الماتى قالاسىندا تەحنيكا جوندەۋ ورتالىعى ورتەنىپ, 20 اۆتوكولىك تولىعىمەن جانىپ كەتتى. وقيعا كۋالەرى مەن توتەنشەلىكتەر قىزىل جالىن باستالعان كەزدە تەك 15 ماشينانى سىرتقا شىعارىپ ۇلگەرگەن. ولاردىڭ يەلەرى ەندى قايدا شاعىمدانارىن بىلمەي ءارى-ءسارى بولۋدا, دەپ حابارلايدى Egemen.kz الماتى تەلەارناسىنا سىلتەمە جاساپ.
10 جىل بويى جۇمىس ىتەپ كەلگەن بۇل تەحنيكالىق جوندەۋ ورتالىعىنا ادامدار سەنىممەن كولىگىن قالدىرىپ كەلگەن. الايدا بۇگىن ولار جوندەلگەن كولىكتەرىنىڭ ورنىنا, ورتەنگەن تەمىر بولشەكتەردى الىپ كەتەمىز دەپ ەش ويلاماعان.
الاپات ءورت جايلى حابارلاما توتەنشە جاعداي دەپارتامەنتىنىڭ كەزەكشى پۋلتىنە كەشكى 22.00 شاماسىندا كەلىپ تۇسكەن. وقيعا ورنىنا دەرەۋ جەتكەن توتەنشەلىكتەر جالپى اۋماعى 1300 شارشى مەتردى قۇرايتىن نىساننىڭ 600 شارشى مەترىن ءسوندىرىپ ۇلگەرگەن. سونىمەن قاتار, 4 گاز-بالون مەن 15 اۆتوكولىكتى قىزىل جالىننىڭ ىشىنەن الىپ شىققان. ابىروي بولعاندا, جاقىن ورنالاسقان جانارماي قۇيۋ بەكەتىنە جالىن جەتپەگەن.
«جالپى ءورت ءسوندىرۋ جۇمىستارىنا 40 استام ادام جەكە قۇرام جانە 15 بىرلىك تەحنيكا جۇمىلدىرىلدى. ابىروي بولعاندا, زارداپ شەككەندەر, مەرت بولعاندار جوق», دەدى قالالىق تجد رەسمي وكىلى گۇلدانا نۇرىمبەتوۆا.
كولىگىن جوندەتۋگە قالدىرىپ, جاياۋ قالعان راۆشان حامراەۆ بۇنداي سۇمدىقتىڭ بولارى ءۇش ۇيىقتاسا تۇسىنە كىرمەگەنىن ايتادى. تەحنيكالىق جوندەۋ ورتالىعى وعان كولىگىن 4 كۇن بۇرىن جوندەۋدەن وتكىزىپ, تابىستاۋ كەرەك بولعان. الايدا تەمىر تۇلپاردىڭ ورنىنا ورتەنگەن قالدىعىن عانا العان ول, نە ىستەرىن بىلمەي دال.
«بۇگىن تاڭەرتەڭ وسىندا كەزدەيسوق كەلىپ, مىنا سۇمدىقتى كوردىم. كولىگىم كۇل-تالقان بولىپ جانىپ كەتتى. كولىك جوندەۋ ورتالىعىنىڭ يەسىنە حابارلاسسام, تۇتقانى كوتەرمەيدى. بۇل كولىك جالعىز تابىس كوزىمىز ەدى. ونىڭ ۇستىنە ءالى نەسيەسىن تولەپ بىتپەدىم. تاكسي بولىپ جۇمىس ىستەدىم. ەندى مىنە نە ىستەرىمدى, كىمنەن سۇرارىمدى بىلمەيمىن», دەدى جابىرلەنۋشى راۆشان حامراەۆ.
ال ورتەنگەن ورتالىق باسشىلارى قاساقانا ءورت قويىلۋى مۇمكىن دەيدى. ايتۋىنشا, جارامسىز بولىپ قالعان كولىك يەلەرىنە شىعىندى كىم وتەيتىنىن تەك ساراپتامادان كەيىن عانا ايتا الادى.
«كۇزەتشى جالىن باستالىسىمەن بىردەن ءورت سوندىرۋشىلەرگە حابارلاستى. قاساقان ورتەۋ بولۋى مۇمكىن. ەشكىم بىلمەيدى. بارلىعىن ساراپتاما ناتيجەسى كورسەتەدى. ورتەنگەن كولىك يەلەرىنە دە شىعىندى كىم وتەيتىنى دە سودان كەيىن بەلگىلى بولادى», دەدى ورتەنگەن تجو اكىمشىسى گەننادي فيلليپوۆ.
قازىر ءتيىستى ساراپتاما تاعايىندالىپ, ءورتتىڭ نەدەن تۋىنداعانى انىقتالىپ جاتىر.