ءىستىڭ كوزىن تاپقان شارۋالار برويلەر ەتىن وندىرۋگە بەت بۇرىپ وتىر. اسىرەسە, بۇعان اۋدانداردا ۇمتىلىس بايقالادى. ماسەلەن, ەكى جىل بۇرىن قۇرمانعازى اۋدانىندا «بۇيىرعىن» اۋىل شارۋاشىلىعى كووپەراتيۆى برويلەر ەتىن وندىرەتىن قۇس فەرماسىن ىسكە قوسقان ەدى. فەرمانىڭ قۋاتى – جىلىنا 312 توننا ەت ءوندىرۋ.
– قۇس فەرماسى زاماناۋي تەحنولوگيالارمەن قايتا جابدىقتالدى. بىلتىر مۇندا 79 توننا قۇس ەتى ءوندىرىلدى, – دەيدى اۋدان اكىمى قايرات نۇرتاەۆ.
بۇل كووپەراتيۆ قولعا العان جوبانى جەرگىلىكتى ەكى كاسىپكەر قارجىلاندىرىپ وتىر. ولار 2018 جىلدان بەرى قۇس فابريكاسىنىڭ جوباسىنا 300 ملن تەڭگە ينۆەستيتسيا سالدى. ال قۇس فەرماسى اۋدان ورتالىعىنان بەس شاقىرىم قاشىقتاعى «بۇيىرعىن» اتالاتىن جەردە ورنالاسقان. باستاپقىدا مۇندا جۇمىسشىلارعا ارنايى جاتاقحانا مەن اسحانا, 3 وندىرىستىك نىسان بوي كوتەردى. كەيىن ءتورتىنشى نىساننىڭ قۇرىلىسى جانداندى.
– قۇس جەمىن ۋفادان ساتىپ الامىز. قازىر 500-600 گرامم سالماقتاعى بالاپان ءوسىرۋ جولعا قويىلدى. سونداي-اق, سالماعى 1,5 كيلولىق تاۋىق پەن 3,5 كيلو بولاتىن برويلەر ەتىن ءوندىرۋدى جالعاستىرۋدامىز, – دەيدى «بۇيىرعىن» وندىرىستىك كووپەراتيۆىنىڭ باسشىسى گۇلنار ومارعاليەۆا.
ونىڭ ايتۋىنشا, كووپەراتيۆتە ۆاحتالىق اۋىسىممەن 40-تان استام جەرگىلىكتى تۇرعىن جۇمىس ىستەۋگە تارتىلىپ وتىر. مەملەكەت تاراپىنان جوباعا سالىنعان ينۆەستيتسيالىق قارجىنىڭ 25 پايىزى كولەمىندە سۋبسيديا بەرىلەدى. سونداي-اق, اگروسەكتوردى قارجىلاندىرۋ جۇيەسىمەن جىلدىق ءوسىمى 8 پايىز قۇرايتىن نەسيە الىپتى. جوبا قۇرىلتايشىلارى ءوز قاراجاتى ەسەبىنەن گاز بەن ەلەكتر جەلىلەرىن جۇرگىزىپ بەردى.
وسىنداي جوبانىڭ تاعى ءبىرى ماحامبەت اۋدانىندا ىسكە قوسىلادى دەگەلى ءبىراز جىلدىڭ ءجۇزى اۋدى. اۋدان اكىمىنىڭ ورىنباسارى زۇلحارناي مۇقاشتىڭ مالىمەتىنشە, بيىل وسى جوبانى ىسكە قوسۋ كوزدەلىپ وتىر.
– اۋداندا يندۋستريالاندىرۋ كارتاسى اياسىندا بىرنەشە جوبانى ىسكە قوسۋ جوسپارلاندى. سونىڭ ىشىندە بيىل جۇزەگە اساتىن «Meken Chiken» جشس-نىڭ «برويلەرلىك قۇس ەتىن ءوندىرۋ كەشەنىن سالۋ» جوباسى دا بار. جوبانىڭ قۇنى – 5,9 ملرد تەڭگە. بۇل جوبا ىسكە قوسىلعاندا 79 ادام جۇمىسپەن قامتىلادى. ال «جۇماعاليەۆا» شارۋا قوجالىعى جىلىجاي جوباسىن ىسكە قوسقالى وتىر. جىلىجاي جوباسىنىڭ قۇنى 1,2 ملرد تەڭگەنى قۇرايدى. جاڭا جىلىجايدا 40 ادام جۇمىسقا تارتىلاتىنى كوزدەلگەن. قازىر جىلىجايدىڭ قۇرىلىسى باستالدى. وعان 16 گەكتار جەر ۋچاسكەسى ءبولىندى, – دەيدى مۇقاش زۇلحارناي.
ونىڭ ايتۋىنشا, بىلتىر ماحامبەت اۋدانىندا يندۋستريالاندىرۋ كارتاسى اياسىندا ءتورت جوبا ىسكە قوسىلىپتى. ونىڭ ۇشەۋى ء«بىرىنشى مامىر» جشس-نا تيەسىلى بولىپ وتىر. بۇل سەرىكتەستىكتە ءسۇت ءوندىرۋ زاۋىتى, بيوگۋمۋس ءوندىرۋ كەشەنى مەن ءسۇت وڭدەۋ فەرماسىن كەڭەيتۋ جوبالارى جۇمىس ىستەي باستادى. سونداي-اق, «سارايشىق اتش» جشس ەشكى ءسۇتىن ءوندىرۋ فەرماسىن اشتى. اتالعان جوبالاردا اشىلعان جۇمىس ورىندارىنا 125 ادام تارتىلدى.
اتىراۋ وبلىسى