قوستانايدا مەزگىلسىز جاۋعان جاڭبىردىڭ سوڭى ايازعا ۇلاسىپ, سالدارىنان قالا كوشەلەرى كوكتايعاققا اينالدى.
كەشەلى بەرى قۇلاپ, قول-اياعى سىنىپ, ءتۇرلى جاراقات العان جاياۋ جۇرگىنشى كوپ. قالالىق اۋرۋحانانىڭ جاراقاتتانۋ بولىمىندە قازىر جۇمىس قاۋىرت. ادەتتەگى كۇندەرى مۇندا 40-50 ناۋقاس تۇسەتىن بولسا, قازىر ول ەكى ەسەگە دەيىن ارتقان. مىسالى, دۇيسەنبى كۇنى قالالىق تراۆماتولوگيا ءبولىمىنىڭ دارىگەرلەرى 70-تەن استام تۇرعىندى قابىلداعان.
«قوستاناي قالالىق اۋرۋحاناسىنىڭ تراۆماتولوگيا بولىمىنە 77 ادام كەلىپ ءتۇستى. ونىڭ ىشىندە كوشەدە تايىپ جىعىلعان 45 ادام بار. مىسالى, كەشە تىرسەگىن سىندىرىپ العان جاس جىگىت كەلىپ ءتۇستى. قازىر ول وتا جاساۋ بولىمىندە جاتىر. ودان كەيىن تاعى ءبىر ايەل ءتۇستى. ول كىسى دە كوشەگە شىعا سالىسىمەن ايالداماعا جەتە بەرگەندە تايىپ قۇلاپ, اياعىن سىندىرىپ العان», دەدى قالالىق اۋرۋحانانىڭ دارىگەر-تراۆماتولوگى ارتەم تيسلەنكو.
قالا اكىمدىگىنىڭ مالىمەتىنشە, قازىر كوممۋنالدىق مەكەمەلەرى 80 تەحنيكا شىعارىپ, كوشەلەردى تازالاۋ, تروتۋارلار مەن ايالدامالارعا, سونداي-اق تۇرعىن ءۇي اۋلالارىنا مۇز ەرىتكىش قوسپا سەبۋمەن اينالىسىپ جاتىر.
قوستاناي وبلىسى