قازاقستاننىڭ سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە (اوسشك) مۇشە جانە بايقاۋشى مەملەكەتتەردىڭ قازاقستانداعى ەلشىلەرى جانە وزگە دە قوناقتار ءۇشىن ارنايى ۇيىمداستىرىلعان ديپلوماتيالىق ىسكەرلىك كلۋبتىڭ كەزەكتى وتىرىسىنا قاتىستى. سونداي-اق, بۇل ءىس-شاراعا اوسشك حاتشىلىعىنىڭ, «اتامەكەن» ۇكپ جانە جەرگىلىكتى ىسكەر توپتاردىڭ وكىلدەرى قاتىستى.
ش.نۇرىشەۆ ءوز بايانداماسىندا «قازىرگى جاعدايدا اوسشك ەلدەرى اراسىنداعى ەكونوميكالىق ولشەمدەگى ىنتىماقتاستىقتى نىعايتۋ ەرەكشە ماڭىزعا يە» ەكەنىن اتاپ ءوتتى. بۇل تۇرعىدا ول وسى كەزدەسۋ, سونداي-اق قازاقستاننىڭ 2020-2022 جج. ارالىعىنداعى اوسشك-ە توراعالىعى اياسىندا ۇيىمداستىرىلۋى جوسپارلانعان ءىس-شارالار, اتاپ ايتقاندا ىسكەرلىك كەڭەستىڭ وتىرىسى, بيزنەس فورۋم, تۋريزم جونىندەگى فورۋم جانە ت.ب. ءىس-شارالار مۇددەلى تاراپتار اراسىندا ىسكەرلىك بايلانىستار ورناتۋعا ىقپال ەتەتىنىنە سەنىم ءبىلدىردى.
سونىمەن بىرگە, ش.نۇرىشەۆ جاقىندا اوسشك-دە ەپيدەميولوگيالىق قاۋىپسىزدىك, دەنساۋلىق ساقتاۋ جانە فارماتسەۆتيكا سالاسىندا جاڭا سەنىم شاراسىنىڭ قابىلدانعانىن حابارلاپ, بۇل ىنتىماقتاستىق كوكجيەگىن ەداۋىر كەڭەيتەتىنىن جانە اوسشك ەلدەرىنىڭ مەملەكەتتىك مەكەمەلەرى مەن ىسكەر توپتارى اراسىندا ءوزارا ءىس-قيمىلدىڭ كەلەشەگىنە ۇلكەن جول اشاتىنىن اتاپ ءوتتى.
ءىس-شارا بارىسىندا اوسشك حاتشىلىعىنىڭ اتقارۋشى ديرەكتورى قايرات سارىباي, «اتامەكەن» ۇكپ باسقارما توراعاسىنىڭ ءبىرىنشى ورىنباسارى ناريمان ابىلشايىقوۆ, ديپلوماتيالىق ىسكەرلىك كلۋبتىڭ تەڭ توراعالارى يسلامبەك سالجانوۆ جانە ماجارستان ەلشىسى ميحاي گالوشفاي, بىرقاتار قازاقستاندىق ىسكەر توپ وكىلدەرى دە پرەزەنتاتسيالار جاسادى.
جيىنعا قاتىسۋشىلار ىنتىماقتاستىقتى كەڭەيتۋدىڭ ىقتيمال جولدارىن تالقىلاۋ ءۇشىن وسىنداي كەزدەسۋلەردىڭ پايدالى ەكەندىگىن اتاپ ءوتتى جانە بولاشاقتا وسى فورماتتاعى پىكىرتالاستاردى جالعاستىرۋعا قىزىعۋشىلىق ءبىلدىردى.