وبلىس اكىمى گۇلشارا ابدىقالىقوۆانىڭ قاتىسۋىمەن توتەنشە جاعدايلاردىڭ الدىن الۋ جانە ولاردى جويۋ جونىندەگى وبلىستىق كوميسسيا وتىرىسى ءوتتى. كەزەكتى وتىرىستا كوكتەمگى سۋ تاسقىنى كەزەڭىنە دايىندىق پەن كونگو-قىرىم گەمورراگيالىق قىزباسىنىڭ الدىن الۋ شارالارى تۋرالى ماسەلەلەر قارالدى.
العاشقى ماسەلە بويىنشا بايانداما جاساعان وبلىستىق جۇمىلدىرۋ دايىندىعى باسقارماسىنىڭ باسشىسى مەدەت ۋساين سىرداريا وزەنىنىڭ بۇگىنگى جاعدايىن باياندادى.
باسقارما باسشىسىنىڭ ايتۋىنشا, بۇگىنگى كۇنى شاردارا سۋ قويماسىنان سىرداريا وزەنىنە ءتۇسىپ جاتقان سۋ كولەمى سەكۋندىنا 550 تەكشە مەتردى قۇراسا, ونىڭ 250 تەكشە مەترىن كوكساراي سۋ رەتتەگىشى الۋدا. وبلىس اۋماعىنا سەكۋندىنا 280 تەكشە مەتر سۋ كەلىپ تۇر. وزەن ارناسىندا سوڭعى 7 جىلدا بولماعان جاعداي ورىن الىپ, مۇز جاڭاقورعان اۋدانى اۋماعىنا دەيىن ۇستاستى. مۇزدىڭ قالىڭدىعى سولتۇستىك اۋدانداردا 35-62 سم, وڭتۇستىك اۋدانداردا 18-35 سم قۇراپ وتىر. سوڭعى مونيتورينگ جۇمىستاردى جۇرگىزۋ بارىسىندا جالپى ۇزىندىعى 3 شاقىرىمدى قۇرايتىن شۇعىل قالپىنا كەلتىرۋدى قاجەت ەتەتىن 3 نىسان انىقتالعان.
ايماق باسشىسى سىرداريا وزەنى جاعالاۋىنداعى قاۋىپتى نىسانداردى قالپىنا كەلتىرۋ باعىتىندا ءتيىستى سالا باسشىلارى مەن قالا, اۋدان اكىمدەرىنە بىرقاتار تاپسىرما بەردى.
«قىزىلوردا قالاسى مەن اۋدان اكىمدەرى قاۋىپتى ۋچاسكەلەرگە بەكىتىلگەن جاۋاپتى مەكەمەلەردەگى ارنايى تەحنيكالاردىڭ دايىندىق جاعدايىندا بولۋىن قامتاماسىز ەتىپ, سىرداريا وزەنىنىڭ بويىنداعى ءاربىر قاۋىپتى ۋچاسكەلەرگە بەكىتىلگەن ارنايى تەحنيكالارى بار جاۋاپتى مەكەمەلەردىڭ داريا بويى كەزەكشىلىگىن ۇيىمداستىرسىن. وبلىستىق توتەنشە جاعدايلار دەپارتامەنتى وبلىس كولەمىندە سۋ تاسقىنىنىڭ الدىن الۋ ماقساتىندا اۆاريالىق-قۇتقارۋ قىزمەتتەرى مەن كۇش-قۇرالدارىنىڭ دايىندىعىن ۇنەمى ازىرلىكتە ۇستاۋى قاجەت. ەكونوميكا جانە بيۋدجەتتىك جوسپارلاۋ باسقارماسى, جۇمىلدىرۋ دايىندىعى باسقارماسىمەن بىرلەسىپ, قالپىنا كەلتىرۋ جۇمىستارىن قاجەت ەتەتىن وزەن بويى قورعانىس بوگەتتەرىنىڭ جوندەۋ جۇمىستارىنا قارجى ءبولۋ ءۇشىن بيۋدجەتتىك كوميسسيا وتىرىسىنا ۇسىنىس كەلتىرسىن. وبلىستىق جۇمىلدىرۋ دايىندىعى باسقارماسىنا اتالعان قورعانىس بوگەتتەرىنە شۇعىل تۇردە جوندەۋ جۇمىستارىن ۇيىمداستىرۋدى تاپسىرامىن. وزەن ارناسىنداعى سەڭ كەپتەلىسى كەزىندە قاجەت بولعان جاعدايدا قاۋىپسىزدىك شارالارىن ساقتاي وتىرىپ, مۇز جارۋ جۇمىستارىن جۇرگىزگەنى ءجون», دەدى وبلىس اكىمى.
سونداي-اق «قازسۋشار» رەسپۋبليكالىق مەملەكەتتىك كاسىپورنىنىڭ قىزىلوردا فيليالىنا كولدەر جۇيەسىنە سۋ الۋ ماقساتىندا وبلىس كولەمىندەگى بارلىق سۋ تاراتۋشى كانالداردى ازىرلىككە كەلتىرۋگە, ارال-سىرداريا باسسەيندىك ينسپەكتسياسىنا شاردارا سۋ قويماسىنان قىس-كوكتەم ايلارىندا سىرداريا وزەنىنىڭ تومەنگى اعىسىنا تۇسىرىلەتىن سۋ كولەمىنىڭ بەكىتىلگەن كەستەگە سايكەس ورىندالۋىن ۇنەمى باقىلاۋدا ۇستاۋدى تاپسىردى.
وبلىستىق كوميسسيا وتىرىسىنداعى ەكىنشى ماسەلە كونگو-قىرىم گەمورراگيالىق قىزباسىنىڭ الدىن الۋ شارالارى تۋرالى وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى دينارا جاڭابەرگەنوۆا باياندادى.
«جىل سايىن وبلىس كولەمىندە كونگو-قىرىم گەمورراگيالىق قىزباسىنىڭ 1 جاعدايدان 7-8 جاعدايعا دەيىن سپوراديكالىق اۋرۋشاڭدىق تىركەلەدى. وتكەن جىلى وبلىس بويىنشا 12 ىقتيمال جاعداي تىركەلىپ, ونىڭ 9 جاعدايى زەرتحانالىق جولمەن ناقتىلاندى. 2019 جىلى 8 ناۋقاستىڭ دياگنوزى زەرتحانالىق جولمەن ناقتىلانعان بولاتىن. وبلىس بويىنشا كونگو-قىرىم گەمورراگيالىق قىزباسىنىڭ تابيعي وشاقتارىن انىقتاۋ ماقساتىندا 2020 جىلى 239 ەلدى مەكەن اۋماعىنا زووپارازيتولوگيالىق زەرتتەۋلەر جۇرگىزىلدى, ونىڭ ىشىندە 117-ءى – قولايسىز ەلدى مەكەندەر», دەدى دينارا جاڭابەرگەنوۆا.
جيىن سوڭىندا ءوڭىر باسشىسى قالا جانە اۋدان اكىمدەرىنە ەلدى مەكەندەردەگى تازالىق جۇمىستارىنا تىكەلەي جاۋاپتى ەكەندەرىن ەسكەرتىپ, وبلىستىق سانيتارلىق-ەپيدەميولوگيالىق باقىلاۋ دەپارتامەنتىنە ەلدى مەكەندەردەگى مەحانيكالىق تازالاۋ جۇمىستارىن قاتاڭ باقىلاۋعا الۋدى تاپسىردى. ال, وبلىستىق دەنساۋلىق ساقتاۋ باسقارماسى باسشىسىنا كەنە شاعۋمەن تۇسكەن اۋرۋلاردى ەمدەۋگە قاجەتتى ءدارى-دارمەكتەردىڭ قورى جەتكىلىكتىلىگىن قامتاماسىز ەتۋدى جۇكتەدى.