا, جازالاردى ورىنداۋ جۇيەسىن ىزگىلەندىرۋ ءۇشىن قۇقىقتىق جاعدايلاردى قامتاماسىز ەتۋگە مۇمكىندىك بەردى", - دەدى ىشكى ىستەر ءمينيسترى ە.تۇرعىمباەۆ.
بۇگىنگى تاڭدا 64 تۇزەۋ مەكەمەسىندە 25 827 سوتتالعان جازاسىن وتەپ جاتىر, 16 تەرگەۋ يزولياتورىندا 5 805 ادام قاماۋدا وتىر.
تۇرمەدەگىلەر سانىنىڭ كوپ بولۋىنا بايلانىستى قازاقستان الەمدەگى تۇرمە رەيتينگى بويىنشا 100-ءشى ورىن الادى (تاۋەلسىزدىك قارساڭىندا قازاقستان 100 مىڭعا جۋىق تۇتقىن سانى بويىنشا اقش پەن رەسەيدەن كەيىن 3-ءشى ورىنعا شىققان بولاتىن).
كوميتەت دەپۋتاتتارى وتىرىس بارىسىندا ءىىم قىلمىستىق-اتقارۋ جۇيەسى كوميتەتىنىڭ توراعاسى ج.ەشماعامبەتوۆتىڭ ەلىمىزدەگى پەنيتەنتسيارلىق جۇيەنىڭ جاي-كۇيى تۋرالى بايانداماسىن تىڭدادى. قاجك باسشىسى ءوز سوزىندە پەنيتەنتسيارلىق ينفراقۇرىلىمدى جاڭعىرتۋ جانە جاڭا تۇرمەلەر سالۋ جونىندەگى قابىلدانىپ جاتقان شارالارعا قاراماستان كوپتەگەن تۇزەۋ مەكەمەلەرىندەگى توزىعى جەتكەن عيماراتتار مەن قۇرىلىستار ءالى دە پروبلەما بولىپ وتىرعانىن ايتا كەلىپ, ونى شەشۋ ءۇشىن بيۋدجەت قارجىسىن ءبولۋ قاجەت ەكەنىنە دەپۋتاتتاردىڭ نازارىن اۋداردى.
"قازىر كامەرادا ۇستايتىن 9 مەكەمە جۇمىس ىستەيدى, وندا 4 مىڭعا جۋىق سوتتالعاندار بار. جۇمىس ىستەپ تۇرعان قاج مەكەمەلەرىنىڭ نەگىزگى قورىندا وتكەن عاسىردىڭ 30-70-ءشى جىلدارىندا باراق ۇلگىسىندە سالىنعان عيماراتتار مەن قۇرىلىستار بولىپ وتىر. 42 تۇزەۋ مەكەمەسىن قايتا قۇرۋ قاجەت", - دەدى قاجك توراعاسى.
وتىرىسقا قاتىسۋشىلار, ونىڭ ىشىندە باس پروكۋراتۋرا مەن "ەڭبەك" رمك وكىلدەرى مەملەكەتتىك-جەكەشەلىك ارىپتەستىك اياسىندا جەكە ينۆەستورلاردىڭ قاراجاتىن تارتۋ, ونىڭ ىشىندە تۇزەۋ مەكەمەلەرىنىڭ وندىرىستىك الەۋەتىن دامىتۋ, جاپپاي بەينەباقىلاۋ ورناتۋ مۇمكىندىگىن قامتاماسىز ەتۋدى تالقىلادى. سونداي-اق سوتتالعانداردى جانە تەرگەۋ-قاماۋعا الىنعان ادامداردى مەديتسينالىق تۇرعىدا قامتاماسىز ەتۋ فۋنكتسيالارىن ىشكى ىستەر مينيسترلىگىنەن الىپ دەنساۋلىق ساقتاۋ مينيسترلىگىنىڭ قاراماعىنا كەزەڭ-كەزەڭىمەن بەرۋ ماسەلەسى دە تالقىلاۋدىڭ وزەكتى تاقىرىبى بولدى.
كوميتەت توراعاسى ۆلاديمير ۆولكوۆ وتىرىستى قورىتىندىلاي كەلىپ, قازاقستان بۇۇ-نىڭ ادام قۇقىقتارىن قورعاۋ سالاسىنداعى بىرقاتار حالىقارالىق قۇجاتتارىنا قوسىلعانىن, وسى تۇرعىدا تۇتقىنداردى ۇستاۋ جاعدايلارىن قارىم-قاتىناستىڭ ەڭ تومەنگى ستاندارتتارىنا جاقىنداتۋ جونىندە قابىلدانعان مىندەتتەمەلەردىڭ ورىندالۋىن قامتاماسىز ەتۋ اسا ماڭىزدى ەكەنىن اتاپ ءوتتى. ودان باسقا, ۇستاۋ جاعدايلارىن قامتاماسىز ەتۋ, سوتتالعانداردىڭ نەگىزگى قۇقىقتارى مەن بوستاندىقتارىن ساقتاۋ, ولاردى ەڭبەكپەن جانە سۇرانىسقا يە كاسىبي داعدىلارمەن قامتاماسىز ەتۋ ەركىندىككە شىققان ازاماتتارعا بوساتىلعاننان كەيىن قوعامعا قايتادان تولىققاندى كىرىگۋگە مۇمكىندىك بەرەدى.
وتىرىس ناتيجەسى بويىنشا قورىتىندى دايىندالدى, ول ۇكىمەت پەن مەملەكەتتىك ورگاندارعا جىبەرىلەتىن بولادى.