قازاقستان باسشىسىنىڭ رەسەي استاناسىنا جۇمىس ساپارى اياسىندا ماسكەۋدەگى جازۋشىلاردىڭ ورتالىق ۇيىندە وتاندىق «ەلباسى جولى» ءفيلمىنىڭ تۇساۋكەسەرى ءوتتى. ونەر تۋىندىسىن تاماشالاۋعا كەلگەن 500-گە تارتا كورەرمەننىڭ اراسىندا رەسەي ۇكىمەتىنىڭ مۇشەلەرى, مەملەكەتتىك دۋما دەپۋتاتتارى, بەلگىلى رەجيسسەرلەر مەن اكتەرلەر, تانىمال ساراپشىلار, سونداي-اق, ستۋدەنتتەر بولدى.
قازاقستان باسشىسىنىڭ رەسەي استاناسىنا جۇمىس ساپارى اياسىندا ماسكەۋدەگى جازۋشىلاردىڭ ورتالىق ۇيىندە وتاندىق «ەلباسى جولى» ءفيلمىنىڭ تۇساۋكەسەرى ءوتتى. ونەر تۋىندىسىن تاماشالاۋعا كەلگەن 500-گە تارتا كورەرمەننىڭ اراسىندا رەسەي ۇكىمەتىنىڭ مۇشەلەرى, مەملەكەتتىك دۋما دەپۋتاتتارى, بەلگىلى رەجيسسەرلەر مەن اكتەرلەر, تانىمال ساراپشىلار, سونداي-اق, ستۋدەنتتەر بولدى.
فيلم كورەرمەن نازارىنا ۇسىنىلماستان بۇرىن, قازاقستاننىڭ رەسەي فەدەراتسياسىنداعى توتەنشە جانە وكىلەتتى ەلشىسىنىڭ كەڭەسشىسى ۆيكتور تەمىرباەۆ ءسوز الىپ, قازاق كينويندۋسترياسىنىڭ جاڭا تۋىندىسىن كورۋگە ۋاقىت تاۋىپ كەلگەندەرى ءۇشىن جينالعاندارعا العىسىن ءبىلدىردى. «مەن ەلشىلىك باسشىلىعى اتىنان بۇگىنگى شارانى ۇيىمداستىرۋشىلارعا, جازۋشىلاردىڭ ورتالىق ۇيىنە, اسىرەسە, اۆتورلىق ۇجىمعا جانە وسى ءفيلمدى تاماشالاۋعا جيىلعان قاۋىمعا ريزاشىلىعىمدى ءبىلدىرگىم كەلەدى. بۇل فيلم, اسىرەسە, جاستارعا تۇلعانىڭ قالىپتاسۋ جولى قالاي جۇرەتىنى جونىندە ءۇلكەن ساباق بولادى دەپ ويلايمىن», دەدى ەلشىنىڭ كەڭەسشىسى ءوزىنىڭ سوزىندە.
بۇدان كەيىنگى كەزەكتە ول ءسوز تىزگىنىن ۇلتتىق پروديۋسەر ورتالىعىنىڭ باس پروديۋسەرى ارمان اسەنوۆكە ۇسىندى. ا. اسەنوۆ بۇل فيلم ءتۇسىرىلىمىنىڭ باسىنان اياعىنا دەيىن ءجۇرىپ, تالماي تەر توككەن ۇجىمدىق توپتىڭ ەڭبەگىن ەرەكشە اتاپ ءوتتى. ول: «بۇل جوبا اسا اۋقىمدى جانە قيىن جوبا بولدى. سەبەبى, بۇل قازاق كينويندۋسترياسىنىڭ ءبىر جارىم جىلدا تۇسىرگەن, ەكى سەريادان تۇراتىن تولىق مەتراجدى العاشقى ءفيلمى», دەي كەلە, ءفيلمنىڭ رەجيسسەرى رۇستەم ابدىراشەۆتىڭ ەڭبەگىن, اكتەرلەر قاۋىمىنىڭ شىعارماشىلىعىن جوعارى باعالادى.
ءوزىنىڭ رەجيسسەرلىك دارىن-قابىلەتىمەن جۇرتتىڭ جۇرەگىنەن ورىن العان ر.ابدىراشەۆكە دە جۇرتتىڭ ىقىلاسى ەرەكشە بولدى. ول جينالعاندارعا التىن ۋاقىتتارىن قيىپ, شاراعا قاتىسۋعا نيەت بىلدىرگەندەرى ءۇشىن العىسىن جەتكىزدى. «پوستكەڭەستىك كەڭىستىكتە دۇنيەگە كەلگەن كەز كەلگەن كينەماتوگرافتىڭ جۇرەگىندە ماسكەۋدىڭ الار ءوز ورنى بار. مىسالى, مەن ءوزىم وسى قالادا وقىپ, ءبىلىم الدىم. دەمەك, بۇل – ماعان ءدارىس بەرگەن ۇستازدار دا وسى قالادان دەگەن ءسوز. وكىنىشكە قاراي, ولار بۇگىن ومىردە جوق. ولاردىڭ قاتارىنا بولات مانسۇروۆ سەكىلدى ۇستازدارىمدى جاتقىزا الامىن. وسى ورايدا, مەنىڭ ازامات بولىپ قالىپتاسۋىما ىقپال ەتكەن ۇستازدارىمدى ەسكە الىپ, ولارعا شەكسىز ريزاشىلىعىمدى بىلدىرگىم كەلەدى. وسىدان جيىرما بەس جىلداي ۋاقىت بۇرىن مەن بولات مانسۇروۆتىڭ «سۇلتان بەيبارىس» فيلمىنە تۇسۋگە كەلگەنىمدە جاسىم ون بەس, ون التىلاردا ەدى. مۇمكىن وسى فيلمدەگى ءرولىم مەنىڭ كينو الەمىنە كەلۋىمە سەپ بولعان شىعار. بولات اعا ماعان ۇنەمى: «سەنەن كۇندەردىڭ ءبىر كۇنىندە رەجيسسەر شىعادى دەگەن ءۇمىتىم بار», دەيتىن ەدى. ول كىسى, بالكىم, وسىنى ءوزىنىڭ ىشكى ءبىر تۇيسىگىمەن سەزگەن بولار. مەن ءوزىم وقىعان ۆگيك ءبىلىم ورداما دا العىسىمدى بىلدىرەمىن. وسى جەرگە مەنىڭ دوستارىم مەن ارىپتەستەرىم كەلىپ وتىر. بۇل فيلم – ۇجىمدىق ەڭبەكتىڭ جەمىسى. كينو – ۇجىمدىق تۋىندى. سول سەبەپتى, ول ءتۇرلى ماماندىق يەلەرىنىڭ, ءوز ءىسىنىڭ شەبەرلەرىنىڭ كۇش-جىگەرىن تالاپ ەتەتىنى بەلگىلى. رەسەيلىك كينواكتەرلەردىڭ ەڭبەگىن ايرىقشا اتاپ وتكەن ورىندى. ماسەلەن, ۆالەنتين گافت, سەرگەي شاكۋروۆ سەكىلدى اتاقتى اكتەرلەردىڭ ورنى ەرەكشە», دەدى رۇستەم ابدىراشەۆ.
ال س.شاكۋروۆ: «مەنىڭ بۇل فيلمدەگى ەپيزودتىق ءرولىم شاعىن. ءتىپتى, «مەحانيك گاۆريلوۆتىڭ سۇيىكتى ايەلى» فيلمىندە ويناعان رولىمنەن دە از», دەپ ازىلدەي كەلە, ءوزى سومداعان د. قوناەۆتىڭ وبرازىنا توقتالىپ, ونىمەن ومىردە كەزدەسكەن كەزدە العان اسەرلەرىمەن ءبولىستى.
«ەلباسى جولىن» تاماشالاعاننان كەيىن ماسكەۋلىكتەر فيلمنەن العان اسەرلەرىمەن ءبولىسىپ, ەلباسىنىڭ تۇلعا بولىپ قالىپتاسۋ جولى كورىنىس تاپقان تۋىندى توڭىرەگىندە وزدەرىنىڭ جىلى لەبىزدەرىن ءبىلدىرىپ جاتتى.
ءلايلا ەدىلقىزى,
«ەگەمەن قازاقستان» – ماسكەۋدەن.