تۇركىستان وبلىسىندا ءۇش بىردەي بالانى قاعىپ كەتكەن جۇرگىزۋشى ىزدەستىرىلۋدە

14 اقپان تۇركىستان وبلىسى جەتىساي اۋدانىندا جاسى كامەلەتكە تولماعان بالالاردىڭ قاتىسۋىمەن جول-كولىك وقيعاسى ورىن الدى. ناقتىراق ايتار بولساق, اعىمداعى جىلدىڭ 14 اقپانىندا جەتىساي اۋداندىق پوليتسيا بولىمىنە اۋرۋحانادان ءتۇرلى دەنە جاراقاتتارىمەن ءۇش بىردەي كامەلەت جاسىنا تولماعان بالالاردىڭ جەتكىزىلگەنى تۋرالى حابارلاما كەلىپ تۇسەدى. اتالعان جايت بويىنشا پوليتسەيلەر بىردەن تەكسەرۋ جۇمىستارىن جۇرگىزدى.

وقيعا ورنىنا جەدەل جەتكەن پوليتسەيلەر سول كۇنى كەشكى ساعات 17:50 شاماسىندا جەتىساي اۋدانىنداعى س.ەرۋباەۆ كوشەسى بويىندا بەلگىسىز اۆتوكولىك وڭتۇستىكتەن سولتۇستىك باعىتىنا قاراي ءجۇرىپ بارا جاتىپ, ءۇش ءجاسوسپىرىم بالانى سوعىپ كەتىپ, جول كولىك وقيعاسىن جاساعانى انىقتالدى. ناتيجەسىندە ءۇش بالا دا اۋرۋحاناعا جەتكىزىلگەن. ياعني 16 جانە 13 جاس شاماسىنداعى بالالار ءتۇرلى دەنە جاراقاتتارىمەن ەم قابىلداسا, نەبارى ءتورت جاستاعى ءبۇلدىرشىن اۋىر دەنە جاراقاتىنىڭ سالدارىنان جانساقتاۋ بولىمىنە ءتۇسىپ, كوز جۇمدى.

اتالعان جايت جەتىساي اۋداندىق پوليتسيا بولىمىندە قر قك-ءنىڭ 345-بابى (كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋى) جانە كۇدىكتىنىڭ وقيعا ورنىن تاستاپ كەتكەنى ءۇشىن قر قك-ءنىڭ 347-بابى (جول-كولiك وقيعاسى بولعان جەردەن كەتىپ قالۋ) بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە تىركەلدى. بۇل قىلمىستى جەدەل اشۋ ماقساتىندا اۋدان پوليتسەيلەرى كۇدىكتىنى انىقتاۋعا قاتىستى جەدەل ىزدەستىرۋ جۇمىستارىن جۇرگىزۋدە.

بۇگىندە وقيعا ورنىن تياناقتى تەكسەرگەن ءتارتىپ ساقشىلارى سول ورىننان بەلگىسىز اۆتوكولىكتىڭ ارتقى جارىق شامدارىنىڭ سىنىقتارى مەن اينا سىنىقتارىن الدى. بۇل زاتتاردىڭ “اۋدي-100” ماركالى اۆتوكولىگىنە تيەسىلى جانە كولىكتىڭ ءتۇسى سۇر-قارا (موكرىي اسفالت) بولۋى ىقتيمال دەپ بولجانۋدا. سوندىقتان وسى بولجامعا سايكەس جەتىساي اۋدانىنداعى “اۋدي-100” ماركالى اۆتوكولىكتەر تىڭعىلىقتى تەكسەرىلۋدە. وسى تۇستا پوليتسەيلەر ەسكەرتەدى, وقيعا ورنىنان قانداي جاعداي بولسا دا قاشىپ كەتۋگە بولمايدى.

سونىمەن قاتار جول ەرەجەسىن مۇقيات ساقتاۋ ماڭىزدى. اتالعان جايتقا سايكەس ءسىز قانداي-دا ءبىر مالىمەت بىلسەڭىز نەمەسە وقيعانىڭ كۋاگەرى بولساڭىز پوليتسيانىڭ “102” نومىرىنە, نە بولماسا جەتىساي اپب-نىڭ كەزەكشىلىگىنە, 87253467020, سەنىم تەلەفونىنا, 6-70-07 حابارلاسىڭىز.