وزدەرىن قوعامدىق كولىك جۇرگىزۋشىلەرى دەپ تانىستىرعان ءبىر توپ ەر ادام قوستاناي تۇرعىندارىنا «8-اقپان كۇنى جۇمىسقا شىقپايمىز» دەگەن ۇندەۋ تاراتتى.
جىل باسىندا قالا اكىمدىگى قوعامدىق كولىكتەرگە ۆاليداتور ورناتىلىپ, 9-اقپاننان باستاپ اۆتوبۋستار جولاقى قابىلداۋدىڭ جاڭا تارتىبىنە تەگىس كوشەتىنىن مالىمدەگەن. اكىمدىك تولەم كارتالارىن الماعان جولاۋشىلار ءۇشىن 150 تەڭگە مولشەرىندەگى قولما-قول جول اقىسىن بەلگىلەپ وتىر.
الەۋمەتتىك جەلىنى شارلاپ كەتكەن بەينەجازبادا اۆتوبۋس جۇرگىزۋشىلەرى جولاقى تولەمىنىڭ جاڭا جۇيەسىنە نارازىلىق ءبىلدىردى. جۇرگىزۋشىلەر وزدەرىنە لايىقتى ەڭبەكاقى تاعايىنداپ, جۇمىس ىستەمەي قالعان ۆاليداتور ءۇشىن جاۋاپكەرشىلىكتەن بوساتۋدى تالاپ ەتەدى. سونداي-اق, كوندۋكتورلىق مىندەتتەن باس تارتىپ وتىر.
قوعامدىق كولىك جۇرگىزۋشىلەرى قولما-قول جول اقىسىنىڭ نەگىزسىز قىمباتتاۋى تۋرالى دا ماسەلە كوتەردى. «جولعا 150 تەڭگە تولەۋ قالا تۇرعىندارىنىڭ كوبىنە, اسىرەسە ستۋدەنتتەرگە, جاستارعا, قاراپايىم جۇمىسشى ادامدارعا اۋىر تيەدى», - دەدى بەينەجازباداعى ەر ادامداردىڭ ءبىرى.
قالا اكىمىنىڭ ورىنباسارى انۋاربەك كاسيموۆ بۇل جاعدايدان حاباردار ەكەنىن ايتتى.
«جۇرگىزۋشىلەردىڭ 8-اقپان كۇنى نارازىلىق تانىتۋى ەكىتالاي. ويتكەنى ءبىز, بىرىنشىدەن, تەندەردى ۇتىپ العان زاڭدى تۇلعالارمەن جۇمىس ىستەپ جاتىرمىز. كەلىسىم-شارتقا سايكەس, ولاردىڭ اۆتوبۋسى مىندەتتى تۇردە مارشرۋتقا شىعۋى ءتيىس. ەگەر كەلەڭسىز جاعداي ورىن الاتىن بولسا, قولىمىزدا كونكۋرستىق قۇجاتتار مەن جولاۋشىلار تاسىمالى تۋرالى كەلىسىم-شارت بار. ماسەلەنىڭ ءبارىن زاڭ شەڭبەرىندە شەشەمىز, - دەدى اكىم ورىنباسارى.