قازاقستاندىقتار 2021 جىلدىڭ قاڭتار ايىندا 8333 جاڭا اۆتوكولىك ساتىپ العان. سونىڭ ىشىندە جەڭىل كولىك, جۇك كولىگى جانە اۆتوبۋستار بار. بۇل 2020 جىلدىڭ قاڭتارىمەن سالىستىرعاندا 54 پايىزعا ارتىق كورسەتكىش, دەپ حابارلايدى Egemen.kz
قازاقستان اۆتوبيزنەس قاۋىمداستىعىنىڭ دەرەگىنشە, جىلدىڭ العاشقى ايىندا رەسمي ديلەرلەر 7771 جەڭىل كولىك پەن جەڭىل كوممەرتسيالىق تەحنيكا, سونداي-اق 562 جۇك كولىگى, ارنايى تەحنيكا جانە اۆتوبۋس ساتقان. بىلتىر ءدال وسى ۋاقىتتا 5396 كولىك ساۋدالانىپتى.
– ادەتتە جىل باسىندا ساۋدا كولەمى تومەن بولادى جانە وتكەن جىلدىڭ جەلتوقسانىمەن سالىستىرعاندا تسيفر الدەقايدا كەمشىن تۇسەدى. الايدا 2021 جىلدىڭ قاڭتارىنداعى ناتيجە بىلتىرعى قاڭتارداعى ناتيجەدەن الدەقايدا اسىپ ءتۇستى. بيىل وندىرۋشىلەر كوپتەگەن جاڭا ترانسپورتتى نارىققا شىعارماق. تۇتىنۋشىلاردىڭ كوڭىلىنەن شىعۋ ءۇشىن ديلەرلەر دە كولىك ساتىلىمى كەزىندە ۇسىنىلاتىن قوسىمشا ونىمدەر دە دايىنداپ وتىر, – دەيدى قاۋىمداستىق ۆيتسە-پرەزيدەنتى انار ماقاشەۆا.
برەندتەر وندىعىن Hyundai (2392) باستاپ تۇر. Chevrolet ديلەرلەرى 2233 اۆتوكولىك ساتسا, Toyota 1046 ساتىلىممەن ءۇشىنشى ورىندا. ودان كەيىنگى ورىنداردا Lada (575), Kia (332), Nissan (249), Renault (200), Volkswagen (148), JAC (113) جانە Lexus (99) اۆتوكولىكتەرى ورنالاسقان.
مودەلدەر بويىنشا كوپشىلىك نەگىزىنەن Chevrolet Cobalt, Chevrolet Nexia, Hyundai Accent, Hyundai Tucson, Hyundai Creta, Toyota Camry, KiaRio, Toyota Rav4, Lada Vesta, Toyota LC Prado كولىكتەرىنە ەرەكشە قىزىعۋشىلىق تانىتقان.