اقتوبە وبلىسى, تەمىر اۋدانىنىڭ ورتالىعى شۇبارقۇدىق اۋىلىندا ەكى مۇعالىم توبەلەسىپ, بىرەۋى مەرت بولعان ەدى. سوت ۇكىمىمەن ارىپتەسىن ولتىرگەن پەداگوگ 8 جىلعا باس بوستاندىعىنان ايىرىلدى.
وقيعا 2020 جىلدىڭ 22 قازانى كۇنى بولدى. ءىس ماتەريالىنا سۇيەنسەك, سوتتالۋشى اشۋعا بوي الدىرىپ, ماس كۇيىندە ارىپتەسىنە اسحانا پىشاعىن سۇعىپ العان. ءبىر عانا سوققىدان دەنە شىنىقتىرۋ ءپانىنىڭ مۇعالىمى بەرىك ەلتەزەروۆ جان ءتاسىلىم ەتتى.
سوتتالۋشى بار كىنانى مويىندادى. سوت وتىرىسى كەزىندە كۋالەردەن جاۋاپ الىنىپ, ولار دا ءمان-جايدى ءتۇسىندىرىپ بەردى.
«جازا تاعايىنداۋ كەزىندە سوت «ج»-نىڭ شىن نيەتپەن وكiنگەنىن, ايىبىن مويىنداپ, پوليتسياعا بارعانىن, قىلمىستىق قۇقىقبۇزۋشىلىقپەن كەلتىرىلگەن مورالدىق جانە وزگە دە زياندى وتەگەنىن, كامەلەت جاسقا تولماعان بالالارىن ەسكەردى. جابىرلەنۋشى تاراپ تا كەشىرىم بەردى. سوت ۇكىمىمەن «ج» قر قك-ءنىڭ 99-بابىنىڭ 1-بولىگىمەن كىنالى دەپ تانىلىپ, وعان 8 جىلعا باس بوستاندىعىنان ايىرۋ جازاسى تاعايىندالدى. جازانى قىلمىستىق-اتقارۋ جۇيەسىنىڭ قاۋىپسىزدىگى بارىنشا جوعارى مەكەمەسىندە وتەۋ بەلگىلەندى. سوت ۇكىمى زاڭدى كۇشىنە ەنگەن جوق», دەپ حابارلادى وبلىستىق سوتتىڭ ءباسپاسوز قىزمەتى.
ايتا كەتەيىك, پەداگوگتار اراسىنداعى توبەلەس دەنە شىنىقتىرۋ ءپانى مۇعالىمىنىڭ ءۇيىنىڭ اۋلاسىندا, تۇسكى مەزگىلدە بولعان.