الداعى ۋاقىتتا قايىرىمدىلىق جانە ۆولونتەرلىك جونىندەگى زاڭ جوبالارىن جەتىلدىرۋ جوسپاردا بار. بۇل تۋرالى قر اقپارات جانە قوعامدىق دامۋ ءمينيسترى ايدا بالاەۆا ءمالىم ەتتى, دەپ حابارلايدى Egemen.kz
«ارينە, ازاماتتىق قوعاممەن بايلانىس ورناتۋ – مينيسترلىك قۇزىرىنداعى نەگىزگى سالالاردىڭ ءبىرى. بۇل رەتتە, 2020 جىلى 27 تامىزدا مەملەكەت باسشىسىنىڭ جارلىعىمەن ازاماتتىق قوعامدى دامىتۋ تۇجىرىمداماسى قابىلداندى. اتالعان قۇجات ەلىمىزدەگى ازاماتتىق سەكتوردى دامىتۋدىڭ الداعى ون جىلعا ارنالعان نەگىزگى ستراتەگيالىق باعىتتارىن ايقىندايدى. ونىڭ ۇلكەن ءبىر ءبولىمى – بۇل ساپالى زاڭ شىعارۋ. بۇل رەتتە, وزدەرىڭىز بىلەسىزدەر, قوعامدىق كەڭەستەردىڭ مۇمكىندىگىن كەڭەيتەتىن جانە مۇنداي كەڭەستەردى كۆازيمەملەكەتتىك سەكتوردا دا قۇرۋدى مىندەتتەيتىن زاڭعا قول قويىلدى. بۇگىندە «قوعامدىق باقىلاۋ تۋرالى» جاڭا زاڭ جوباسى مەن وعان ىلەسپە «ونلاين-پەتيتسيا» تۋرالى تولىقتىرۋلار قوعامدا قىزۋ تالقىدان ءوتىپ جاتىر», دەدى ا. بالاەۆا مينيسترلىكتىڭ كەڭەيتىلگەن القا ماجىلىسىندە.
ونىڭ ايتۋىنشا, الداعى ۋاقىتتا قايىرىمدىلىق جانە ۆولونتەرلىك جونىندەگى زاڭ جوبالارىن جەتىلدىرۋ جوسپاردا بار.
«وزدەرىڭىز كۋا بولدىڭىزدار, پرەزيدەنت باستاماسىمەن جاريالانعان «ۆولونتەرلەر جىلى» – ەرىكتىلەر قوزعالىسىنىڭ دامۋىنا تىڭ سەرپىن بەرگەن جاسامپاز جوبا بولدى. سوندىقتان دا, ەل پرەزيدەنتى ۇكىمەتكە بۇل جۇمىستى تۇراقتى تۇردە جالعاستىرۋدى تاپسىردى. قازىر ارنايى جول كارتاسى جاساقتالىپ, ىسكە اسۋعا دايىن. مۇنىڭ ءوزى - «ۆولونتەرلىك» ۇعىمنىڭ اۋقىمى كەڭ جانە ول ءبىر جىلمەن نەمەسە ءبىر جوبا اياسىندا عانا شەكتەلمەيتىندىگىن كورسەتەدى», دەدى مينيستر.