تۇركىستان وبلىسىندا العاشقى وڭىرلىك ەكسپورتتاۋشىلار كەڭەسى ءوتتى. جيىندا وبلىس اكىمدىگى تاراپىنان ينۆەستيتسيالار تارتۋ جانە ەكسپورتتى دامىتۋ ماسەلەلەرى تالقىلاندى, دەپ حابارلايدى Egemen.kz
كەڭەسكە تۇركىستان وبلىسى اكىمىنىڭ ورىنباسارى مەيىرجان مىرزاليەۆ پەن «QazTrade» ساۋدا ساياساتىن دامىتۋ ورتالىعى» اق باس ديرەكتورى ازامات اسقار ۇلى, «اتامەكەن» ۇكپ جانە اكىمدىكتىڭ ءتيىستى باسقارما باسشىلارى جانە تۇركىستان وبلىسىنىڭ 62 ءىرى ەكسپورتتاۋشىسى قاتىستى.
باسقوسۋدا ەكسپورتتاۋشىلاردى قولداۋ بويىنشا مەملەكەتتىك شارالاردى كەڭەيتۋ جانە ولاردى ءبىر تەرەزەگە شوعىرلاندىرۋ ماسەلەسى ءسوز بولدى.
سونداي-اق, وڭدەلگەن وتاندىق تاۋارلاردى جىلجىتۋعا جۇمسالعان شىعىنداردىڭ ءبىر بولىگىن وتەۋ ماسەلەسى ورتاعا سالىندى.
جيىن بارىسىندا وبلىس اكىمىنىڭ ورىنباسارى مەيىرجان مىرزاليەۆ وڭىردەگى ەكسپورتتىڭ قازىرگى جاعدايى مەن ءوڭىردىڭ ەكسپورتتىق الەۋەتى تۋرالى ايتىپ بەردى.
مەيىرجان مىرزاليەۆتىڭ ايتۋىنشا, وبلىستا ەكسپورتقا باعىتتالعان 224 كاسىپورىن ءتىزىمى جاساقتالعان.
ونىڭ ىشىندە ماشينا جاساۋ, مەتاللۋرگيا, تاماق, جەڭىل, فارماتسەۆتيكا جانە اعاش وڭدەۋ سالالارىندا جۇمىس ىستەيتىن 60-تان استام بەلسەندى ەكسپورتتاۋشى كومپانيا جۇمىس ىستەيدى.
«وتكەن جىلى ەكسپورتقا باعدارلانعان جاڭا كاسىپورىندار ەسەبىنەن ءبىز ەكسپورتتىڭ جالپى كولەمىندەگى وڭدەلگەن تاۋارلاردىڭ جوعارى ۇلەسىن ساقتاپ قالدىق – قازىر ول شامامەن 50% قۇرايدى», دەدى مەيىرجان مىرزاليەۆ.
اكىم ورىنباسارى ەكسپورتتاۋشىلاردى قولداۋدىڭ مەملەكەتتىك شارالارىن كەڭەيتۋ جانە ولاردى ءبىر تەرەزەگە شوعىرلاندىرۋ ءوڭىر وندىرۋشىلەرىنە ەلەۋلى قولداۋ كورسەتەتىنىنە سەنىم ءبىلدىردى.
بۇل ەكسپورتتىق جەلىنى كەڭەيتىپ, سىرتقى نارىقتاعى وتاندىق ءونىم كولەمىن ارتتىراتىنىن باسا ايتتى.