ESPN Deportes اقپارات اگەنتتىگى گەننادي گولوۆكين مەن ساۋل «كانەلو» الۆارەس اراسىنداعى جەكپە-جەكتەر تريلوگياسىنىڭ سوڭعى بولىگى وسى جىلدىڭ قىركۇيەگىندە ءوتۋى مۇمكىن, دەپ حابارلايدى Egemen.kz
دەسە دە, گولوۆكيننىڭ مەكسيكالىق سپورتشى حايمە مۋنگيامەن مامىر ايىندا جوسپارلانعان ايقاسىندا باسىم ءتۇسۋى – مىندەتتى شارتى بولىپ وتىر. اتالعان جۇدىرىقتاسۋدىڭ جەڭىمپازى شارشى الاڭدا الۆارەسكە قارسى شىعۋ مۇمكىندىگىن ارتتىرادى.
«ەگەر گولوۆكين (مۋنگيامەن ايقاستا) جەڭسە, قىركۇيەكتە «كانەلومەن» ءۇشىنشى جەكپە-جەكتىڭ وتكىزىلۋىنە قول جەتكىزەدى, ال ەگەر حايمە جەڭسە, بۇل بولاشاقتا «كانەلوعا» قارسى شىعا الاتىن جاڭا جۇلدىزدىڭ جانعانى», دەپ جازدى جۋرناليست سالۆادور رودريگەس.
گولوۆكين-مۋنگيا اراسىنداعى جەكپە-جەكتىڭ وتكىزىلۋىنە بوكسشىلاردىڭ تاراپتارى دا, DAZN ستريمينگتىك قىزمەتى دە قىزىعۋشىلىق تانىتىپ وتىر.