بۇگىن نۇر-سۇلتان قالاسىندا قازاقستان تاۋەلسىزدىگىنىڭ 30 جىلدىعىن اتاپ ءوتۋ اياسىندا مەملەكەت باسشىسى قاسىم-جومارت توقاەۆتىڭ باستاماسىمەن ۇيىمداستىرىلعان «قايىرىمدى ىستەر مارافونى» جالپىۇلتتىق جوباسى باستالدى.
ايماقتار دونورلار مەن مەتسەناتتار كەزدەسۋىنە بەينە-كونفەرەنتس-بايلانىس ارقىلى قوسىلدى. سونداي-اق, اتالعان كەزدەسۋ اقپارات جانە قوعامدىق دامۋ مينيسترلىگىنىڭ الەۋمەتتىك جەلىدەگى پاراقشاسىندا تىكەلەي ەفيردە كورسەتىلدى.
ءىس-شاراعا مينيستر ايدا بالاەۆا, بيزنەس جانە ۇكىمەتتىك ەمەس سەكتور, قايىرىمدىلىق جانە ەرىكتىلەر ۇيىمدارى وكىلدەرى, اتاپ ايتقاندا, «Aitas KZ» اق پرەزيدەنتى كسەنيا ۆەربا, «Altyn Qyran Foundation» قورىنىڭ ديرەكتورى ايتماعانبەت ماقسۇتبەك, قازاقستاننىڭ ۆولونتەرلەر ليگاسىنىڭ ءتورايىمى ەرنيازوۆا ايسۇلۋ جانە باسقالار قاتىستى.
ەسكە سالا كەتەيىك, 2020 جىل – ۆولونتەرلىك جىلى دەپ جاريالانىپ, بارشا قازاقستاندىقتاردى قايىرىمدى ىستەر اياسىندا بىرىكتىردى. «بۇگىنگى تاڭدا ەلىمىزدەگى ۆولونتەرلەر سانى 100 مىڭعا جۋىق ادامدى قۇرايدى. ولار ءۇشىن «ادامدارعا كومەك بەرۋ» تەك جوعارى گۋمانيستىك ارەكەت ەمەس, ءومىردىڭ نورماسى مەن جان قالاۋى», — دەدى ايدا بالاەۆا.
قاتىسۋشىلار قايىرىمدىلىق باستامالار, ەرىكتىلەر قىزمەتىن دامىتۋداعى بيزنەستىڭ ءرولى, دونورلىق قىزمەتتەگى حالىقارالىق تاجىريبە, قوعامنىڭ الەۋمەتتىك ماڭىزدى ماسەلەلەرىن شەشۋدە ازاماتتىق بەلسەندىلىكتىڭ ءرولى, قازاقستاندىق ۆولونتەرلىك تاجىريبە تۋرالى ويلارىمەن ءبولىستى.
ازاماتتىق باستامالاردى قولداۋ ورتالىعىنىڭ باسشىسى ليما دياس «قايىرىمدى ىستەر مارافونى» ۇلتتىق جوباسىمەن تانىستىردى. اتاپ ايتقاندا, ءبىلىم بەرۋ مەكەمەلەرىندە (مەكتەپ, كوللەدج, ۋنيۆەرسيتەت) سىنىپ ساعاتتارى, ونلاين-ترەنينگتەر مەن فاندرايزينگ, كورپوراتيۆتى ۆولونتەرلىك بويىنشا شەبەرلىك دارىستەرى وتەدى. مارافونعا بارلىق قازاقستاندىقتار, ونىڭ ىشىندە مەملەكەتتىك جانە قوعامدىق ۇيىمدار, بيزنەس وكىلدەرى, ءبىلىم بەرۋ مەكەمەلەرى قاتىسا الادى.
تالقىلاۋ بارىسىندا كورپوراتيۆتى سەكتوردىڭ وكىلى اسەل قوجاقوۆا باق وكىلدەرىن مارافون شارالارى تۋرالى اقپاراتتاندىرۋدا بەلسەندى قاتىسۋعا, ادامداردى جاقىندارى مەن مۇقتاج ادامدارعا جاقسىلىق جاساۋدا اقپاراتتىق تۇرتكى بولۋعا شاقىردى. كەزدەسۋ بارىسىندا, پىكىرالماسۋعا باتىس قازاقستان وبلىسى اكىمىنىڭ ءبىرىنشى ورىنباسارى مۇحتار مانكەەۆ تە قوسىلىپ, «قايىرىمدى ىستەر مارافونى» شارالارىنا شەتەلدە تۇراتىن وتانداستاردى تارتۋدى ۇسىندى.
ايدا بالاەۆا ءوزىنىڭ قورىتىندى سوزىندە بارلىق ازاماتتىق قوعام ينستيتۋتتارىنا جەرگىلىكتى جەرلەردە بەلسەندى بولىپ, بۇكىلحالىقتىق يگىلىكتى ىستەرگە ءوز ۇلەستەرىن قوسۋعا شاقىردى.
«مەن مەتسەناتتىق قىزمەتتى جۇزەگە اسىراتىن بارلىق كاسىپكەرلەرگە قوعامدىق جانە ازاماتتىق باستامالاردى بەلسەندى تۇردە قولداۋعا شاقىرامىن», - دەدى مينيستر.
قاتىسۋشىلار قوعامدى وسى جوبا اياسىندا بىرىكتىرۋدىڭ ماڭىزدىلىعى – مەملەكەت پەن قايىرىمدىلىق ۇيىمدارىنىڭ ءوزارا تىعىز ارىپتەستىگىندە ەكەنىن اتاپ ءوتتى.