ەندى جالاقىنىڭ قانشا پايىزى سالىق پەن زەينەتاقىعا ۇستالاتىنىن تەكسەرۋگە بولادى

مەملەكەتتىك كىرىستەر كوميتەتى «e-Salyq Azamat» («App Store» جانە»Play Market») ءموبيلدى قوسىمشاسىنداعى «قىزمەتكەردىڭ ەڭبەگىنە اقى تولەۋ» سەرۆيسىن ىسكە قوستى.

ول قىزمەتكەرگە ەسەپتەلگەن جەكە تابىس سالىعىنىڭ, زەينەتاقى جارنالارىنىڭ, مىندەتتى الەۋمەتتىك اۋدارىمداردىڭ جانە مەديتسينالىق ساقتاندىرۋعا الەۋمەتتىك اۋدارىمداردىڭ سومالارىن قاراۋىنا مۇمكىندىك بەرەدى. سەرۆيس 2020 جىلدىڭ 1 توقسانىنان باستاپ سالىق كەزەڭدەرى بويىنشا قولجەتىمدى.

دەرەكتەرگە قولجەتكىزۋ ءۇشىن ەلەكتروندىق تسيفرلىق قولتاڭبا ارقىلى نەمەسە SMS پارول ارقىلى سايكەستەندىرۋدەن ءوتۋ قاجەت. SMS ءموبيلدى ازاماتتار بازاسىندا (حقكو) تىركەلگەن ۇيالى تەلەفون نومىرىنە تۇسەدى. دەرەكتەردى قاراۋ ءۇشىن «سالىق ءاميانى», «قىزمەتكەردىڭ ەڭبەگىنە اقى تولەۋ» بولىگىنە ءوتىپ, جىل مەن كەزەڭدى تاڭداۋ قاجەت. باستاپقى كەزەڭدە مىنا جەكە تۇلعالار اتالعان دەرەكتەردى قاراي الادى:

- جۇمىس بەرۋشىلەر بيۋدجەتپەن ەسەپ ايىرىسۋ كەزىندە جالپىعا بىردەي بەلگىلەنگەن رەجيمدى قولدانسا;

- نەمەسە جۇمىس بەرۋشىلەر وڭايلاتىلعان دەكلاراتسيا نەگىزىندە ارنايى سالىق رەجيمىن قولدانسا.

مالىمەتتەر بولماسا نەمەسە دەرەكتەر سايكەس كەلمەسە, سالىق ەسەپتىلىگىن تۇزەتۋ ءۇشىن جۇمىس بەرۋشىگە جۇگىنۋ قاجەت. مكك «E-Salyq Azamat» تەگىن ءموبيلدى قوسىمشاسىن «App Store» نەمەسە «Play Market» - تەن جۇكتەۋگە بولاتىنىن ەسكە سالادى.