قازاقستاندىقتار حالىق ساناعىنا قاتىسۋدىڭ بالامالى نۇسقاسىنا يە بولادى.
ەندى, تەك ساناق جۇرگىزۋشىگە اقپارات بەرىپ قانا قويماي, سونىمەن قاتار ونلاين رەجيمىندە جۇمىس ىستەيتىن مامانداندىرىلعان پورتال قىزمەتىن قولدانا الادى. بيىلعى ساناقتىڭ ەرەكشەلىگى قانداي, نەندەي جاڭاشىلدىق بولادى؟ ۇكىمەتتىڭ بۇل اۋقىمدى ناۋقانعا دايىندىعى قانداي؟
وسى جانە وزگەدە جانە ماسەلەلەر قازاقستان رەسپۋبليكاسىنىڭ 2021 جىلعى ۇلتتىق حالىق ساناعىن جۇرگىزۋ جونىندەگى ارنايى كوميسسياسىنىڭ ءبىرىنشى وتىرىسى بارىسىندا ءسوز بولدى, دەپ حابارلايدى قازاقپارات ءتىلشىسى. رەفورمالار جونىندەگى جوعارعى كەڭەستە مەملەكەت باسشىسىنىڭ تاپسىرماسى بويىنشا پرەمەر-ءمينيستردىڭ ءبىرىنشى ورىنباسارى ءاليحان سمايىلوۆتىڭ توراعالىعىمەن ارنايى كوميسسيا قۇرىلدى.
ول ناۋقانعا دايىندىق پەن ونى وتكىزۋدىڭ نەگىزگى ۇيىمداستىرۋشىلىق جانە مازمۇندىق ماسەلەلەرىمەن اينالىسادى. حالىقتىڭ سانى, ونىڭ جاسى, گەندەرلىك قۇرامى, ۋربانيزاتسيا دارەجەسى, تابىس دەڭگەيى تۋرالى جيناقتالعان مالىمەتتەر تەكسەرىلگەن, پىسىقتالعان باسقارۋشىلىق شەشىمدەر قابىلداۋعا نەگىز بولادى. ونلاين ساناقتى 2021 جىلدىڭ 1 قىركۇيەگىنەن باستاۋ تۋرالى شەشىم قابىلداندى.
ول 2021 جىلدىڭ 15 قازانىنا دەيىن مامانداندىرىلعان sanaq.gov.kz ۆەب-سايتىندا جالعاسادى. سايت تاۋلىك بويى اشىق بولادى. ازاماتتار, قاي جەردە جۇرسە دە, ءوزى جانە وتباسى ءۇشىن ساۋالناما بەتتەرىن تولتىرىپ, ساناققا ءوز بەتىنشە قاتىسا الادى. اقپاراتتىق قاۋىپسىزدىكتى قامتاماسىز ەتۋ ماقساتىندا ۇلتتىق ستاتيستيكا بيۋروسى «كيبەرشابۋىلداردى تالداۋ جانە تەرگەۋ ورتالىعى» زتب-مەن بىرلەسىپ جۇمىستار جۇرگىزدى.
ناتيجەسىندە وسالدىق جۇيەسى كۇشەيتىلدى جانە بايلانىس ارناسى كەڭەيدى. ءا.سمايىلوۆتىڭ ۇيعارىمىمەن, قازاقستان رەسپۋبليكاسىنىڭ ۇقك-مەن بىرلەسىپ, حاكەرلىك شابۋىلداردىڭ الدىن الۋ ماقساتىندا حالىق ساناعى بويىنشا اقپاراتتىق رەسۋرستارعا تاۋلىك بويى مونيتورينگ جۇرگىزۋدى قامتاماسىز ەتۋ تاپسىرىلدى. سونداي-اق, پرەمەر-ءمينيستردىڭ ءبىرىنشى ورىنباسارى «sanaq.gov.kz» سايتىن «Egov.kz» ۆەب-پورتالىمەن بىرىكتىرۋ قاجەتتىلىگىن اتاپ ءوتتى.
ءداستۇرلى ءۇي-ءۇيدى ارالاۋ, ونلاين-ساناقتان وتپەگەن ازاماتتاردى قامتۋ ماقساتىندا 2021 جىلدىڭ 1 قازانىنان 2021 جىلدىڭ 30 قازانىنا دەيىن قاجەتتى سانيتارلىق نورمالاردى ساقتاي وتىرىپ وتكىزىلەدى. ساناق جۇرگىزۋشىلەر پلانشەتتەردى قولدانادى, بۇل دەرەكتەر ساپاسىنا ادامي فاكتوردىڭ اسەرىن بارىنشا ازايتادى, جسن قولدانىپ ناقتىلىق دەڭگەيىن جوعارىلاتادى جانە اقپاراتتىڭ قايتالانۋىن بولدىرمايدى.
پلانشەتكە ارنالعان ءموبيلدى قوسىمشا ازىرلەندى, ونىڭ كومەگىمەن سۇحبات بەرۋشى بارلىق كىرىكتىرىلگەن اريفمەتيكالىق جانە لوگيكالىق باسقارۋلاردى ەسكەرە وتىرىپ ساۋالناما جۇرگىزە الادى, جىكتەۋىشتەر مەن انىقتامالىقتاردى قولدانا الادى. الىنعان دەرەكتەر تىكەلەي ورتاق دەرەكقورعا جىبەرىلەدى.