قازاقستان رەسپۋبليكاسى پارلامەنتى ءماجىلىسىنىڭ سىرتقى ىستەر, قورعانىس جانە قاۋىپسىزدىك كوميتەتىنىڭ توراعاسى ايگۇل قۇسپان ەۋروپا پارلامەنتىنىڭ دەپۋتاتى, «قازاقستان - ەۋروپالىق وداق» دوستىق توبىنىڭ توراعاسى ر. چارنەتسكيگە قر پرەزيدەنتى قاسىم-جومارت توقاەۆتىڭ جارلىعىنا سايكەس ماراپاتتالعان II دارەجەلى «دوستىق» وردەنىن تابىس ەتتى, دەپ حابارلايدى Egemen.kz.
ا.قۇسپان جوعارى ناگرادا ەۋروپالىق ساياساتكەرگە ونىڭ قازاقستان پارلامەنتى مەن ەۋروپالىق پارلامەنت اراسىنداعى ءتيىمدى ءوزارا ءىس-قيمىلدى جولعا قويۋعا قوسقان قوماقتى ۇلەسىن مويىنداۋ بەلگىسى رەتىندە بەرىلگەنىن حابارلادى. ونىڭ پارلامەنتارالىق ىنتىماقتاستىقتى ۇدەمەلى دامىتۋدىڭ جاڭا قۋاتتى وزەگى بولعان دوستىق توبىن قۇرۋ جونىندەگى كۇش-جىگەرى اتاپ ءوتىلدى.
ءوز كەزەگىندە, ەۋرودەپۋتات قازاقستان مەن ەۋروپالىق وداق اراسىنداعى دوستىق قارىم-قاتىناستاردى ىلگەرىلەتۋ جونىندەگى كۇش-جىگەرىن وسىنداي باعالاعانى ءۇشىن العىسىن ءبىلدىرىپ, ولاردى جان-جاقتى نىعايتۋ ءۇشىن ودان ءارى جۇمىس ىستەۋگە نيەتتى ەكەنىن ايتتى.