وسكەمەن قالاسىندا ەرتىس وزەنىنە باتىپ بارا جاتقان ايەلدى قۇتقارعان 20 جاستاعى جىگىت پوليتسيا قاتارىنا شاقىرىلدى, دەپ حابارلايدى ەgemen.kz
قالالىق پوليتسيا باسقارماسىنىڭ باستىعى اندرەي مۋلا ەرلىك تانىتقان ارتەمگە ءوز ريزاشىلىعىن ءبىلدىرىپ, گراموتا مەن ەستەلىك سىيلىق تابىستادى.
«باتىلدىعىڭ مەن بەرىك ۇستانىمىڭ ماقتاۋعا تۇرارلىق. كەلەشەكتە سەنى پوليتسيا قاتارىنان كورگىمىز كەلەدى», دەدى ءوز سوزىندە ا.مۋلا.
ال ارتەم «بۇركىت» ارنايى جاساعىندا قىزمەت ەتكىسى كەلەتىندىگىن جەتكىزدى. بالالار ۇيىندە تاربيەلەنگەن ول بۇگىندە ءبىر شاڭىراقتىڭ يەسى. بوس ۋاقىتىندا سپورتپەن اينالىسقاندى ۇناتادى. اسىرەسە بوكسقا دەگەن قىزىعۋشىلىعى جوعارى.
«سۋعا باتىپ بارا جاتقان ايەلدى كورگەندە قاراپ تۇرا المادىم. بار ويىم – ونى تەزىرەك قۇتقارۋ بولدى. مەنىڭ ورنىمدا كەز كەلگەن ادام سولاي ىستەر ەدى. شىنىمدى ايتسام, سول ءۇشىن پوليتسيا باسقارماسىنىڭ باستىعىنان ماراپات الامىن دەپ ەش ويلاماپپىن», دەدى جىگىت.
ەستەرىڭىزگە سالا كەتسەك, كەشە 1960 جىلى تۋعان قالا تۇرعىنى وزەننەن سۋ الىپ جاتقاندا تايىپ كەتكەن. وزەنگە قۇلاپ, 100 مەتردەي اققان ول بۇتاقتان ۇستاپ قالىپ, كومەككە شاقىردى.
«سول ماڭايدان ءوتىپ بارا جاتقان ارتەم مەن ونىڭ جۇبايى ۆەرا جانۇشىرا ايقايلاعان داۋىستى ەستىگەن. ايەلدىڭ ارى قاراي اعىپ كەتۋگە شاق قالىپ تۇرعانىن كورگەن 20 جاستاعى جىگىت ەش ويلانباستان وزەنگە سەكىردى. ءجۇزىپ جەتكەنمەن ونى جاعاعا شىعارا المادى. بىراق سوندا دا ايەل ادامنىڭ كۇرتەسىنەن ۇستاپ, جان-جاعىنا ايقايلاپ كومەك سۇرادى. بىرنەشە مينۋتتان كەيىن پوليتسەيلەر مەن قۇتقارۋشىلار كەلىپ, ولاردى سۋدان شىعارىپ الدى», دەلىنگەن وسكەمەن قالالىق پوليتسيا باسقارماسى تاراتقان اقپاراتتا.