ەلىمىزدىڭ ءبىرتۋار اقىنى, قوعام قايراتكەرى ءشومىشباي ساريەۆ 75 جاسقا قاراعان شاعىندا قايتىس بولدى, دەپ حابارلايدى Egemen.kz
كورنەكتى اقىن ءشومىشباي ساريەۆ – 1946 جىلى 15 ساۋىردە قىزىلوردا وبلىسى, ارال اۋدانى, ءشومىش ستانساسىندا دۇنيەگە كەلگەن. قامباش ورتا مەكتەبىن بىتىرىسىمەن, قازالى اۋداندىق «لەنين تۋى» جانە ارال اۋداندىق «تولقىن» گازەتتەرىندە قىزمەت اتقارعان. 1971 جىلى قازمۋ-ءدىڭ جۋرناليستيكا فاكۋلتەتىن بىتىرگەن. 1970-1974 جىلدارى «قازاقستان» باسپاسىندا رەداكتور, «جۇلدىز» جۋرنالىندا ءبولىم مەڭگەرۋشىسى, قازاقستان رەسپۋبليكاسى ۇعا-نىڭ مۇحتار اۋەزوۆ اتىنداعى ادەبيەت جانە ونەر ينستيتۋتىندا عىلىمي قىزمەتكەر, اعا عىلىمي قىزمەتكەر بولعان. 1996 جىلى «قازىرگى قازاق ليريكاسىنىڭ ىزدەنىستەرى» اتتى تاقىرىپتا عىلىم كانديداتى دارەجەسىن يەلەندى. «XX عاسىردىڭ جيىرماسىنشى جىلدارداعى پوەزياسى» اتتى مونوگرافيا جازعان.
«عاشىقتار جىرى», «بوزجورعا» اتتى اۆتورلىق بەينەتاسپاسى جارىق كوردى. گ.گۋليا, و.بەرگگولتس, ي.اباشيدزە, س.ۆيكۋلوۆ, ا.دەمەنتەۆ, ف.اليەۆا, ر.روجدەستۆەنسكي, م.ەمينەسكۋ جانە تاعى دا باسقا اقىنداردىڭ ولەڭدەرىن قازاق تىلىنە اۋدارعان.
العاشقى جىر جيناعى 1974 جىلى «بالداۋرەن» دەگەن اتپەن جارىق كورگەن. سودان بەرگى ارالىقتا قازاق, ورىس تىلدەرىندە ون بەس شاقتى كىتابى شىقتى. 1994 جىلى «جازۋشى» باسپاسىنان تاڭدامالى ولەڭدەر تومدىعى, 1992 جىلى ء«سۇيىنشى» دەگەن اتپەن ءان ولەڭدەرى جەكە جيناق بوپ باسىلعان. فرانتس كافكا اتىنداعى حالىقارالىق سىيلىقتىڭ لاۋرەاتى (2003). «تارلان» سىيلىعىنىڭ يەگەرى (2004). قازاقستاننىڭ ەڭبەك سىڭىرگەن قايراتكەرى.