مەملەكەت باسشىسى قاسىم-جومارت توقاەۆ باس پروكۋراتۋرانىڭ باسشىلىق قۇرامىمەن وتكەن كەڭەستە بەيبىت جيىندار وتكىزۋ تۋرالى ايتتى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي جەلىدەگى پاراقشاسىندا جازدى, دەپ حابارلايدى Egemen.kz
«بىلتىردان باستاپ قازاقستاندا بەيبىت جيىندار وتكىزۋ تۋرالى مۇلدە جاڭا زاڭ كۇشىنە ەندى. ەگەر بۇرىن قولدانىستا بولعان زاڭدا رۇقسات الۋ پروتسەدۋراسى بولسا, جاڭا زاڭدا ميتينگ وتكىزۋ تۋرالى حابارلاسا جەتكىلىكتى. سونىمەن قاتار, ءىرى قالالاردىڭ ورتالىقتارىندا بەيبىت جيىندارعا, ونىڭ ىشىندە, نارازىلىق اكتسيالارىن وتكىزۋگە ارنايى ورىندار بەلگىلەنگەن. بۇل ءبىزدىڭ قوعامدى دەموكراتيالاندىرۋ جولىنداعى وتە ماڭىزدى قادام. بۇل ساياساتتى ءبىزدىڭ قوعامدا عانا ەمەس, شەتەلدەردە دە ءتۇسىندىرۋىمىز كەرەك. جيىن وتكىزگىسى كەلەتىندەر جاڭا زاڭعا باعىنۋعا مىندەتتى. ازاماتتاردىڭ بيلىككە قاتىستى ءوز ويىن ءبىلدىرۋ, سىني پىكىر ايتۋ قۇقىنان ەشكىم ايىرا المايدى. بۇل ولاردىڭ كونستيتۋتسيالىق قۇقىعى جانە ول قاتاڭ تۇردە زاڭ اياسىندا ورىندالۋى كەرەك», دەدى قر پرەزيدەنتى قاسىم-جومارت توقاەۆ.
ەسكە سالا كەتەيىك, كەشە مەملەكەت باسشىسى باس پروكۋراتۋرانىڭ باسشىلىق قۇرامىمەن كەڭەس وتكىزدى. وتكەن جىلى مامىر ايىندا پرەزيدەنت «بەيبىت جيىندار تۋرالى» جاڭا زاڭعا قول قويدى.