بۇگىن ورتالىق كوممۋنيكاتسيالار قىزمەتىندە قر دەنساۋلىق ساقتاۋ ۆيتسە-ءمينيسترى اجار عينيات قازاقستاندا قاشاننان باستاپ مەديتسينالىق ماسكاسىز جۇرۋگە بولاتىنىن ايتتى, دەپ حابارلايدى Egemen.kz
«قازىرگى كەزدە ەلىمىزدە رەسەيلىك «سپۋتنيك V» ۆاكتسياناسىن ەگۋ ءجۇرىپ جاتىر. الداعى ۋاقىتتا قازاقستاندىق ۆاكتسينا بولادى. وتاندىق ۆاكتسينا كلينيكالىق زەرتتەۋلەردەن ءوتىپ جاتىر», دەدى ۆيتسە-مينيستر تىلشىلەر ساۋالىنا جاۋاپ بەرە وتىرىپ.
سونىمەن قاتار ا. عينيات قازىرگى ۋاقىتتا Pfizer ۆاكتسيناسىن قازاقستانعا الىپ كەلۋ تۋرالى ناقتى كەلىسسوزدەر جۇرگىزىلمەگەنىن جەتكىزدى. ۆيتسە-مينيستر ۆاكتسينا قويىلعان جاعدايدا ماسكاسىز ءجۇرۋ مۇمكىندىگى تۋرالى قويىلعان سۇراققا جاۋاپ بەردى.
«حالىقتىڭ ورتاسىندا ۇجىمدىق يممۋنيتەت قالىپتاسپاي, حالىقتىڭ 60 پايىزدان استامى ۆاكتسينالاۋدان وتپەي, ماسكانى شەشۋگە بولمايدى. ۇجىمدىق يممۋنيتەت قالىپتاسقاننان كەيىن عانا ماسكاسىز جۇرۋگە بولادى», دەدى اجار عينيات.