قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا جاڭارتىلاتىن ەنەرگيا كوزدەرىن (جەك) دامىتۋ ماسەلەلەرى قارالدى.
ەنەرگەتيكا ءمينيسترى نۇرلان نوعاەۆ, «KEGOC» ەلەكتر جەلىلەرىن باسقارۋ جونىندەگى قازاقستاندىق كومپانيا» اق باسقارما توراعاسى باقىتجان قاجيەۆ, الماتى وبلىسىنىڭ اكىمى اماندىق باتالوۆ, جامبىل وبلىسىنىڭ اكىمى بەردىبەك ساپارباەۆ, قاراعاندى وبلىسىنىڭ اكىمى جەڭىس قاسىمبەك بايانداما جاسادى.
«ەلدەگى ەكولوگيالىق جاعدايدى جاقسارتۋ پرەزيدەنت قاسىم-جومارت كەمەل ۇلى توقاەۆتىڭ العا قويعان باسىم مىندەتتەرىنىڭ ءبىرى. ەكولوگيا مەن قورشاعان ورتانى جاقسارتۋ قۇرالدارىنىڭ ءبىرى – جاڭارتىلاتىن ەنەرگيا كوزدەرى. اتالعان سالانى دامىتۋ ءۇشىن جۇيەلى جۇمىس جۇرگىزۋ قاجەت», — دەدى ا. مامين.
2020 جىلى قازاقستاندا قۋاتتىلىعى 583 مۆت بولاتىن 25 جەك نىسانى – 10 جەل, 1 سۋ جانە 12 كۇن ەلەكتر ستانتسيالارى پايدالانۋعا بەرىلدى. جاڭارتىلاتىن كوزدەردەن ەلەكتر ەنەرگياسىن ءوندىرۋ 2019 جىلداعىمەن سالىستىرعاندا 74%-عا 3,24 ملرد كۆتس-قا دەيىن (ەلدە وندىرىلەتىن ەنەرگيانىڭ جالپى كولەمىنىڭ 3%-ى) ءوستى. بيىل 381 مۆت-قا 23 جوبا جۇزەگە اسىرىلادى — 13 جەس, 5 سەس جانە 5 كەس.
«جاسىل» ەكونوميكاعا كوشۋ جونىندەگى قر-نىڭ ىسكە اسىرىلىپ جاتقان تۇجىرىمداماسىنا سايكەس, 2050 جىلعا قاراي وندىرىلەتىن ەلەكتر ەنەرگياسىنىڭ جارتىسى بالامالى ەنەرگەتيكادان الىنادى. بۇل قازاقستان رەسپۋبليكاسىنىڭ تومەن كومىرتەكتى جانە كليماتتىق ورنىقتى دامۋ جونىندەگى پاريج كەلىسىمى اياسىنداعى مىندەتتەمەلەرىن ورىنداۋعا, سونداي-اق جاھاندىق ترەندتەرگە سايكەس «جاسىل ەنەرگەتيكانى» دامىتۋعا جول اشادى.
قازاقستاننىڭ بىرىڭعاي ەنەرگيا جۇيەسىنىڭ تۇراقتىلىعىن قامتاماسىز ەتۋ ءۇشىن ۇكىمەت باسشىسى ەنەرگەتيكا مينيسترلىگىنە ەكولوگيا مينيسترلىگىمەن جانە «KEGOC» اق-مەن بىرلەسىپ, ەلەكتر ەنەرگياسىنىڭ تۇراقتى ءوندىرىسىن دامىتۋ جونىندە ۇسىنىستار ەنگىزۋدى, سونداي-اق جەك جيناقتاۋىشتارىن ەنگىزۋ جونىندەگى ماسەلەلەردى پىسىقتاۋدى تاپسىردى.
ەنەرگەتيكا مينيسترلىگىنە اكىمدىكتەرمەن بىرلەسىپ جەك وڭىرلىك ايماقتارىن قۇرۋ ماسەلەلەرىن پىسىقتاۋ تاپسىرىلدى.
«گاز ەلەكتر ستانتسيالارىن ىسكە قوسۋ جەك قوسىمشا كولەمدەرىن ينتەگراتسيالاۋ بويىنشا ەنەرگيا جۇيەسىنىڭ مۇمكىندىكتەرىن ۇلعايتۋعا جول اشادى. وسىعان بايلانىستى ەنەرگەتيكا مينيسترلىگىنە «KEGOC» اق-مەن بىرلەسىپ, 2022 جىلدان باستاپ تەڭگەرىمدەۋشى نارىقتى ناقتى ۋاقىت رەجيمىندە ىسكە اسىرۋ بويىنشا جۇمىس جۇرگىزۋدى تاپسىرامىن», — دەدى ا. مامين.