بۇل اقپاراتتىڭ شىندىققا جاناسپايتىنى تۋرالى بىرىڭعاي جيناقتاۋشى زەينەتاقى قورىنىڭ ءباسپاسوز قىزمەتى حابارلادى.
«مەسسەندجەرلەر مەن الەۋمەتتىك جەلىلەردە تاراتىلعان قازاقستاندا زەينەت جاستىڭ وزگەرتىلۋى تۋرالى اقپارات شىندىققا جاناسپايدى. قولدانىستاعى زاڭناماعا سايكەس ەرلەر ءۇشىن زەينەتكەرلىك جاس - 63 جاس, ايەلدەر ءۇشىن بۇگىنگى تاڭدا – 60 جاس جانە ودان ءارى 2027 جىلعا قاراي 63 جاسقا دەيىن بىرتىندەپ ارتادى. قازاقستاندا بەلگىلەنگەن زەينەت جاسى حالىقارالىق جانە وتاندىق ساراپشىلار جۇرگىزگەن زەرتتەۋلەردىڭ ناتيجەلەرى مەن ۇزاق مەرزىمدى وزەكتى بولجامدارعا نەگىزدەلگەن. ەلدەگى زەينەت جاسى حالىقارالىق تاجىريبەگە جانە الەمدەگى قالىپتاسىپ وتىرعان ەكونوميكالىق جانە دەموگرافيالىق جاعدايعا سايكەس كەلەدى. سوندىقتان قازاقستاندا زەينەتاقى جاسىن وزگەرتۋ تۋرالى ماسەلە قارالمايدى. ازاماتتاردان جالعان اقپاراتقا نازار اۋدارماۋدى جانە اقپاراتتى تەك رەسمي كوزدەردەن عانا الۋدى سۇرايمىز», دەپ جازىلعان حابارلامادا.
بازالىق زەينەتاقى زەينەت جاسىنا جەتكەن بارلىق ازاماتتارعا وسى جۇيەگە قاتىسۋ وتىلىنە بايلانىستى ەڭ تومەنگى كۇنكورىس دەڭگەيىنىڭ 54%-ىنان 100%-ىنا دەيىنگى مولشەردە بەرىلەدى.
ياعني, ازامات نەعۇرلىم ۇزاق جۇمىس ىستەسە, بازالىق زەينەتاقىسىنىڭ مولشەرى سوعۇرلىم جوعارى بولادى. بۇل رەتتە قازىرگى ۋاقىتتا زەينەتكەرلىككە ەرتە شىعۋ بويىنشا جەڭىلدىكتەرگە يە ايەلدەرگە وزگەرىستەردىڭ قاتىسى جوق. ياعني, 5 جانە ودان دا كوپ بالا تۋعان (اسىراپ العان) جانە ولاردى سەگىز جاسقا دەيىن تاربيەلەگەن ايەلدەر – 53 جاس, سەمەي يادرولىق سىناق پوليگونىنىڭ توتەنشە جانە ەڭ جوعارى رادياتسيالىق قاتەر ايماقتارىندا 1949 جىلعى 29 تامىز بەن 1963 جىلعى 5 شىلدە ارالىعىنداعى كەزەڭدە كەمىندە 5 جىل تۇرعان ايەلدەر – 45 جاستا زەينەتكە شىعادى.
«سونىمەن قاتار, ازاماتتار بجزق-دا زەينەتاقى جيناقتارى جەتكىلىكتى بولعان كەزدە زەينەتاقى اننۋيتەتىنە قۇقىقتى (زەينەتاقى جاسىنا جەتكەنگە دەيىن زەينەتاقى جيناقتارىنان زەينەتاقى تولەمدەرىن الۋ قۇقىعىن) پايدالانا الادى. اعىمداعى جىلعى 1 قاڭتاردان باستاپ زەينەتاقى اننۋيتەتى شارتىن جاساسۋ جاسى تومەندەتىلىپ, 45 جاسقا تولعاننان باستالادى. بۇل رەتتە اننۋيتەتتىك تولەمدەر ەرلەر ءۇشىن 55 جاستان, ايەلدەر ءۇشىن – 52 جاستان بەرىلەدى», دەپ جازىلعان حابارلامادا.