كەلەر دەپ كۇتەمىن ءوزىڭدى...

پوليتسەيلەردىڭ ايتۋىنشا, بۇل ماسەلەنىڭ ءتۇبى تالدىڭ تامىرىنداي تارامدالىپ جاتىر. مىسالى, قازىر اكەنىڭ زەكىگەنىن, شەشەنىڭ ۇرىسقانىن كوتەرە الماعان بالا بىردەن دالاعا بەزەتىن بولعان. ءبىر-بىرىمەن كەلىسپەي قالعان ەرلى-زايىپتىلار دا كوبىنە وسى جولدى تاڭداپ جاتادى. شاڭىراقتا كۇن سايىن قايتالاناتىن ۇرىس-كەرىستەن قاجىعان ءجاسوسپىرىم دە وزدىگىنەن ءومىر سۇرمەككە ۇمتىلىپ, ۇيدە جوق جىلۋدى سىرتتان ىزدەيدى. بىرەۋگە قارىز بولىپ, سونى وتەۋ ءۇشىن وزگە ايماققا بارىپ جۇمىسقا جالداناتىندار دا بار. باسقا قالادا وقىپ جۇرگەن بالاسى حابارسىز قالسا دا, اكە-شەشەسى ەڭ الدىمەن وسى ىشكى ىستەر ورگانىنا تابان تىرەيتىنى بەلگىلى.

قانداي جاعداي بولسا دا پوليتسەيلەر ءىز-ءتۇزسىز كەتكەندەردى ىزدەيدى. ءىزى شىق­تى دەگەن حابار ەستىلسە, وزگە وڭىرگە ىسسا­پارعا شىعادى, كەيدە سول جاقتاعى ارىپ­تەس­تەرىنە قولقا سالاتىن كەزدەرى دە بار. ايتەۋىر, قالاي بولعاندا دا جوعالدى دەگەندەردىڭ ءبىر دەرەگىن انىقتاپ, وتباسىنا ورالۋىنا مۇمكىندىك جاسايدى.

– حابار-وشارسىز كەتكەندەردى ىزدەۋ 10 جىلدان كەيىن توقتاتىلادى. جو­عال­عانداردىڭ ءبىر دەرەگى وسى ۋاقىت ىشىندە انىقتالىپ جاتادى. ول مەرزىم وتكەن­نەن كەيىن تابىلعاندار ازىرشە جوق. تاعى ءبىر ايتا كەتەرلىگى, وزگە مەملەكەت اۋماعىنان ءىزى شىققاندار كەزدەس­كەن جوق, ءىز-ءتۇزسىز كەتكەندەر اراسىندا ەلى­مىزدىڭ باسقا وڭىرىنەن تابىلىپ جات­قان­دار بار, – دەيدى وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى شامشيددين ءاميتوۆ.

ايتپاقشى, اڭگىمەمىزدىڭ باسى كا­سىپ­كەر­دىڭ جوعالۋىنان باستالعان ەدى عوي. وتكەن جىلى اقپان ايىنىڭ ەكىسىندە 1948 جىلى تۋعان سول ازاماتتىڭ حابارسىز كەتۋىنە بايلانىستى قالالىق پوليتسيا ءبولىمى ىزدەۋ سالعان, قىلمىستىق كودەكستىڭ 99-بابى 1-بولىگى نەگىزىندە ءبىر دەرەگىن انىقتاۋ باعىتىنداعى جۇمىستار ءالى جالعاسىپ جاتىر ەكەن.

بىلتىرعى جىل سوڭىندا جۇرتشىلىق الەۋمەتتىك جەلى ارقىلى وبلىس ورتالى­عىن­دا 32 جاستاعى كەلىنشەكتىڭ جوعال­عانىنان حاباردار بولعان ەدى. تۋىس­تا­رىنىڭ ايتۋىنشا, حابارسىز كەتەردەن بەس ايداي بۇرىن ءۇشىنشى بالاسىن بوسانعان كەلىنشەكتىڭ اياق استىنان مى­نە­زى تۇيىقتالىپ, كۇيزەلىسكە ءتۇسىپتى. ۇن­دەمەگەن كۇيى ۇيالى تەلەفونىن ۇيدە قال­دىرىپ, كوشەگە شىعىپ جۇرە بەرگەن. حالىق كوپ شوعىرلاناتىن جەرلەرگە, مارشرۋتتى كولىكتەرگە سۋرەتى ءىلىنىپ, رەسپۋبليكالىق تەلەارنالاردان كورسە­تىل­دى. جوعالعانىنا ەكى ايدان اسىپ بارا جات­قان وتىز سەگىز جاستاعى كەلىنشەكتى ىز­دەۋ ءبىر ساتكە دە توقتاعان ەمەس.

حابارسىز كەتكەندەردى ىزدەۋگە ەرىك­تى جاستاردىڭ جاردەمى كوپ بولىپ وتىر. قاراپايىم تۇرعىنداردان الىن­عان مالىمەت بويىنشا دا انىقتالىپ جات­قان­دار از ەمەس. پوليتسەيلەرگە الەۋ­مەت­تىك جەلى قول­­دا­نۋشىلارىنىڭ كومەگى تيەتىن دە كەزى بولادى.

وسىدان 2 جىل بۇرىن وبلىستا 130, بىل­تىر 118 ادام ىزدەستىرىلىپتى. كوبىنىڭ دەرەگى كوپ ۇزاماي-اق انىقتالعان. قازىر وبلىس پوليتسەيلەرى حابار-وشارسىز كەتكەن 48 تۇرعىندى ىزدەستىرۋ ۇستىندە.

كەيدە قاربالاس تىرلىكتىڭ جان-جا­عى­ڭا مويىن بۇرعىزباي, كوپ كورى­نىس­­كە كوز توقتاتىپ قاراۋعا مۇرشا بەر­مەيتىنى بار. ايالدامادا ىلىنگەن حابار­سىز كەت­كەندەردىڭ فوتوسىنا اسىعىس كوز جۇگىر­تىپ, كوشەدەگى كەزبەلەردىڭ قاسىنان تەزىرەك سىتىلىپ كەتكىمىز كەلىپ تۇراتىنى دا بار.

ءبىر ءسات توقتاپ, اينالاڭىزعا كوز سا­لىڭىزشى. جوعالعان جاقىنىنان كۇدەر ۇزبەي, كەلەر دەپ كۇتكەن جانعا ءسىزدىڭ دە كومەگىڭىز ءتيىپ قالار. ءبارى مۇمكىن, ويتكەنى بۇل ءومىر عوي...

قىزىلوردا