بيىل اقتوبە وبلىسىنىڭ 10 ەلدى مەكەنىنە اۋىز سۋ قۇبىرى, 8 ەلدى مەكەنىنە گاز قۇبىرى تارتىلادى. بۇل تۋرالى وبلىس اكىمى وڭداسىن ورازالين تۇرعىندار الدىنداعى ەسەپ بەرۋ كەزدەسۋىندە مالىمدەدى دەپ حابارلايدى Egemen.kz.
وتكەن جىلى ورتالىقتاندىرىلعان سۋمەن قامتاماسىز ەتۋ بويىنشا 12 جوبا ىسكە اسىرىلسا, بيىل 5,8 مىڭ تۇرعىنى بار 10 ەلدى مەكەنگە ساپالى سۋ جەتكىزىلەدى. وسىلايشا جىل سوڭىنا دەيىن 900 مىڭ تۇرعىنى بار ءوڭىر حالقىن سۋمەن قامتۋ جوسپارى 96,9%-عا دەيىن جەتكىزىلەدى.
سوڭعى جىلدارى وبلىس ورتالىعى توڭىرەگىندە ورنالاسقان ەلدى مەكەن تۇرعىندارى جاز كەزىندە سۋ تاپشىلىعىن سەزىنىپ ءجۇر. بۇل ماسەلەدە جۇرتشىلىقتىڭ تالاپ-تىلەكتەرىن ەسكەرە وتىرىپ, قالا ىرگەسىندەگى جەراستى سۋ كوزدەرى شوعىرلانعان ەلەك جانە قۇنداقتىقىر توعانىن قايتا قالپىنا كەلتىرۋدى, سونداي-اق سارىبۇلاق پەن مويسەەۆ كەن ورىندارىنداعى جەراستى سۋلارىن ىزدەۋ-بارلاۋ جۇمىستارى جالعاسپاقشى. جەراستى سۋ كوزدەرى بۇرعىلانىپ, قۇبىر تارتىلسا, اقتوبە قالاسىنىڭ تۇرعىندارىن الداعى 40 جىلعا دەيىن اۋىز سۋمەن قامتاماسىز ەتۋگە مۇمكىندىك بەرەدى دەگەن بولجام جاسالىندى.
سونداي-اق وتكەن جىلى 13 ەلدى مەكەنگە گاز تارتىلسا, بيىل 8 اۋىل تۇرعىندارىن كوگىلدىر وتىنمەن قامتاماسىز ەتۋ جوسپارعا ەنگىزىلدى. ولاردىڭ قاتارىندا جۇرىن, قاراكول, الىمبەت, قۇمقۇدىق, قۇتيكول, اششىساي, قاراتاۋساي, بايتۇراساي, امانكول, جارما ەلدى مەكەندەرى بار. قازىر ەڭ ءبىرىنشى كەزەكتە 5 ەلدى مەكەنگە جۇرگىزىلەتىن قۇبىر جۇمىستارىنا 10 ميلليارد تەڭگە ءبولىنىپ, ونىڭ تەحنيكالىق-سمەتالىق قۇجاتتارى ازىرلەنىپ جاتىر. جۇمىستار جوسپارلانعان مەرزىمدە ىسكە اسىرىلسا, جىل سوڭىنا قاراي اقتوبە وبلىسىنىڭ 315 ەلدى مەكەنىنىڭ 126-سى كوگىلدىر وتىنمەن قامتاماسىز ەتىلەدى. ايتا كەتۋ كەرەك, قازىرگى كەزدە اقتوبە وبلىسى اۋماعىنداعى گاز قۇبىرلارىنىڭ جالپى ۇزىندىعى 6 مىڭ 720 شاقىرىمدى قۇرايدى.