پاۆلودار وبلىسىنىڭ باس سانيتار دارىگەرىنىڭ جاڭا قاۋلىسىنا سايكەس وسى جىلدىڭ 25 قاڭتارىنان 8 اقپانعا دەيىن كارانتيندىك شەكتەۋ شارالارى بەكىتىلگەن. وڭىردەگى ەپيدەميالىق احۋالدىڭ «قىزىل» جاعدايى ۇكىمەت وتىرىسىندا دا ايتىلدى. سوڭعى اپتادا وبلىستا ىندەت تارالۋىنىڭ 1 339 جاعدايى تىركەلدى.
ەپيدەميالىق جاعدايدى باعالاۋدىڭ وڭىرلىك تىزبەسىنە سايكەس پاۆلودار, اقسۋ جانە ەكىباستۇز قالالارى مەن 9 اۋدانى ءالى دە «قىزىل ايماقتا», ال باياناۋىل اۋدانى «سارى ايماققا» ەندى. بۇل جاعداي, ەپيدەميولوگتاردىڭ باعالاۋى بويىنشا «قولدانىستاعى كارانتيندىك شارالاردى ساقتاۋدى جانە ولاردىڭ ساقتالۋىن باقىلاۋدى كۇشەيتۋدى» تالاپ ەتەدى. سوندىقتان ونلاين بايلانىس ارقىلى ىندەتتىڭ تارالماۋىنا وراي جاسالاتىن ءىس-قيمىل شارالارى جونىندەگى جەدەل شتابتىڭ وتىرىسى ءوتتى.
سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى باتىربەك اليەۆتىڭ حابارلاۋىنشا, اقسۋ قالاسىندا اپتا سايىن سىرقاتتاردىڭ كوبەيۋى بايقالۋدا. قالاداعى 100 مىڭ تۇرعىنعا شاققاندا كورسەتكىش جوعارى سانالادى. جەلەزين اۋدانىندا, سونداي-اق اققۋلى جانە تەرەڭكول اۋداندارىندا دا 100 مىڭ تۇرعىنعا شاققاندا اپتالىق كورسەتكىش وبلىستىق دەڭگەيدەن ەكى ەسە جوعارى.
وتىرىس بارىسىندا اتالعان قالالار مەن اۋدانداردىڭ اكىمدەرىنە ەپيدەميالىق احۋالدى جاقسارتۋ ءۇشىن تۇبەگەيلى شارالار قابىلداۋ تاپسىرىلدى. شتاب وتىرىسىندا جىل باسىنان بەرى 237 ناۋقاس تىركەلگەن ءوڭىردىڭ ءىرى ونەركاسىپ كاسىپورىندارى قىزمەتكەرلەرىنىڭ اراسىنداعى سىرقاتتانۋشىلىق دەڭگەيى دە تالقىلاندى. ويتكەنى اقسۋ قالاسىندا ەپيدەميالىق جاعداي قوعامدىق كولىكتەگى الەۋمەتتىك قاشىقتىقتىڭ ساقتالماۋىنان ۋشىققان. سوندىقتان قوعامدىق كولىكتەگى جولاۋشىلار سانىن ازايتۋ ءۇشىن جەرگىلىكتى كاسىپورىندار باسشىلىعى زاۋىتتىڭ بىرنەشە اۆتوبۋسىن قالالىق مارشرۋتتارعا جىبەرۋ تۋرالى شەشىم قابىلدادى.
ال كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى ايبەك تۇرسىنعاليەۆتىڭ مالىمەتىنشە, بىلتىر 10 330 رەيد جۇرگىزىلىپ, 26 703 كاسىپكەرلىك نىساندارى تەكسەرىلدى, 2 693 ەرەجە بۇزۋشىلىق انىقتالىپ, 986 كاسىپكەر اكىمشىلىك جاۋاپكەرشىلىككە تارتىلدى. بيىل جىل باسىنان بەرى 7 كاسىپكەرگە ايىپپۇل سالىندى. وبلىس بويىنشا 661 رەيد جۇرگىزىلىپ, 6 041 نىسان تەكسەرىلدى. جىل باسىنان بەرى 41 مەكەمەدە كارانتين تالاپتارىن بۇزۋ انىقتالدى. باسقارما باسشىسىنىڭ ايتۋىنشا, كاسىپكەرلىك نىساندارى مونيتورينگ توپتارىنىڭ جۇمىستارىنا كەدەرگى كەلتىرەدى. ولار وزدەرىنىڭ تاسىلدەرىن قولدانادى. ەسىكتەرىن, تەرەزەلەرىن جاۋىپ تاستايدى. جابىق تەلەگرام كانالدارىن اشىپ, كەلۋشىلەرگە الدىن الا تاپسىرىس بەرۋگە, ورىن الۋعا مۇمكىندىك جاسايدى.
وبلىستىق پوليتسيا دەپارتامەنتىنىڭ باسشىسى نۇرلان ءماسىموۆ بۇگىندە وبلىستا قۇرامىندا 176 پوليتسيا قىزمەتكەرى بار مونيتورينگ توپتارى جۇمىس ىستەيتىنىن اتاپ ءوتتى.
– جىل باسىنان بەرى تىركەلگەن 22 بۇزۋشىلىق 18 ويىن-ساۋىق ورىنىنىڭ جانە 4 ساۋدا نىسانىنىڭ جۇمىس ۋاقىتىنا, ال 19 ءتارتىپ بۇزۋشىلىق بەتپەردە كيۋ ەرەجەسىنە بايلانىستى, – دەدى نۇرلان ءماسىموۆ.
دەنساۋلىق ساقتاۋ باسقارماسىنىڭ باسشىسى ايدار سەيىتقازينوۆ دەنساۋلىق ساقتاۋ مينيسترلىگىنىڭ تاپسىرىسى بويىنشا وبلىسقا «سپۋتنيك V» ۆاكتسيناسىنىڭ 80 مىڭ دوزاسى بولىنگەنىن ايتتى.
– ع.سۇلتانوۆ اتىنداعى وبلىستىق اۋرۋحانانىڭ توڭازىتقىش جابدىقتارىنىڭ كولەمى ۆاكتسينانى ساقتاۋ تالاپتارىنا ساي. قوسىمشا كولەمى 1,2 تەكشە مەتر 3 مۇزداتقىش كامەرا ساتىپ الىنادى. قان ورتالىعىنىڭ ساقتاۋ قويماسى دا ىسكە قوسىلادى, – دەدى ا.سەيىتقازينوۆ.
جالپى ەرىكتى تۇردە ەكپە جاساۋدى ءوڭىر بويىنشا 90 ەگۋ كابينەتىندە جۇرگىزۋ جوسپارلانىپ وتىر. دەنساۋلىق ساقتاۋ باسقارماسىندا 1 125 مەديتسينا قىزمەتكەرى وقىتىلدى. پرەپاراتتىڭ العاشقى پارتياسىن جەتكىزگەننەن كەيىن ۆاكتسينانى ەڭ الدىمەن ينفەكتسيالىق ستاتسيونارلاردا, جەدەل جاردەم قىزمەتىندە, كارانتيندىك ستاتسيونارلاردا جانە ستاتسيونارلىق كومەك كورسەتەتىن باسقا دا ۇيىمداردا جۇمىس ىستەيتىن مەديتسينا قىزمەتكەرلەرى الادى.
ەرىكتى ۆاكتسينالاۋ مۇعالىمدەر, كۇشتىك قۇرىلىمدار, قۇقىق قورعاۋ ورگاندارىنىڭ قىزمەتكەرلەرى, ستۋدەنتتەر, مەديتسينالىق-الەۋمەتتىك ساراپتاما مەكەمەلەرى, سوزىلمالى اۋرۋلارى بار ناۋقاستار اراسىندا جۇرگىزىلەدى.
– جالپى وبلىستا ۆاكتسينانى 85 704 ادام الۋى مۇمكىن. بۇل ناقتى سان ەمەس. سوندىقتان وزگەرۋى ىقتيمال. ۆاكتسينانى ۋاقىتىندا ەگۋ ۆاكتسيناعا قاتىستى كلينيكالىق كورسەتكىشتەرگە, ادامداردىڭ ءوز ەركىمەن ەگىلۋىنە, ەگىلەتىندەردىڭ ەپيدەميولوگيالىق مارتەبەسىنە بايلانىستى, – دەدى ا.سەيىتقازينوۆ.
اقپان ايىندا جەتكىزىلەتىن ۆاكتسينا مەديتسينا قىزمەتكەرلەرىنە ەگىلەدى. جوسپار بويىنشا 9 مىڭعا جۋىق مەديتسينا قىزمەتكەرى تىزىمگە الىنعان. باستىسى, قازىر ۆاكتسينالاۋعا, ياعني ەكپە جاساۋعا دايىندىق ءۇشىن وبلىستا الدىن الا ءتۇسىندىرۋ, اقپاراتتاندىرۋ جۇمىستارىن جۇرگىزۋ كەرەك. وعان قوسا, تۇرعىندار سۇراقتارىنا جاۋاپ الۋ ءۇشىن «جەدەل جەلى» قۇرۋ قاجەت.
وبلىس اكىمى ابىلقايىر سقاقوۆ ءتۇسىندىرۋ جۇمىستارىن جۇرگىزۋ قاجەتتىگىن, ەرەجەلەر قايتالانىپ بۇزىلعان ورىنداردا ايىپپۇل سالۋ كەرەكتىگىنە توقتالدى.
– الدىمەن مونيتورينگ توپتارىنىڭ جۇمىسىن جاقسارتۋ قاجەت. كوپتەگەن تەكسەرۋدىڭ كەرەگى دە جوق. بىراق ناقتى بۇزۋشىلىقتارعا جول بەرمەۋىمىز كەرەك, – دەدى وبلىس اكىمى.
پاۆلودار وبلىسى