اۋە كومپانيالارى ەندى جولاۋشىلاردىڭ قارا ءتىزىمىن جۇرگىزە المايدى

2019 جىلعى 27 جەلتوقسانداعى Bek Air كومپانياسى ۇشاعىنىڭ اپاتىنان بيلىك ءبىر ساباق الۋعا ءتيىس ەدى. Bek Air اۋەكومپانياسىنا قاراستى Fokker 100 ۇشاعىنىڭ الماتى اۋەجايىنان كوتەرىلە بەرە, ۇشۋ-قونۋ جولاعىنان شىعىپ كەتىپ, تۇرعىن ۇيگە سوعىلا قۇلاۋى سالدارىنان 15 ادام قازا تاپتى, 49 ادام جاراقات الدى. وسىعان وراي ەل پرەزيدەنتى 28 جەلتوقساندى «ۇلتتىق ازا تۇتۋ كۇنى» دەپ جاريالادى.

سودان بيلىك ءۇنسىز قالعان-تىن. مەملەكەتتىڭ سول اپاتتان قانداي ساباق العانى قازىر عانا بەلگىلى بولىپ وتىر. يندۋستريا جانە ينفراقۇرىلىمدىق دامۋ مينيسترلىگى «قر كەيبىر زاڭنامالىق اكتىلەرىنە كولىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن جاريا ەتتى.

ءبىر جىلدان اسا ۋاقىت ىشىندە ءبىراز بىلىق انىقتالدى. اكىمدەر بارلىق دەرلىك اۋەجاي اينالاسىنداعى جەرلەردى ۇلەستىرىپ بەرىپ, اۋەجايلاردىڭ وركەندەۋىنە ءورىس قالدىرماپتى. بۇل جەر تەلىمدەرىنىڭ جاڭا قوجايىندارى ول جەردى ۇكىمەتكە قىمباتقا وتكىزىپ, پايدا تابۋى ءۇشىن جاسالسا كەرەك.

«الماتى, شىمكەنت, اقتوبە, نۇر-سۇلتان جانە باسقا دا كوپتەگەن قالا اۋەجايلارى پروبلەماعا تاپ بولدى, ولاردىڭ اينالاسىنداعى اۋماق تۇرعىن ءۇي قورىنا, اۋىل شارۋاشىلىعىنا جانە وزگە دە ماقساتتارعا تاراتىپ بەرىلگەن. سالدارىنان اۋەجايلاردىڭ ينفراقۇرىلىمىن ودان ارى دامىتۋ ءۇشىن قاجەتتى جەر جوق. سونىڭ كەسىرىنەن, ۇشۋ قاۋىپسىزدىگىنە قاتەر تۋىنداۋدا. بۇعان 2019 جىلعى جەلتوقسانداعى  Bek Air ۇشاعىنىڭ اپاتى دالەل», دەدى مينيسترلىك.