ەلباسى كىتاپحاناسىنىڭ ەسىلدىڭ وڭ جاعالاۋىنداعى مۋزەيىندە نۇر-سۇلتان قالاسىنىڭ بالالار كوركەمسۋرەت مەكتەبى (بكم) – يۋنەسكو كلۋبى تۇلەكتەرىنىڭ ديپلومدىق جۇمىستارىنىڭ كورمەسى اشىلدى. «تۋعان ولكەم» كورمەسى بالالار شىعارماشىلىعى مەن قوسىمشا ءبىلىم بەرۋ ۇيىمدارىن قولداۋ جونىندەگى رەسپۋبليكالىق باعدارلاما اياسىندا ۇيىمداستىرىلدى.
ءىس-شاراعا سۋرەتشىلەر مەن ونەرتانۋشىلار, بكم مەن استاناداعى ونەر, مۋزىكا مەكتەپتەرىنىڭ جەتەكشىلىگى, وقىتۋشىلارى مەن وقۋشىلارى, ءبىلىم بەرۋدى جاڭعىرتۋ ورتالىعى مەن «رۋحاني جاڭعىرۋ» جوبالىق كەڭسەسىنىڭ وكىلدەرى قاتىستى. كورمەگە ءارتۇرلى تەحنيكادا ورىندالعان مەكتەپ تۇلەكتەرىنىڭ 50-دەن استام جۇمىسى قويىلدى. «تۋعان ولكەم» رەسپۋبليكالىق باعدارلاماسىنىڭ اياسىندا ەلباسى كىتاپحاناسى مەن نۇر-سۇلتان قالاسىنىڭ بالالار كوركەمسۋرەت مەكتەبى – يۋنەسكو كلۋبىنىڭ وتكىزەتىن كورمەلەرى بيىل ءۇشىنشى رەت ۇيىمداستىرىلىپ وتىر. بۇل رەتتە جوبانىڭ اشىلۋ سالتاناتى تاۋەلسىزدىكتىڭ 30 جىلدىعىمەن تۇسپا-تۇس كەلىپ تۇر. كورمەگە قاتىسقان 15-16 جاستاعى سۋرەتشىلەر تاۋەلسىزدىك داۋىرىندە دۇنيەگە كەلگەن. ولاردىڭ بالالىق شاعى, ءومىرى مەن شىعارماشىلىعى ەگەمەندىگىمىزدەن سۋسىندايتىنى حاق. بۇگىندە قالىڭ جۇرتتىڭ نازارىنا ۇسىنۋلى تۇرعان جاستاردىڭ جۇمىستارى – تاۋەلسىزدىكتىڭ جەمىسى», دەدى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ديرەكتورى باقىتجان تەمىربولات.
ن.ءا.نازارباەۆتىڭ «رۋحاني جاڭعىرۋ» باعدارلامالىق ماقالاسى اياسىندا ورىندالعان «تۋعان ولكەم» رەسپۋبليكالىق باعدارلاماسى جاس تالانتتاردى انىقتاۋعا جانە رەسپۋبليكانىڭ قوسىمشا ءبىلىم بەرۋ ۇيىمدارىنىڭ جۇمىسىن ناسيحاتتاۋعا باعىتتالعان. باعدارلاما 2018 جىلدان باستاپ جۇزەگە اسىرىلىپ كەلەدى. وسى ۋاقىت ىشىندە ەلباسى كىتاپحاناسىنىڭ الاڭىندا سەمەي, شىمكەنت, پاۆلودار, ەكىباستۇز, قاراعاندى, شاحتينسك جانە كوكشەتاۋ قالالارى مەكتەپتەرى تۇلەكتەرىنىڭ ديپلومدىق جۇمىستارىنىڭ كورمەلەرى ۇسىنىلعان ەدى.
– ءبىز, سۋرەتشىلەر قاۋىمى ءۇشىن حالىق ءۇمىتىن تولىق اقتاي الاتىن دارىندى, پاراساتتى بۋىننىڭ بوي كوتەرىپ كەلە جاتقانىن كورۋ – ۇلكەن قۋانىش. كورمەنىڭ ەرەكشەلىگى ۇسىنىلعان جۇمىستاردىڭ قاشىقتان ورىندالعانىنا نەگىزدەلەدى. بۇل ءۇردىستىڭ وقىتۋشىلارعا دا, وقۋشىلارعا دا وڭايعا سوقپاعانى انىق. دەگەنمەن دە تۋىندىلار دەڭگەيىنىڭ بيىكتىگىن جوعالتپاي, كەلۋشىلەردىڭ كوزايىمىنا اينالىپ وتىر. كەسكىندەمە, گرافيكا, ساندىك-قولدانبالى ونەر – ءبارى دە كوزدىڭ جاۋىن الادى. قيىن-قىستاۋ كەزەڭدە بۇل سۇلۋلىقتى تاماشالاۋ مۇمكىندىگىن بەرگەن ۇيىمداستىرۋشىلارعا العىسىمىز زور, – دەيدى سۋرەتشىلەر وداعى باسقارماسىنىڭ مۇشەسى, سۋرەتشى دينارا نوگەر.
ايتا كەتەيىك, ەلورداداعى بالالار كوركەمسۋرەت مەكتەبى – يۋنەسكو كلۋبى 1983 جىلى قۇرىلعان. سودان بەرگى جىلدار ارالىعىندا مەكتەپ وزىندىك داستۇرلەردى قالىپتاستىرىپ, كوركەمدىك ءبىلىم بەرۋ سالاسىندا پەداگوگيكالىق جۇمىس تاجىريبەسىن جيناقتادى. ال اتالعان كورمە 25 اقپانعا دەيىن جالعاسادى.