بيىل قار قالىڭ ءتۇستى. جاڭا جىل مەرەكەسىنەن كەيىن قارلى بوران كوبەيىپ, قولات-قويناۋدى, ساي-سالانى قاسات قار كەپتەپ تاستادى. بۇل جاي جالپاق جونداعى جۇگىرگەن اڭعا قيىندىق تۋعىزىپ وتىر. اسىرەسە, تۇزدە تەبىندەپ كۇن كورەتىن كيىكتەرگە قاتەر ءتوندى.
جاڭا جىلعا دەيىن جايماشۋاق ەدى. قاتال قىس مىنەزىن قاڭتار اۋا تانىتتى. كەيبىر تاۋلىكتەردە سىناپ باعاناسى 42 گرادۋسقا دەيىن جەتتى. بەت قاراتپايتىن, اتان تۇيەنى الىپ جىعاتىن بوران دا سوقتى. ايازدان بۇرىن اق قاردىڭ ادەتتەگىدەن مول ءتۇسۋى كيىكتەر ءۇشىن قولايسىز بولدى. وبلىستىق ورمان شارۋاشىلىعى جانە جانۋارلار الەمى اۋماقتىق ينسپەكتسياسىنىڭ باسشىسى لاشىنتاي دۇيسەنوۆتىڭ ايتۋىنا قاراعاندا, كيىك اتاۋلى قارى از, قىسى جۇمساق وڭتۇستىككە اۋماي, سولتۇستىكتە قىستاپ قالعان. دەنى – قورعالجىن, ەگىندىكول, جاقسى, اتباسار اۋداندارىندا.
قالىڭ قار تەبىنگە مۇمكىندىك بەرمەي تۇر. سونىڭ سالدارىنان كيىك شىعىنى دا ورىن الۋدا. ىلە شارا قولدانباسا, تىگەرگە تۇياق قالماۋى دا ابدەن مۇمكىن. كيەلى جانۋارلاردى ساقتاپ قالۋ ءۇشىن اۋدانداعى شارۋاشىلىقتار ارنايى تەحنيكا ءبولىپ, كيىك جايىلىمدارىن قاردان تازالاۋعا كىرىسكەن.
– بىلتىر جەلتوقسان ايىنىڭ باسىندا «قورعالجىن» مەملەكەتتىك تابيعي قورىعىنىڭ اۋماعىندا 25 مىڭعا جۋىق كيىك بار ەدى. قازىر بارلىق كاردونداردا قورىقشىلار سانىن كوبەيتتىك. جەدەل جولعا شىعۋ ءۇشىن جانار-جاعار ماي قورىن جاسادىق. قار تازالاعىشتىڭ كومەگىمەن جايىلىمداردى ارشىپ جاتىرمىز, – دەيدى قورىق ديرەكتورى اسقار سەكسەنبيەۆ.
اۋماقتىق ينسپەكتسيا باسشىسى لاشىنتاي دۇيسەنوۆ قالىپتاسىپ وتىرعان بارلىق جاعدايدى تاپتىشتەپ بايانداپ, وبلىس باسشىلىعىنا حات جازىپ, كومەك سۇراعان. جانۋارلارعا جاناشىر كوزقاراستىڭ ناتيجەسىندە, شۇعىل شارالار قولعا الىندى. 2008 جىلى ەلىمىزدە ۇزىن-ىرعاسى 60 مىڭعا جەتەر-جەتپەس بولىپ قانا قالعان, مەملەكەتىمىزدىڭ ەرەكشە قامقورلىعىنا الىنعان ءارى حالىقارالىق قىزىل كىتاپقا ەنگىزىلگەن كيىكتەردى قورعاۋعا جەرگىلىكتى اتقارۋشى ورگانداردىڭ قامقورلىق تانىتۋى ابدەن ءجون. سايىن دالانىڭ ءسانىن كەلتىرەتىن كيىكتى قورعاۋ – بارشاعا مىندەت.
اقمولا وبلىسى