الماتىدا روزىباكيەۆ كوشەسىندە كولىك اۋدارىلىپ, سالدارىنان كولىك جولاۋشىسى زارداپ شەكتى. اپات سالدارىنان قاتتى كەپتەلىس پايدا بولدى. وقيعا ورنىنان تۇسىرىلگەن ۆيدەو جەلىدە تارادى, دەپ حابارلايدى Egemen.kz
«روزىباكيەۆ-لەۆيتان كوشەلەرىنىڭ قيىلىسىندا كولىك اۋدارىلىپ, قاتتى كەپتەلىس بولدى. باعىتتارىڭىزدى الدىن الا جوسپارلاڭىزدار» دەلىنگەن حابارلامادا.
پوليتسيا دەپارتامەنتىنىڭ ءباسپاسوز قىزمەتى اپات 8 اقپاندا بولعانىن ايتتى. «Lifan» ماركالى اۆتوكولىگىنىڭ جۇرگىزۋشىسى روزىباكيەۆ كوشەسىنىڭ بويىمەن وڭتۇستىك باعىتتا, لەۆيتان كوشەسىنىڭ قيىلىسىندا سول جاق بۇرىلىستى جاساپ, روزىباكيەۆ كوشەسىنىڭ بويىمەن سولتۇستىك باعىتتا كەلە جاتقان «Volkswagen Transporter» ماركالى اۆتوكولىگىمەن سوقتىعىسقان. وسى جول اپاتى سالدارىنان «Lifan» كولىگى اۋدارىلىپ, اتالعان كولىك قۇرالىنىڭ جولاۋشىسى زارداپ شەكتى.
«اتالعان فاكتى قر قك 345-بابىنىڭ 2-بولىگى بويىنشا تىركەلدى. ءتيىستى ساراپتامالار تاعايىندالدى», دەيدى الماتى قالاسى جكو انىقتاۋ باسقارماسىنىڭ باستىعى, پوليتسيا مايورى ولجاس ءشارىپوۆ.