باتىس قازاقستان وبلىسىندا جىل باسىنان بەرى 83 مۇعالىمنەن كوروناۆيرۋس انىقتالدى, دەپ حابارلايدى Egemen.kz
باتىس قازاقستان وبلىستىق سانيتارلىق-ەپيدەميالىق باقىلاۋ دەپارتامەنتى ءباسپاسوز قىزمەتىنىڭ حابارلاۋىنشا, 1 قاڭتاردان بەرى 139 وقۋشىدان ۆيرۋس تابىلدى.
اۋماقتىق باس مەملەكەتتىك سانيتار دارىگەرلەرىنىڭ قاۋلىسىنا سايكەس 28 مەكتەپتە 39 سىنىپ كارانتينگە جابىلدى. كوروناۆيرۋسپەن اۋىرعانداردىڭ كوپشىلىگى ۆيرۋستى ءۇي وشاعىندا جۇقتىرعان. وبلىستا كەشە ۆاكتسينالاۋ باستالىپ, وبلىس اكىمىنىڭ ورىنباسارى مەن باس مەملەكەتتىك سانيتار دارىگەرى العاشقىلاردىڭ قاتارىندا ەكپە سالدىردى.
وبلىستىق دەنساۋلىق ساقتاۋ باسقارماسىنىڭ مالىمەتىنە سايكەس وڭىردە 8 مىڭداي مەديتسينا قىزمەتكەرى, 23412 پەداگوگ, 39605 ستۋدەنت, جۇرەك-قان تامىرلارى جۇيەسى جانە تىنىس ورگاندارى اۋرۋلارىمەن ديسپانسەردە تۇراتىن 100926 ادام, سونداي-اق مەديتسينالىق-الەۋمەتتىك مەكەمەلەردىڭ 2471 قىزمەتكەرى جانە جابىق بالالار ۇيىمدارىنىڭ 156 مامانى ەكپە سالدىراتىن بولادى.