ەمبى قالاسىندا يەسىز ۇيلەر قايتا جوندەلىپ, كەزەكتە تۇرعاندارعا بەرىلەدى

اقتوبە وبلىسىنداعى توعىز جولدىڭ تورابىندا ورنالاسقان شاعىن  قالالاردىڭ ءبىرى –ەمبىدە  كوپ قاباتتى ۇيلەردى قايتا جوندەۋ, جول سالۋ, كوشەلەردى اباتتاندىرۋ جۇمىستارىنىڭ جۇيەلى  جۇرگىزىلۋىنىڭ ارقاسىندا شاعىن قالانىڭ كەلبەتى بىرتىندەپ وزگەرىپ كەلەدى.

بۇرىن قالاعا كىرەبەرىستەگى  باۋىرجان مومىش ۇلى اتىنداعى كوشە بويىنداعى  يەسىز قالعان قوس بەس قاباتتى  تۇرعىن ءۇيدىڭ  سىرتقى كەلبەتى ادام شوشىرلىقتاي بولاتىن. ەمبىلىكتەر  اكىمنىڭ ەسەپ بەرۋ جيىندارىندا جىل سايىن ونى ماسەلە ەتىپ كوتەرىپ جۇرسە دە, كوپتەن قولعا الىنباي جۇرگەن ءىس ەدى.  يەسىز ۇيلەردىڭ تاريحى 1994 جىلدان  باستاۋ الادى. سول جىلدارى قوس ءۇيدىڭ پاتەر يەلەرى بىرىنەن سوڭ ءبىرى الىس شەتەلدەرگە كوشە باستاعاندا, ۇيلەردىڭ ەسىك-تەرەزەلەرى تۇگەلدەي تونالىپ, ەڭ سوڭىندا بەتون قابىرعالار عانا ۇڭىرەيىپ قالدى. بىرەر جىل بۇرىن  №11-ءشى ۇيدەگى  45 پاتەر مەن №15-ءشى ۇيدەگى 90 پاتەرگە تولىق جوندەۋ جۇمىستارى جۇرگىزىلدى.  شاتىرلارى جاڭالانىپ, ەسىك-تەرزەلەرى قايتا قوندىرىلىپ, پودەزدەرى جوندەلىپ, كوممۋنالدىق جەلىلەرگە قوسىلعان سوڭ قالانىڭ كەلبەتىنە كورىك قوساتىن جاقسى عيماراتقا اينالدى. قازىرگى ۋاقىتتا كۇردەلى  جوندەۋ جۇمىستارى اياقتالىپ, ارلەۋ جۇمىستارى  عانا قالدى.  ەندى جاقىن ارالىقتا وسى ۇيدەگى 135 پاتەر  ەمبى قالاسىندا تۇرعىن ءۇي كەزەگىنە تۇرعان الەۋمەتتىك  جاعىنان وسال توپتاعى ازاماتتار –مۇگەدەكتەر, اتا-اناسىز قالعان بالالار مەن كوپ بالالى وتباسىلارعا بەرىلەدى دەپ حابارلايدى مۇعالجار اۋداندىق تۇرعىن ءۇي قاتىناستارى ءبولىمى.