الماتى اۋەجايىندا سانيتارلىق نورمالار قالاي باقىلانادى؟

مەگاپوليس اۋەجايىندا جولاۋشىلار مەن قىزمەتكەرلەردىڭ قاۋىپسىزدىگىن قامتاماسىز ەتۋ ءۇشىن كەشەندى الدىن الۋ شارالارى جۇزەگە اسىرىلدى. تەرمينالعا كىرگەن كەزدە دەنە تەمپەراتۋراسىن مىندەتتى تۇردە ولشەۋ جۇرگىزىلەدى. اۋەجاي قىزمەتكەرلەرى بەتپەردە رەجيمىن جانە الەۋمەتتىك قاشىقتىقتى قاتاڭ باقىلايدى. قولدى وڭدەۋگە ارنالعان سانيتايزەرلەر ورناتىلعان. ءاربىر رەيستەن كەيىن عيماراتتار مەن پەرروندىق اۆتوبۋستارعا كۇشەيتىلگەن دەزينفەكتسيا جۇرگىزىلەدى.

كەلۋشىلەردى حاباردار ەتۋ ماقساتىندا ادامدار كوپ جينالاتىن جەرلەردە الەۋمەتتىك قاشىقتىقتى ساقتاۋ ماقساتىندا بەلگىلەر بار, كۇتۋ زالىنداعى كرەسلولار شاحماتتىق تارتىپپەن بەلگىلەنگەن.

اۋەجايدا سانيتارلىق نورمالاردىڭ ساقتالۋىن مونيتورينگتىك توپتار باقىلايدى. قر سىبايلاس جەمقورلىققا قارسى ءىس-قيمىل اگەنتتىگى جانىنداعى رەسپۋبليكالىق ارنايى مونيتورينگتىك توپتىڭ جەتەكشىسى ايگۇل سولوۆەۆا جانە قر سىبايلاس جەمقورلىققا قارسى قىزمەتى جانىنداعى رامت توراعاسىنىڭ ورىنباسارى رافاەل گاسانوۆ الماتى حالىقارالىق اۋەجايىندا سانيتارلىق-ەپيدەميولوگيالىق شارالاردىڭ ساقتالۋىنا كەزەكتى مونيتورينگ جۇرگىزدى.

مونيتورينگتىك توپ اۋەجاي اۋماعىنداعى جالپى تاماقتانۋ ورىندارىندا بەتپەردە رەجيمىن, سانيتارلىق نورمالاردى ساقتاۋدى باقىلاۋ شارالارىن تەكسەردى. سونداي-اق, تەپلوۆيزورلاردىڭ, مونيتورلار مەن سانيتايزەرلەردىڭ بولۋىن تەكسەردى.

ء«بىز الماتى اۋەجايى قولداناتىن بارلىق رەتتىلىك پەن الگوريتمدى قاداعالادىق. ءبىز نە كوردىك؟ ءبىرىنشى كەزەكتە, كىرگەن كەزدە - مىندەتتى تۇردە بەتپەردەسىز كىرەسىڭ بە جانە سانيتارلىق نورمالاردى قانشالىقتى ساقتايتىنىڭدى ءتۇسىرىپ تۇراتىن مونيتوردى كورىپ وتىرمىز», - دەپ اتاپ ءوتتى ايگۇل سولوۆەۆا, سونداي-اق پتر تاپسىرۋ پۋنكتتەرىنىڭ جۇمىسى ماسەلەسىنە توقتالدى. ونىڭ ايتۋىنشا, قالا تۇرعىندارى كوبىرەك جاۋاپكەرشىلىك تانىتىپ, سانالى تۇردە قازاقستان اۋماعىنا قايتىپ كەلگەنگە دەيىن الدىن الا پتر تەستىلەۋدەن ءوتۋى ءتيىس.

ينسپەكتسيالاۋ بارىسىندا مونيتورينگتىك توپ مۇشەلەرى حالىقارالىق اۆيارەيستەرگە كەلەتىن جولاۋشىلاردىڭ قوزعالىس مارشرۋتىمەن تانىستى. ەستەرىڭىزگە سالا كەتەيىك, باس مەملەكەتتىك سانيتار دارىگەردىڭ قاۋلىسىنا سايكەس قازاقستانعا كەلگەندەردىڭ بارلىعىندا پتر-كوروناۆيرۋستىڭ جوقتىعى تۋرالى انىقتاما بولۋى ءتيىس, ول بەرىلگەن كۇننەن باستاپ 3 تاۋلىكتەن اسپاۋى ءتيىس. انىقتاما بولماعان جاعدايدا كەلگەن قر ازاماتتارى پتر ادىسىمەن COVID-19 - عا زەرتحانالىق تەكسەرۋ ءۇشىن كارانتيندىك ستاتسيونارعا 3 تاۋلىككە دەيىن وقشاۋلانۋعا جاتادى, ال شەتەلدىك ازاماتتار دەپورتاتسيالانادى.

ء«بىز الماتى قالاسى بويىنشا وسىنداي مونيتورينگتى تۇراقتى تۇردە جۇرگىزىپ وتىرامىز. ءبىز اۋەجايعا بارىپ, كوروناۆيرۋستىق ينفەكتسيانىڭ تارالۋىنا جول بەرمەۋ ءۇشىن قالا باسشىلىعىمەن بىرلەسىپ ەنگىزىلگەن جاڭالىقتارمەن تانىستىق», دەدى رافاەل گاسانوۆ.

ايتا كەتەر بولساق, 9 اقپاندا الماتى اۋەجايىنا 1 524 جولاۋشىسى بار 8 حالىقارالىق اۋە رەيسى كەلدى. ولاردىڭ ىشىندە 1 303 جولاۋشىنىڭ انىقتامالارى بار, 221 ادامنىڭ انىقتامالارى جوق. انىقتاماسىز كەلگەن قازاقستان ازاماتتارى COVID-19-عا پتر-تالداۋ ادىسىمەن تەستىلەندى جانە كارانتيندىك ستاتسيوناردا ءوز ناتيجەلەرىن كۇتەدى.