تۇرعىن ءۇي قۇرىلىسىندا بيىلدىڭ ءبىرىنشى ايىندا 801 مىڭ شارشى مەتر باسپانا پايدالانۋعا بەرىلدى, دەپ حابارلايدى Egemen.kz
بۇل تۋرالى ۇكىمەت وتىرىسىندا قاڭتار ايىنداعى ەلدىڭ الەۋمەتتىك-ەكونوميكالىق دامۋى تاقىرىبىن تالقىلاۋ كەزىندە قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ءمالىم ەتتى.
«قۇرىلىس سالاسىندا ناقتى كولەم يندەكسى 2021 جىلدىڭ قاڭتار ايىندا 107 پايىز بولدى. بارلىق وڭىردە وڭ ديناميكا بايقالادى. تۇرعىن ءۇي قۇرىلىسىندا بيىلدىڭ ءبىرىنشى ايىندا 801 مىڭ شارشى مەتر باسپانا پايدالانۋعا بەرىلدى. ياعني, 2020 جىلدىڭ سايكەس كەزەڭىمەن سالىستىرعاندا 109,4 پايىز بولدى», دەدى مينيستر.
ونىڭ ايتۋىنشا, ەلىمىز بويىنشا بارلىعى 6 810 باسپانا پايدالانۋعا بەرىلدى. بۇل كورسەتكىش 16 وڭىردە ارتتى.
«وتكەن جىلمەن سالىستىرعاندا تۇرعىن ءۇيدى پايدالانۋعا بەرۋ كولەمى 16 وڭىردە ارتتى. تەك ماڭعىستاۋ وبلىسىندا ءتيىستى كورسەتكىش 67,6 پايىزدى قۇرادى. جالپى بيىل ەلىمىزدە 17 ملن شارشى مەتر تۇرعىن ءۇي سالىنادى. مەملەكەت باسشىسىنىڭ تاپسىرماسىنا سايكەس تۇرعىن ءۇي قۇرىلىسى كەزىندە جەرگىلىكتى قامتۋ ۇلەسىن ارتتىرۋعا ءتيىسپىز. بۇل بيزنەس ءۇشىن قۇرىلىس ماتەريالدارىنىڭ وتاندىق نارىعىن دامىتۋعا قوسىمشا مۇمكىندىك بەرەدى», دەدى ب.اتامقۇلوۆ.
«سالاداعى قاجەتتىلىكتى ايقىنداۋ ماقساتىندا نەگىزگى 24 پوزيتسيا بويىنشا قۇرىلىس ماتەريالدارى نارىعىنا تالداۋ جۇرگىزىلدى. بۇگىنگى تاڭدا وتاندىق وندىرۋشىلەر 10 تاۋار پوزيتسياسى بويىنشا ىشكى نارىقتىڭ قاجەتتىلىگىن تولىعىمەن وتەي الادى (تەمىر-بەتون بۇيىمدارى, قۇرعاق قوسپا, قابىرعا بلوكتارى, كىرپىش جانە ت. ب.). 11 پوزيتسيا بويىنشا ەلىمىزدىڭ كاسىپورىندارى شامامەن 50 پايىزدى قامتاماسىز ەتەدى (جىلۋ وقشاۋلاۋ, پروفيل قاڭىلتىر, پلاستيك قۇبىرلار جانە ت. ب.). ال لينولەۋم, تۇسقاعاز, سانفايانس سياقتى 3 پوزيتسيا بويىنشا ىشكى نارىقتا ازىرگە ءوندىرىس جوق», دەدى ۆەدومستۆو باسشىسى.